Exodus 34
34
Gûdib atinga oᴋâlautauvok. Gûdib Israêlikut angeᴋatigivait.
1Nalekablo Mosese oᴋarvigivâ: Aglagvîngnik maggûngnik ujaraujûngnik ulimarit, sivorlîk adsîgingnik: aglagvigijomavâkkalo oᴋautsinik sivorlîgingnêlauktunik serᴋomilauktângne.
2Achâgolerillo, uvlâkullo majorarit ᴋakᴋamut Sinaimut sângeriartorlungalo ᴋakᴋaub ᴋângane.
3Inungmigle majoraᴋateᴋartuksaungilatit, inungmiglônêt takuksaujoᴋarniarane ᴋakᴋame ilûnâne; saukallônêt nergjutillônêt nerriniaratik ᴋakᴋaub tungâne.
4Aglagvingniglo maggûngnik sivorlîgiktitut ullimarpok: Moseselo uvlârorpok majorarlunelo ᴋakᴋamut Sinaimut, sorlo Nâlekab perᴋongmago, aglagvigiporlo maggûngnik ujaraujûngnik.
5Nâlegarlo akᴋarpok nuvujakut, nangeᴋatigivlugolo tagvane, Nâlekablo atinga oᴋâlautigivâ.
6Nâlegarlo ᴋângerpok sânganut, oᴋâlavorlo: Nâlegak, Nâlegak, Gûde, nâpkigosuktok saimajorlo, kamangitsertortok nagligosuktoksôjorlo, nalâgôrtoksôjorlo,
7Naglingnermik soᴋosertailitsijok tausendeoᴋatartunut, idluitulinernik tappatonerniglo ajornerniglo isumagijungnainiktok, pidlartailitsingitorle ᴋaᴋialerneᴋangitunik; atâtat idluitulininginik pidlarniktok ᴋitorngane, ᴋitorngallo ᴋitorngangine, ernerêt kingorlerêt pingajungit sitamangillo tikidlugit.
8Moseselo okᴋosârpok nunamut, tuksiarlunelo.
9Oᴋarporlo: Saimaneksiguma ijîkpit sângangne, Nâlegak, Nâlekama ilagilitiguttôk; Inuit ukoa tapatojoksôngmata; idluitulinivullo ajornivullo isumagijungnailaukit, kingormgutijaksautitigullo ilingnut.
10Oᴋarporlo: Ahâk, angeᴋatigêngnelioromavunga inuᴋotingnut tamainut, tatamnartulijomavungalo sorlo nunaksoarme ilûnâne inôᴋatigêksoarnelo nalliane piniartoᴋalauᴋsimangimat: inuillo ilûnnatik najortatit takojuksauvut Nâlekab sulianganik: ᴋoaksârnarmat suliarijomajara ilingne.
11Perᴋojakka ilingnut uvlome naipertutsiarkit: Ahâk, sivunerne ᴋemâtitsomavakka Amoriterit, Kânaaniterillo, Hetiterillo, Perisiterillo, Heviterillo, Jebusiterillo.
12Udjertorit, nunab aivigijavit inungit angeᴋatigêngnelioᴋatigivlugit perᴋonak, nigarniutiksaurᴋonagit akunapsingne:
13Tunerguservingille aseroraksarivase, gûdingoangillo serᴋomivlugit, napârtungillo nakalugit:
14Gûdib asianut tuksiartuksaunginavit, Nâlegak, Illungertortomik atelik, Gûdeongmat ilungertortok:
15Nunab inungit angeᴋatigivlugit, gûdingoangillo ajortuliᴋatigivlugit perᴋonak, tunerguserlutillo gûdingoanginut, tunergutingillo nerrivlugit perᴋonak, inatauguvit;
16Tiguserᴋonaglo paninginik ernernut; paningit tagva ajortuligunik gûdingoanginut, ernitillo uerisarlugit ajortuliᴋataurᴋovlugit gûdingoanginut perᴋonagit.
17Auktisimajunik gûdingoaliortuksaungilatit.
