Exodus 30
30
Tunerguservik iserluanititsivik tipitsiariktomik. Maligaksat inuit kititautilugit.
1Tunerguserviliortuksauvotillo iserluanititsivingmik tipitsiariksaumut atortuksamik: Sanajaksarivat ᴋejutsiarsajamit.
2Talertut atausertut takitigijuksauvok, talertullo atausertut siliktigivlune: Iktoᴋeriktuksauvok: talertullo maggûtut poktotigijuksauvok: Nakjungillo tâmnatsainaujuksauvut.
3ᴋallineᴋartitaksarivallo goldemik ilaᴋangitomik, ᴋângalo sanerangillo avatâgut, nakjungillo; avaliarutalioraksarivat goldemik avatâgut.
4Nuklûngniglo maggûngnik sanajuksauvotit tâpsomunga avaliarutangata atâgut, terreᴋungine, sanerâgingne iglutut sanajaksarivatit; iniksaujuksauvullo akigautîgingnut akigartaurᴋovlugo.
5Akigauteliortuksauvotillo ᴋejutsiarsajamit, ᴋallineᴋartilugiglo goldemik.
6Ilijaksarivallo tâlutab iklerviub kigligiutjineᴋtaliub tuglianêtub sânganut, iksivaviub saimarvigijauviub kigligiutjineᴋtaliub ᴋânganêtub naipitsivigijomajama ilingnik sânganut.
7ᴋânganelo Arone iserluanititsijuksauvok tipitsiariktomik uvlât tamât; ᴋollilerijarangat iserluanititsijuksauvok tipitsiariktomik ᴋângane.
8Unnungmelo Aronib ᴋollît ikijarangagit iserluanititsijuksauvok tipitsiariktomik ᴋângane, tipitsiariktomik nokᴋajuitomik Nâlekab sângane kinguvâpsigut.
9Tipigiksaumik takorngartamik tunergusertuksaungilase ᴋângane tunergutimiglônêt ôtaksamik, tunergutimiglônêt nerᴋêjamik; kovisivigijaksaringilaselônêt tunergutimik imiksamik.
10Aronelo atausiardlune jâreme ulapᴋosêjutiksalêjuksauvok nakjungine, ajortoerutjinermik ulapᴋosêjutiksab tunergutiksangata aunganut; atausiardlune jâreme ulapᴋosêjutiksalêjuksauvok ᴋângane kinguvâpsigut: tamanna ivsornainerpauvok Nâlekamut.
11Nalekablo Mosese oᴋarvigivâ, oᴋarlune:
12Israêlikut kititaksat kitikungne, ilûnnatik atunit tunitjijuksauvut tarnimik ulapᴋosêjutiksanganik Nâlekamut kitikungne; nûsilingnartoᴋarᴋonago akorngane kitikungne.
13Kititaumajunut ilaujut atunit tunitjijuksauvut sêkelib abvangatut, ivsornaitoviub sêkelinga maliklugo: (sêkele geratut 20tut akitutigivok:) sêkelib abvangatut Nâlekab tunergusiarijaksarivâ. (Sêkele 50census-tut akitutigingoarpok.)
14Kititaumajunut ilaujut ilûnnatik atunit, jâreᴋartut 20nik ᴋângiutijullo, tunitjijuksauvut tunergutemik Nâlekamut.
15Akluitut anginersamik tunitjijuksaungilat, aklujullo mikinersamik sêkelib abvanganit tunitjijuksaungilat, tunitjijarangata tunergutemik Nâlekamut, tarnise ulapᴋoseromavlugit.
16Kênaujallo ulapᴋosêjutaujut tigujaksarivatit Israêlikunit, ilingatilugillo tupiub kigligiutjineliub kivgartortauninganut; erᴋaumajaujutiksaurᴋovlugo Israêlikunut Nâlekab sângane, tarnise ulapᴋoseromavlugit.
