Exodus 35
35
Tunergutit tupersiutit.
1Mosesiblo ilagêt Israêlikut ilûnnaita katimatipait, oᴋautivlugillo: Tamadja oᴋautsit, Nâlekab perᴋojangit, piniaraksase.
2Uvlut 6it sulivigijaksarivase, uvlulle 7ingat ivsornaituksauvok ilipsingnut, Sabbate merngoerservik Nâlekamut; nalliat suliaᴋartok tâpsomane toᴋotaujuksauvok.
3Ikomamik ikitsijuksaungilase inigijapsingne uvlorme Sabbateme.
4Mosesiblo ilagêt Israêlikut ilûnnaita oᴋarvigivait, oᴋarlune: Tamadja Nâlekab perᴋojanga, oᴋarlune:
5Tigusigitse akunapsingnit tunergutiksamik Nâlekamut: nalliata ᴋunungitomik ômateliub ᴋailiuk tunergut Nâlekamut; golde, silberelo, ᴋaᴋorlerlo,
6Tungujoktarlo, tungulângajorlo, aupalutsiartorlo, ᴋablunâᴋtajatsiarlo, tuktungajullo merᴋungit,
7Saukallo angusâluit amingit aupaluktitaumajut, ᴋabvîllo amingit, ᴋejutsiarsajallo.
8Orksullo ᴋollinut, tipigiksaullo orksumut mingoarutiksamut, iserluanerutiksamullo tipitsiariktomut,
9Aliguillo tungujuangajut, aliguillo ilijaksat ikiarmut opinartomut, sagvingmiutarmullo.
10Ilûnnatiglo silatujomik ômatelît akunapsingnêtut ᴋaijuksauvut perᴋojaujullo Nâlekamut sanavlugit;
11Tuperlo matuksangalo ilulek, matuksangalo silalek, saneroangillo, sâtujangillo, saningajuksangillo, napajungillo, manguvingillo,
12Iklervik, akigautîgiglo, iksivaviglo, matuksablo tâlutangit,
13Sâ, akigautîgiglo, perᴋutingillo ilûnnaita, ᴋakᴋôjallo takonâraksat,
14Naneroaᴋarviktauk ᴋaumautiksanut, perᴋutingillo, ᴋollingillo, orksorlo, ᴋolît orksuksangat,
15Tunerguserviglo iserluanititsivik tipitsiariktomik, akigautîgiglo, orksorlo mingoarutiksak, tipitsiariksautiksallo naimajominartut, upkoablo tâlutanga tupiub pângane,
16Tunergutillo ôtaksat tunerguservingat, ᴋilapatângalo nuluangojârtok ᴋaᴋorlek, akigautîgiglo, perᴋutingillo ilûnnaita, ubvarvik ikoggangalo,
17Avalullo tâlutangit, napajungillo, manguvingillo, avalullo pângata tâlutangit,
18Tupiublo kikiangit, avalullo kikiaktangit, aklunângillo,
19Kivgartortullo annorângit kivgartornermut ivsornaitovingme, annorât ivsornaitut Aronemut, ajoᴋertuijomut, erningitalo annorângit kivgartornermut ajoᴋertuijônerme.
20Ilagello Israêlikut ilûnnatik anivut Mosesib najorninganit.
21Tikipullo, ilûnnatik kajungersartaujut ômatimigut, ilûnnatiglo ᴋunungititaujut anernermigut, ᴋaitsivullo Nâlekab tunergusiaksanganik ilagêktut tupingata suliarijauninganut, kivgartortauninganullo ilûnânut, annorânullo ivsornaitunut.
22Tikipullo, angutillo arnallo, ilûnnatik ᴋunungitunik ômatelît, ᴋaitsilutiglo aggautimiutanik, siumiutaniglo, ᴋetterdlermingniglo, saneroaniglo, ilûnnainik goldeojunik: tunitjijullo ilûnnatik tunitjivut goldeojunik Nâlekamut.
23Angutillo ilûnnatik nagvârviojut tungujoktamik tungulângajomiglo, aupalutsiartomiglo, ᴋablunâktajatsiarmiglo, tuktungajullo merᴋunginik, ᴋabvîllo aminginik, ᴋaipait.
24Ilûnnatik tunitjijut tunergutinik silbereojunik ᴋaᴋorleojuniglo ᴋaitsivut Nâlekab tunergusianganik; ilûnnatiglo nagvârviojut ᴋejutsiarsajamik kivgartornerub suliarijauninganut ᴋaipât.
25Arnallo ilûnnatik silatujunik ômatelît ilerᴋsaliorput aggamingnut, ilerᴋsaliarimajatiglo ᴋaipait, tungujoktarlo, tungulângajorlo, aupalutsiartorlo, ᴋablunâktajatsiarlo.
26Arnallo ilûnnatik ômatimigut aulataujut silatunerme ilerᴋsaliorput tuktungajut merᴋunginit.
27Angajoᴋâllo ᴋaitsivut aligunik tungujuangajunik, aliguniglo ilijaksanik ikiarmut opinartomut, sagvingmiutarmullo;
28Tauvluᴋutiniglo, orksumiglo ᴋollît orksuksanganik, orksumiglo mingoarutiksamik, iserluanititsijutiksamiglo tipitsiariktomik.
29Israêlikut ᴋunulugatik ᴋaitsivut tunergutiksanik Nâlekamut, angutit arnallo ilûnnatik ômatimigut ᴋunungititaujut ᴋaitsilutik suliarijaujariaᴋartunut sunatuinamaringnut, Nâlekab perᴋojijutigijanganut Mosesib agganginut.
30Mosesiblo Israêlikut oᴋautivait: Takuitse, Nâlekab Bêsalêele, Hurib erningata, Urib erninga, kinguvârênit Judakunit, ᴋairᴋosimavâ atingagut;
31Ilumersimavâlo Gûdib Anerninganik, silatunermik, ipaksitsiarnermiglo, ilisimanermiglo, sulijungnarnermiglo sunatuinamaringnik;
32Ilisimanartuniglo sulijungnarᴋovlugo, goldelerinermik, silberelerinermiglo, ᴋaᴋorlerlerinermiglo,
33Alligulerinermiglo ilivlugillo, ᴋejulerinermiglo, sanajungnarᴋovlugo sunatuinamaringnik.
34Omamiutaᴋartipâlo ajoᴋertuijungnarnermik, tâmnalo Ahâlialo, Ahîsamab erninga, kinguvârênit Dânekunit.
35Tâpkoa ilumerpak silatunermik ômatekut sulijungnartilugik sunatuinamaringnik, aligolerijub sulijublo ᴋaᴋiarnangitub, takominarsautiliortublo sulianginik, tungujoktamik, tungulângajomiglo, aupalutsiartomiglo, ᴋablunâᴋtajatsiamiglo, annorâksaliortublo sulianganik, ilâ, sumiglônêt suliaᴋartut sulianginik, ilisimanartuniglo suliaᴋartut sulianginik.
Currently Selected:
Exodus 35: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
