Roma ma Fare pala hageya
Fare pala hageya
Maktub ge Bulus ne njaŋge hon Roma ma naa pet a vḭ go na Bulus njaŋge na ne, njaŋge na ge suwal Korinte go (Tkm 20:3), swaga ge ne ka nṵsi tene ndwara gwan’a Ursalima go ne bobo ge naa ge suwal Makedoniya ma ne Akaya ma ne ho̰ ne naa ge Kris ne ma ge ne suwal Ursalima go ma pe (Tkm 20:1-5, ndi Rom 15:19-29). Njaŋge na ge del wara anuwa̰y para myanaŋgal (56) ko wara anuwa̰y para ɓyalar (57) go go. Bulus njaŋge nama maktub mbe ndwara ke nama kwarra go na da ne dwatɗa ne mbo suwal Roma, na ba kale mbo suwal Espa̰y (15:22-24). Ago mborra ge na ne nama ta ya, nama ame na, nama mbá na ne temel ge ne na ndwara zḛ pe kerra me. A go no, Bulus ɓo viya̰ ge wan nama fare ge Dok ne ge na ne waage na pe no me. A be Bulus dó ɓase ge Dok ne ma ge ne suwal Roma go pe ne to.
Maktub ge Bulus ne njaŋge hon Roma ma a maktub ge Bulus ne ho̰ hateya ma mwaɗak ne na zi ne. Ago Bulus vwa na hateya ma pala ya 1:16-17 zi, ge ne ŋgay go máya ge ndu ne, ne hat dosol ge na ne da ne hon fareba ta.
Ne Rom 1—8, ne jo̰ ɓase ge Dok ne ma ge ne Roma go ma, Yuda ma ka gḛ waɗe pehir ge ɗogle ma ɗe, a ka e nama gwan ne bama pala Eya ma pe se, a go no, Bulus ke nama kwarra no go, Dok hat ndu dasana dosol da ne na kaŋ kerra ge kwaɗa ma ta to, amma ne hon fareba ta ɗeŋgo. Ago naa pet a ke sone Adam zi, amma ne Jeso Kris ta, naa pet a ɓol máya ne hon fareba ta.
Ne Rom 9—11, Bulus ŋgay nama katɗa dagre, ndwara go Israyela ma, nama ge pehir ge talla ge Dok ne ma ne pehir ge ɗogle ge a ne ame Kris ma. Dimma ne uwara go, hon fareba ge naa ge Kris ne ma ne too ya Yuda ma zi, máya mbo da ne Yuda ma ta ya, katɗa ma̰ no Dok dó nama uzi ndwara má pehir ge ɗogle ma puy ɗe, mbo gwan ne nama ya.
Ne Rom 12—15, Bulus ke pehir ge ɗogle ma kwarra go, kadɗa Dok tó nama ya máya go bo, nama ke mborra ge jwap Dok ndwara se, ne naa ge may ma ta, naa ge pool ma nama ka dwat ne naa ge taŋgay ma, nama ɓo dir ge giya̰l mborra ge nama ne Kris Jeso zi.
Ge Rom 16 go, Bulus hon na wak sanna ma naa ta, tó naa gḛ da ne dḭl, naa sonmo ne naa zaab.
Ndu ge ne isi maktub ge Roma ne ɓol hateya ge sirsi na hon fareba zi ma gḛ ge be to.
Varseya ge maktub ge Roma ne
1- Fare pala hageya (1:1-17)
2- Naa pet mbya ɓyare máya (1:18—3:20)
3- Viya̰ máya ge Dok ne (3:21—4:25)
4- Katɗa ge giya̰l Kris Jeso zi (5:1—8:39)
5- Laar ɓyareya ge Dok ne ne Israyela pe (9:1—11:36)
6- Mborra ge Kris zi (12:1—15:13)
7- Wak sanna ma (15:14—16:27)
Currently Selected:
Roma ma Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.