17Nalekablo Mosese oᴋarvigivâ, oᴋarlune:
18Ubvarviliortuksauvotit ᴋaᴋorlermit, ikoggangalo ᴋaᴋorleojuksaugivok, ubvarnermut: ilijaksarivallo ilagêktut tupingata tunerguserviublo akorngangne, imerlugolo imermik.
19Aroniblo erningitalo aggangmingnik itigamingniglo ubvarvigijaksarivât:
20Itijarangata tupermut kigligiutjineᴋtalingmut, imermut ubvartuksauvut, toᴋorᴋonagit; najornigangatalônêt tunerguservingmik kivgartoromavlutik, tunerguseromavlutik ôtaksanik ikomakut Nâlekamut:
21Aggatik itigatiglo ubvaraksarivait toᴋorᴋonatik: tamannalo maligaksautsainartuksauvok tâpkonunga, tâpsomungalo kinguvânginullo kinguvârêngningitigut.
22Amalo Nâlekab Mosese oᴋarvigivâ, oᴋarlune:
23Tigusigittauk ilingnut tauvluᴋutiksanik piojônerpânik, Mirrimik ilaᴋangitomik sêkeletut 500tut, Sinamônemiglo mamaktomik tâpsoma abvangatut, tagva sêkeletut 250tut, Kalamûsemiglo sêkeletut 250tut,
24Kasiamiglo sêkeletut 500tut, ivsornaitoviub sêkelinga maliklugo, orᴋsublo napârtungata orᴋsunganik hinitut:
25Orᴋsulioraksarivatillo mingoarutiksamik ivsornaitomik, mingoarut akusimajok tipitsiariksautelerijub ilisimaninga maliklugo; mingoarutiksauvok orᴋsuk ivsornaitok.
26Tuperlo kigligiutjineᴋtalik mingoaraksarivat tâpsomunga, iklerviglo kigligiutjineᴋtalik,
27Sâlo perᴋutingillo, naneroaᴋarviglo perᴋutingillo, tunerguserviglo iserluanititsivik tipitsiariktomik,
28Tunerguserviglo tunergutinik ôtaksanik, perᴋutingillo ilûnnaita, ubvarviglo ikoggangalo.
29Ivsornaititaksarivatillo ivsornairmarirᴋovlugit: aktuijut tâpkoninga ivsornaituksauvut.
30Aronelo erningillo mingoaraksarivatit ivsornaitilugillo, kivgartorᴋovlugit uvamnut ajoᴋertuijônerme.
31Israêlikullo oᴋarvigijaksarivatit, oᴋarlutit: Tamadja orᴋsuk mingoarutiksak ivsornaitok uvamnut kinguvâpsigut.
32Kovijaujuksaungilak inub uvininganut, adsinganiglônêt sanajuksaungilase, akusimaninga adsigivlugo: ivsornaipok, ivsornaigijaksarivaselo.
33Nalliat akutsijok adsinganik, nallialônêt pititsijok tâpsoma ilanganik takorngartamut, avitaumariktuksauvok inôᴋatiminit.
34Nalekablo Mosese oᴋautivâ: Tigusigit ilingnut tipitsiariksautiksanik, Staktemik, Balsamiglo, Galbânumiglo, Wairauchemiglo ilaᴋangitomik: ilûnnatik oᴋumaitigijigêklutik:
35Tamakkoalo tipitsiariktoliorutigijaksarivatit, akusimavlutik tipigiksautelerijub ilisimaninga maliklugo, tarrêtsiarilugit, ilaᴋaratik ivsornailutiglo:
36Ilangalo serᴋalitsiaraksarivat, pitilugolo kigligiutjinît sânganut tuperme kigligiutjineᴋtalingme, naipitsivigijomajamne ilingnik: ivsornainerpârijaksarivase.
37Tipitsiariksautiksarlo sanajaksarijat pivlugo, adsinganik sanajuksaungilase ilipsingnut akkusimaninga itjuarlugo: Ivsornaigijaksarivat Nâlekamut.
38Nalliat taimailiortok adsinganik, naimajomavlugo, avitaumariktuksauvoᴋ inôᴋatiminit.
Currently Selected:
Exodus 30: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
