Temel kerra ma 26

Bulus ɗaŋge tene pe gan Agrippa ndwara se

1Agrippa jan Bulus go: «Viya̰ hage ya mo pal ge mo jan fare ɗaŋge tene pe.» Bulus tyare na tok digi, ɗage ben tene janna go: 2«Gan Agrippa, mbi da ne sḛ tuli ma̰ no ge mbi jan fare ndwara ben tene mo ndwara se ne kaŋgeya ge Yuda ma ne kaŋge mbi pe. 3Ago mo kwa hada ge Yuda ma ne kwa yaɗat, ne nama fare gage ta ma. Mbi kaɗe mo, wa̰ tene, mo za̰ mbi kwaɗa. 4Katɗa ge mbi ne ne bool ge mbi ne ya day, ne pe eya ge mbi ne ya day mbi ya mbi pehir ma buwal zi, Ursalima go, Yuda ma pet a kwa kwa. 5A kwa mbi kwa tyatyat ne zḛ ya day, kadɗa a ɓyare ya a da ne pool ke sayda mbe no. Mbi ka Farisi, a hir hateya ge ndaar kaka hateya ge i ne ma zi ne#Tkm 23:6, Fil 3:5.. 6Se no, kadɗa a zwa mbi ya swaga sarya go, da ne jobreya ge mbi ne ge mbi ne é na wak tuli ge Dok ne ke i bá ma na pal pe, 7na ge i pehir ge wol para azi mbe ma ne á ta ke Dok temel ɗaal ne gyala ndwara da̰re wak wiya ge na ne. O gan, da ne jobreya mbe pe Yuda ma kaŋge mbi no. 8Aŋ te hon fareba go Dok tan naa ge siya ma tan to kyaɗa ɗaa? 9Mbi sḛ ne mbi pala, mbi dwa go mbi ke ho̰l ne dḭl ge Jeso ge Nazaret ne mbe kaŋ ma zi pet#Tkm 8:3, 9:1-2, 22:4-5.. 10No a kaŋ ge mbi ne ka kerra Ursalima diŋ ne. Mbi sḛ ne mbi pala, mbi ka̰ naa ge mbegeya ma daŋgay zi gḛ, ne pool ge mbi ne ɓo ne naa ge ke tuwaleya ma ga̰l ma ta. Swaga ge a ne ɗage hun nama, mbi ka mḛ Yuda ma pe go. 11Ɗaɗak, mbi ka mbo Sinagog ma zi pet, mbi ka é nama ne pool nama sá Kris. Egleya ge mbi ne zi nama pal, mbi ka ke nama yál, ɗiŋ mbo suwal ge ɗogle ma ya.

12A go no, dam a̰me ɗu swaga mbo suwal Damas go, ne viya̰ ma ne pool ge naa ge ke tuwaleya ma ga̰l ma ne ho̰ mbi. 13O gan, viya̰ zi, le gyala pala tat, mbi kwa kwaya̰l a̰me mborra ne digi zi ya no, na kwaya̰l mbe waɗe ge gyala ne, kwaya̰l mbe mbo ya ame i ne mbi kaam ge i ne nama ne ka mborra ma zi mwaɗak. 14I pet, i det suwar zi, mbi za̰ ka̰l a̰me jan mbi ne wak ibriniya go: ‹Sawul! Sawul! Mo te ke mbi yál kyaɗa ɗaa? Mo ne pool ɓol viya̰ ge ŋgwate tene uwara wak zwabal ge a ne tun kavaar ma pe ndwara e na mbo viya̰ digi tok go to.› 15Mbi jan go: ‹A mo wuɗi ne ɗaa, Bageyal?› Bageyal jan go: ‹A mbi Jeso, ge mo ne ke na yál ne. 16Amma ɗage digi, mḛ digi. Ago mbi dya̰ tene mo ta ndwara go mo gá mbi dore, mo gá bage waage kaŋ ge mo ne kwa mbe no, ne kaŋ ge mbi ne mbo gwan dyan nama dḛ ya mo ta ma naa ta. 17Mbi mbo zur mo ne Yuda ma, ne pehir ge ɗogle ma, nama ge mbi ne teme mo mbo nama ta ya ma tok go, 18ndwara go, mo hage nama ndwara ma, mo saŋge nama ne tṵ zi ya mbo ya kwaya̰l go, ne pool ge Saytan ne zi ya mbo ya Dok ta me. Ne da pe nama ɓo poreya ge nama sone ma ne, nama za joo poseya ne naa ge mbegeya ma ge a ne ho̰ fareba mbi ta ma.›