18Uvloksiorvik sêrnarsauteᴋangitomik ᴋakᴋôjaktorvik uvloksiorvigijaksarivat. Uvlunik 7nenik ᴋakᴋôjaktortuksauvotit sêrnarsauteᴋangitunik, sorlo perᴋolaurapkit, takᴋiub Abibib naliutisimaningane: takᴋerme Abibeme anilauravit Egiptenemit.
19Igliarmik angmaijut ilûnnaita perᴋutigivakka; nergjutivillo erniarirᴋârtangit angutaujut tamaita, tuktuvaglônêt saugarlônêt.
20Siuterᴋortojuble erniarirᴋârtanga tauksiutijaksarivat saugârsungmut: tauksiutilungikungnelo ᴋongesêjaraksarivat. Ernivit erniarirᴋârtangit ilûnnaita tauksiutijaksarivatit. Tunergutiksalijaranelo sakᴋijârtoᴋartuksaungilak sâmne.
21Uvlunik 6inik sulijuksauvotit, uvlulle 7ingane merngoersertuksauvotit: nunab poagijartauvingane perutsiallo katersivingane merngoersertuksauvotit.
22ᴋakᴋôjaksallo sivorlerpât katersivingata naliuninga uvloksiorvigijaksarivat, taimâktauk katersiviub jârib nâninganêtub uvloksiorvinga.
23Pingasuertorlutik jâreme angutiᴋotitit ilûnnatik sakᴋijârtuksauvut Nâlekab Gûdib, Israêlib Gûdingata, sângane.
24Inôᴋatigêksuit pingujaromagapkit sângnit, nunavillo kiglingit nerototitsomavlugit; nunangniglo uningartoᴋartuksaungilak majorarsimatilutit sakᴋijâromavlutit Nâlekab Gûdivit sângane pingasuertorlutit jâreme.
25Tunergusiama aunga tunerguseraksarilungilat sêrnarsautelingmik aipiujaᴋartilugo; tunergullo ᴋângerviksiorviksiut piksaᴋumitârijaksarilungilat uvlârmut.
26Nunavit paungangita sivorlît sivorlerpângat ᴋaitaksarivat Nâlekab Gûdivit iglunganut. Tuktungajoarak, sule amâmaktok, igajaksarilungilat.
27Nâlekablo Mosese oᴋautivâ: Oᴋautsit tamakkoa aglakit: oᴋautsit tamakkoa maliklugit angeᴋatigêngneliorpunga ilingnut Israêlikunullo.
28Tagvanêporlo Nâlegak ilagivlugo uvlunik 40nik unuarniglo 40nik; nerrilungilak imilungilarlônêt. Aglagvîngnullo aglakpait angeᴋatigêngnerub oᴋausertangit, perᴋojat 10.
29Moseselo atersârmat ᴋakᴋamit Sinaimit, aglagvîk maggûk kigligiutjinektalîk tigumiarlugik, atersârmat ᴋakᴋamit, Mosese ᴋaujimalungilak kêname aminga ᴋeblermat Gûde oᴋaᴋatigisimagamiuk.
30Aroniblo Israêlikullo ilûnnatik Mosese takungmatsuk, nute, kênangata aminga ᴋeblerpok; erᴋsivullo ᴋaglilerlugo.
31Mosesible ᴋaigarsugvigivait; Aroniblo ilagêktullo angajoᴋângita utervigivât: Mosesiblo oᴋaᴋatigivait.
32Kingorngagullo Israêlikut ilûnnatik tikipât: tâpsomalo oᴋâlavigivait tamainik Nâlekab oᴋauserijanginik tâpsomunga ᴋakᴋame Sinaime.
33Oᴋaᴋatigijungnairᴋârnagillo Mosesib kênane tâlutserpâ.
34Mosesele itermat Nâlekab sânganut oᴋaᴋatigijomavlugo tâlutane pêrpâ anerᴋârane. Anivok tagva, Israêlikullo oᴋarvigivait perᴋojaunerijaminik.
35Israêlikullo Mosesib kênanga ulernairpât, Mosesib kênangata aminga ᴋeblermat: Mosesiblo kênane tâlutserivâ iterᴋârane Gûde oᴋaᴋatigijomavlugo.
Currently Selected:
Exodus 34: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
