Exodus 39
39
Kivgartortut annorângit atoriaᴋartangillo sanajauvut âtauvlutiglo Mosesemut, tâpsomalo nâmagivait.
1Tungujoktamillo, tungulângajomillo, aupalutsiartomillo annorâliorput kivgartornermut ilingajunik, kivgartornermut ivsornaitovingme, annorâliorpullo ivsornaitunik Aronib piksanginik, sorlo Nâlekab Mosese perᴋongmago.
2Ikiarlo sanavâ goldemit, tungujoᴋtamillo, tungulângajomillo, aupalutsiartomillo, ᴋablunâktajatsiamillo.
3Goldelo katjukpât saglilugo, kililugolo ilerksangortipât, akulerêktilugillo tungujoktak, tungulângajorlo, aupalutsiartorlo, ᴋâblunâᴋtajatsiarlo takominarsausertaujut akornganut.
4Kivilerêkutaujaliorpâlo katitaurᴋovlugo: sinîgikkut iglotut katitauvok.
5Ikiangatalo tapserutâ tâpsomanêtok tâmnatsainauvok, sanajauninga maliklugo; goldemit, tungujoktamillo, tunulângajomillo, aupalutsiartomillo, ᴋablunâktajatsiamillo; sorlo Nâlekab Mosese perᴋongmago.
6Alliguniglo tungujuângajunik sanavut avaliarutsilugillo goldemik, aglagvigivlugit, sorlo naᴋitjut aglagviongmat, Israêlib ᴋitorngangita atinginik.
7Ilivaillo ikiab tuîgingnut, ujaraulerᴋovlugit erᴋaumajaujutiksanik Israêlikunut; sorlo Nâlekab Mosese perᴋongmago.
8Sagvingmiutaliorporlo ilisimanartomik, ikiab sanajauningatut; goldemit, tungujoktamillo, tungulângajomillo, aupalutsiartomillo, ᴋablunâktajatsiamillo.
9Iktoᴋerikpok; sagvingmiutak tapitarêktilugo sanavât: aggait isangningatut takitigivok, aggaillo isangningatut siliktigivok, tappitarêkporlo.
10Ilijivigivâllo alligunik siaktunik sitamanik sanilerêktunik: siaktut sivorlît tamadja, Ruby, Topaz, Karbunkelelo: tâpkoangovut siaktut sivorlît.
11Siaktullo aipanga, Emeralde, Safirelo, Diamantelo.
12Siaktullo pingajuat, Ligure, Agatelo, Amitistelo.
13Siaktullo sitamangat, Berile, Onikselo, Jasperelo: ilijauvut avaliarutanut goldeojunut.
14Allikullo 12ovut Israêlib ᴋitorngangita atingit maliklugit, aglagviovlutik atinginik, naᴋitjutib aglagvioningatut, atunit ateᴋarlutik kinguvârêt maliklugit.
15Sagvingmiutarmelo ᴋelaumgujaliorput issûgingne, goldemit ilaᴋangitomit ᴋepjarsimajomit.
16Saneroaliorpullo maggûngnik goldeojûngnik, nuklûngniglo maggûngnik goldeojûngnik; nuklûglo atsungersorpakit sagvingmiutab isûgingnut.
17ᴋelaumgujâglo goldeojûk ᴋepjartâk nuvivakit nuklûngnut maggûngnut sagvingmiutab isûgingnêtûngnut.
18ᴋelaumgujâglo ᴋepjartâk goldeojûk isûgik atsungersorpakit saneroângnut, ilivlugiglo ikiab kivilerêkutaujâgingnut, sâgingnut.
19Nukloliorpullo maggûngnik goldeojûngnik ililugiglo sagvingmiutab isûgingnut sinâgingnut, iluanut, ikiarmut sângavlutik.
20Tâpkoalo asîgingnik maggûngnik nukloliorput atsungersorlugiglo ikiab sanerâgingnut iglutut, atsungervîk sâkita nellâgingnut, ikiab tapserutingata ᴋolânut.
21Sagvingmiutarlo ᴋelaksorpât nuklûngmigut ikiab nuklûgingnut ᴋelarutemut tungujoktamut ikiab tapserutingata ᴋollânêrᴋovlugo, sagvingmiutarlo atsungerudjarᴋonago ikiarmit; sorlo Nâlekab Mosese perᴋongmago.
