Leviticus 26
26
1Gûdingoaliortuksaungilase ilipsingnut, napartitsijuksaungilaselo Gûdingoanik auktisimajunik, ujarasusungniglônêt napajunik, ujarᴋaniglônêt adsingoalingnik âᴋiksoijuksaungilase nunapsingne tuksiarvigijomavlugit; Uvangaugama Nâlegak Gûdise.
2Sabbateᴋotikka uvloksioraksarivase, ivsornaitoviᴋotigalo opigilugo; Uvangaugama Nâlegak.
3Maligaksaukojakka arvertarvigigupsigik, perᴋojakkalo nâlekupsigik piniarlugillo;
4Silaluᴋojijomavunga naliuningane, nunalo sakᴋêjuksauvok perortuminik, napârtullo perorsêvingmêtut sakᴋertitsilârput paungamingnik.
5Sanaugaksapselo pêjartauvinga angutiniarpok vaineliksat paungangita katersortauvianik, paungallo katersortauvia angutiniarpok karngasoivingmik; niaᴋôjartolârposelo akᴋeartorluse, inôlârposelo nunapsingne terlikluse.
6Ulapirksaumiglo tunitjijomavunga nunapsingne, inangalârposelo kapiasuktitaunase kimullônêt; ômajullo erᴋsinartut pêjaromavakka nunapsingnit, saviksoarlo ingergarniangilak nunapsigut.
7Omigijisele udlalârpase, tâpkoalo oggolârput sâpsingne saviksoakut.
8Ilase tallimat aijalilârput hundredenik, ilaselo hundredit ᴋemâtitsilârput ten thousandenik, ômigijiselo oggolârput sâpsingne saviksoakut.
9Uvangalo kamagitsiaromavapse, kinguvâᴋartitsomavapselo unuksitiluselo; angerneralo ilipsingnut atsungersoromavara.
10Nerrilârposelo nutaungitunik torᴋorsimajapsingnik, nutaungitullo anilârpase nutât iniksaᴋarᴋovlugit.
11Tuperalo âᴋiksoromavara akunapsingne; tarnimalo naggoginiangilâse.
12Akunapsingnele arvertaromavunga, Gûdeojomavlunga ilipsingnut, ilipselo inuᴋutigijomavapse.
13Uvangauvunga Nâlegak Gûdise tikiutitise nunamit Egiptenemit kipaloᴋonase tâpkonunga; nangmautapsele ᴋejuktangit navilauᴋpakka, makitatsiarluse arvertarungnarᴋovluse.
14Nâlegomangikupsingale, perᴋojallo tamakkoa tamaita pinialungikupsigik;
15Maligaksauᴋojakkalo naggogigupsigik, tarnipselo idluarijakka ajaktorpatigik, piniartauᴋojakka tamaita piniaromanagit, angiᴋatigêgutigijara asserᴋilugo;
16Uvangatauk imailiorvigijomavapse: kapianadlartok tikititsomavara ilipsingnut, uvinêrutinek ôlingnartorlo, ijinik asseroijok, tarnemiglo ilungôtitsijok; sulinaselo perorsijaksase karngasulârpase, ômigijipse nerᴋiksarilârmagit.
17Kênaralo allartilârpara ilipsingnit, annaulertaujomârposelo ômigijipse sângine: ômigijise ataniojomârput ilipsingnut, ᴋemâjomârposelo udlataungikaloartiluse.
18Tamakkoalo pigaloartilugit nâlagomangikupsinga, tagva sevenertortomik sugiaromârpapse ajornise pivlugit.
19Pitsartunipselo piojorininga serᴋomitsomârpara, ᴋilaglo ᴋolipsingnêtok kikiaktut ititsomârpara, nunaselo ᴋaᴋorlertut;
20Nukkiselo sulinatik nungujomârput, nunase sakᴋêlulângimat perorsiaminik, nunablo napârtungit sakᴋêlulângimatta paungamingnik.
21Akkerartorlungalo arvertarupse nâlagomanase uvamnik, tikiutjilârpunga pagvilungnartunik sevenertortunik sulle ilipsingnut idluinise maliklugit.
22Omajuniglo nujoartunik tiliklilârpunga akunapsingnut, tâpkoalo aᴋsâromârpâse ᴋitorngapsingnik, ômajoᴋotiselo asserorlugit, ikitlitiluselo; apᴋosiniselo inuêrutijomârput.
23Tamakkonungalo sâtitaungikupse uvamnut, akkerartorlungale arvertarupse sulle;
24Tagva uvanga arvertaromagivunga akkerartorluse; annaudlaromârpapselo sevenertortomik idluinise pivlugit.