19Ne pe no ɗe, o gan Agrippa, mbi be kuri daalam ge ne mbo ne digi zi ya wak to, 20amma mbi gale e pe da ne naa ge ne suwal Damas go ma ta ɓya, ɗiŋ mbo Ursalima, ne suwal Yahudiya go mwaɗak, ɗiŋ mbo pehir ge ɗogle ma ta, mbi ka waage nama go nama hase, nama saŋge ta ya Dok ta, nama ke kaŋ ge ne ŋgay go nama hase hase ma. 21Da ne pe, Yuda ma wa̰ mbi ge zok ge mbegeya zi no, a ɓyare hun mbi no. 22Da ne mbarra ge Dok ne ta mbi ka ne ndwara ne go no ɗiŋ ma̰ no, mbi waage na fare naa jabso ma ne naa ga̰l ma ta no. Fare ge mbi ne jan, mbi be ya̰ fare ge anabi ma ne Musa ne waage na go na mbo mbo ya wak uzi to. 23a jya̰ go: Kris mbo njot yál, mbo tan zḛ ne naa ge siya ma buwal zi, mbo waage kwaya̰l ɓase ma ta, ne pehir ge ɗogle ma ta me#Isa 42:6, 49:6, 1Kor 15:20..»

24Swaga jan fare ɗaŋge tene pe go, Festus, ndage na ka̰l ba̰yya go: «Bulus, mo seger! Hateya gḛ ge mo ne saŋge mo ya seger!» 25Bulus jan na go: «Ndu ga̰l ge ɓaŋlaŋ Festus, mbi be seger ne to, mbi jan fare ge fareba, ne fare ge ne na viya̰ go. 26Ago gan da ne fare mbe ma kwarra, da ne pe mbi wan na fare mbe ma pe zum gagaraw no, mbi da ne kwarra tyatyat go na sḛ kwa kaŋ mbe ma kwa pet, ne jo̰ a be ke woyya zi to. 27Gan Agrippa, mo da ne hon fareba anabi ma fare janna ta’a? Mbi da ne kwarra go mo da ne hon fareba.» 28Gan Agrippa jan Bulus go: «Ga ŋgeɗo ne fare janna ge mo ne ma ta, mo ɓyare saŋge mbi ndu ge Kris ne.» 29Bulus jan go: «Ko na gá ŋgeɗo, ko gḛ, kaɗeya ge mbi ne Dok ta, ago na ka be mo ɗeŋgo to, amma naa ge ne za̰ mbi ma̰ mbe no ma pet, aŋ saŋge dimma ne mbi go, zul mbe ma no nama gá baŋ ne ɗeŋgo.»

30Gan ɗage digi, poseya ne bage ne do na ndwara ne suwal pal, ne Berniki, ne naa ge a ne nama ne ka ma pet, 31a wat zum ya, a jan ta go: «Ndu mbe no be ke kaŋ ge ne mbya ɓol siya to, ko a fet na daŋgay zi to.» 32Agrippa jan Festus go: «Nee te ya dol na digi, te go na be jan go a gene na mbo Kaysar ndwara se ya to.»

Currently Selected:

Temel kerra ma 26: FGN2013

Highlight

Copy