22Ikiablo atigiujanga sanavâ pergaimajomit, ilûnnât tungujoktamit.
23Atigiujarlo ᴋerᴋagut iterviᴋarpok, sorlo sorsuktuksab annorângata itervingatut, itervingalo nuilatârtauvok, allirᴋonago.
24Atigiujablo periningane paungangoaliorput tungujoktamit, tungulângajomillo, aupalutsiartomillo, ᴋablunâktajatsiamillo.
25Sivanearsuliorpullo goldeojunik ilaᴋangitomik, sivanearsuillo pitipait paungangoat akornganut atigiujab periningane, avatâgut paungangoat akornganut;
26Sivanearsuk paungangoarlo, sivanearsuk paungangoarlo, avatâgut atigiujab kivgartûtib periningane; sorlo Nâlekab Mosese perᴋongmago.
27Uliliorpullo ᴋablunâktajatsiamit sanasimatsiartomit Aronemut erninginullo,
28Nasarlugarmiglo ᴋablunâktajatsiamit, sivumiutaniglo ᴋablunâktajatsiamit, ᴋarlingniglo ᴋablunâktajatsiamit,
29Tapserumiglo ᴋablunâktajatsiamit, tungujoktamillo, tungulângajomillo, aupalutsiartomillo, nuilapaujaksajamit; sorlo Nâlekab Mosese perᴋongmago.
30Nasarlugaublo ivsornaitub sivumiutanga sanavât goldemit ilaᴋangitomit, aglagvigivlugolo aglangnik, sorlo naᴋitjutib aglangititut: IVSORNAITOK NALEKAMUT.
31ᴋelaruserpâllo ᴋelarutemik tungujoktamik, nasarlugaub ᴋânganut atsungersortaurᴋovlugo; sorlo Nâlekab Mosese perᴋongmago.
32Taimâk suliaksat ilûnnatik ilagêktut tupingane ivsornaitome pijarêrtauvut: Israêlikullo piniarput tamainik Nâlekab perᴋojijutigijangit tamaita Mosesemut maliklugit, taimâk piniarput.
33Tuperlo âpât Mosesemut, tupek, perᴋutingillo, saneroangit, sâtojangillo, ikârusingillo, napajungillo, manguvingillo,
34Matuksarlo saukat angusâluit aminginit aupaluktitaumajunit, matuksarlo ᴋabvît aminginit, upkoksablo tachititsijub tâlutangit,
35Iklervik kigligiutjineᴋtalik, akigautîgiglo, iksivaviglo saimarvigijauvik,
36Sâ perᴋutingillo tamaita, ᴋakᴋôjallo takonâraksat,
37Naneroaᴋarvik ivsornaitok ᴋollingillo, ilâ, ᴋollît atuinaujut perᴋutingillo ilûnnaita, orksorlo ᴋollît piksangat,
38Tunerguserviglo goldeojok, orksorlo mingoarutiksak, tipitsiariksautiksallo naimajominartut, tâlutarlo tupiub pângata piksanga,
39Tunerguservik ᴋaᴋorleojok, kilapatângalo ᴋaᴋorleojok, akigautîgik, perᴋutingillo tamaita, ubvarvik ikoggangalo,
40Avalut tâlutangit, napajungit, manguvingillo, avalullo itertarvingata tâlutangit, aklunângillo, kikiangillo, perᴋutillo tamaita kivgartornermut tuperme, ilagêktut tupingane,
41Annorât kivgartûtit kivgartornermut ivsornaitovingme, annorâllo ivsornaitut Aronemut, ajoᴋertijôjomut, erningitalo annorângit kivgartornermut ajoᴋertuijônerme.
42Nâlekab perᴋojijutigijangit Mosesemut tamaita maliklugit, taimâk Israêlikut suliaksat suliarivait.
43Mosesiblo sanajaujut tamaita ᴋemergovait, ahâglo, piniarsimavait sorlo Nâlegak perᴋojingmat, taimâluatsiak piniarsimavait: Mosesiblo saimauserpait.
Currently Selected:
Exodus 39: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