25Tikiutjijomârpungalo saviksoarmik ilipsingnut, akkinialârtomik angerutaujûb ningadlarninganik; katimgatitaulârposelo iglugasaksoapsingne, nusilingnartorlo tililârpara akunapsingnut; unertutijaulârposelo ômigijipse agganginut.
26Niaᴋôjaksase amigartikupko, arnat tenit niaᴋôjioromârput niaᴋôjiorvingme atautseme, ᴋaitsivigilârpâselo niaᴋôjapsingnik ôktortautilugo kiktitautingnut; nerrijomârposelo akᴋeartorasele.
27Tamakkoalo tamaita pivlugit nâlagomangikupsinga, Akkerartorlungale arvertarupse;
28Uvangatauk akkerartorluse arvertaromavunga ningadlarlunga; pidlaromârpapselo sevenertortomik ajornise pivlugit.
29Nerrilârposelo ernipse uvininginik, panipselo uviningit nerrilârivase.
30Poktojoᴋotiselo asseroromârpakka, seᴋiningoaᴋotiselo oggotitsomârpakka, timiviniselo êgilârpakka Gûdingoaᴋotipse timingoavininginut, tarnimalo maᴋojugilârpâse.
31Iglugasaksoaselo sunaᴋarungnaititsomârpakka, ivsornaitoviᴋotiselo asserorniluᴋungortitsomavlugit, naijomangilanga tipitsiariksautigijapsingnik.
32Nunalo asserornilukungortitsomârpara: ômigijipselo tagvane nunalit tataminiarutigilârpât.
33Ilipselo siamartitsomârpapse inôᴋatigêksuit akornganut, kingunipsingnalo saviksoak amujomârpara; nunaselo asserornilukungoromârpok, iglugasaksoaselo sunataᴋarungnairomârput.
34Nunalo tagva merngoerserviksane nakoksijutigilârpait Asserorniluᴋungornine nâvlugo, ilipselo ômigijipse nunanginêtiluse; ilâ, taipsomane nuna merngoerseromârpok, merngoerserviksanalo nakoksijutigilugo.
35Asserornilukungorninga nâvlugo merngoerseromârpok; Merngoerserviksaᴋalaungimat merngoerservigilauktapsingne nunagilaurapsiuk.
36Amiakojullo ilipsingnit ômateᴋartitsomârpakka ᴋoaksângajunik ômigijimik nunangane; napârtûblo milukatangata tiktaujûb ᴋikergalijarningata ᴋemâtilârpait; ᴋemâjomârpullo ᴋemâjutitut saviksoarmit; pâlalârpullo udlataungikaloarlutik kimut.
37Naukiutijigêgomârput, sôrlo saviksûb sângane, udlaniktoᴋangikaloartilugo; pitsartuneᴋangimullo ômigijipse sângine nangerungnalulângilase.
38Toᴋojomârposelo inôᴋatigêksuit akorngane, ômigijipselo nunangata êjomârpâse.
39Amiakojullo ilipsingnit perleromârput idluinermingne ômigijipse nunangane; atâtamiglo idluiningit pivlugit perleromârput tâpkoa ilagilugit.
40Kigligiutjijomârpullo idluinermingnik, atâtamiglo idluininginik idluitulivigilaungmanga, akkerartorlungalo arvertalauramik.
41Uvangatauk akkerartorlugit arvertalaurama, tikiutilugillo ômigijimik nunanganut; taimaglo ômatingit kipimangitut nikanarsarpatta, idluitulinimiglo pidlartauninga idluarigunitsuk,
42Uvanga tagva angernera Jakomut, angerneralo Isaarmut, angerneralo Abrahâmut erᴋaumajomavakka, nunalo erᴋarlugo.
43Nunalo ᴋemaktaujok tâpkonunga merngoerserviksiolârpok, asserornilukungordlune tâpᴋoa najortiginagit; idluitulinimiglo pidlartauninga idluarilârpât, perᴋojakka ajaktulauramigit maligaksauᴋojakkalo maᴋojugilugit.
44Taimaigaloartilugole, ômigijimik nunanganêtilugit ajaktormarigomângilakka, taimâglo angitigijomik maᴋojugijomângilakka nungutaumariᴋovlugit, angerneralo tâpkonunga serᴋomiᴋovlugo; Uvangaugama Nâlegak Gûdigijangat;
45Tâpkoale pivlugit erᴋaumajomavara angernerilauktara sivorlinginut tikiutilauktamnut nunamit Egiptenemit inôᴋatigêksuit takkoane Gûdeoᴋovlunga tâpkonunga Uvangauvunga Nâlegak.
46Tamadja tagva maligaksauᴋojat piniaraksauᴋojallo perᴋojallo Nâlekab âᴋiksortangit pivlune Israêliblo ᴋitorngangit pivlugit ᴋakᴋame Sinaime Mosesib aggangitigut.
Currently Selected:
Leviticus 26: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
