Exodus 21

Perᴋojat maligaksallo sunatuinait.

1Tamadja tagva maligaksat unertutigijaksarijatit tâpkonunga.

2Pisiniaruvit kivgamik angumik Ebrêereojomik, jârit 6it nâvlugit kivgartortuksauvoᴋ: 7inganele aulartuksauvok akilênane kivgaujungnairlune.

3Inutôvlune itilaukpat inutôvlune aulartuksauvok: aipaᴋalaukpalle, nuliangata aularᴋatigijaksarivâ.

4Angajoᴋângatale tunitjivigikpago nuliamik, tâmnalo ernertârpat panitârpallônêt, angajoᴋâb nuliak ᴋitorngangillo perᴋutiginiarpait, tâmnalo inutôvlune aulartuksauvok.

5Kivgarle nalonangitomik oᴋarpat: Angajoᴋâra aiparalo ᴋitorngakkalo ungagivakka: kivgaujungnairomangilanga:

6Angajoᴋângata tikititaksarivâ idluarsaijunut; tikititaksarivâlo upkoarmut, upkoablônêt napajuanut, angajoᴋângatalo siutinga puttoraksarivâ puttorutemut; tâmnalo kivgartoraksarivâ soraijuitomik.

7Inuble panine niorvgutigikpago anânaurᴋovlugo, tâmna anijuksaungilak sorlo angutit kivgat pingmata.

8Nâmaksititsilungipat angajoᴋâminik tigujiminik nangminerijomavlugo, tâpsoma utertitaksarivâ akimut: niorvgutiksarilugole inôᴋatigênut takorngartanut pitsartuneᴋartuksaungilak, uivêrilauramiuk.

9Ernerminulle aipaksautisimaguniuk, iliorvigijaksarivâ sorlo paninne iliorvigigamigit.

10Nuliarnigune tâpsoma sanilianik, mikitlijuksaungilaᴋ tâpsoma nerᴋiksanginik, annorâksanganiglo, nuliablo piksanginik.

11Tamakkoale pingasut piniarutigingigunigit tâpsomunga, tagva tâmna anijuksauvok ᴋelarudjartauvlune akkilênanelo.

12Anauniktok inungmik toᴋodlugo, tâmna toᴋotaksauvok.

13Inugle terliarsilungipat, Gûdible pitipago agganginut, tagva unertutitsomavagit ᴋemâviksariniartanganik.

14Inuble pijarellune saniline tikipago pingitsertorlune toᴋotsomavlugo, tâmna tigujaksarivat tunerguservimnit aglât, toᴋotauᴋovlugo.

15Anauniktok atâtaminik anânaminiglônêt, tâmna toᴋotaksaudlarpok.

16Tigliktorlo inungmik niorvgutigilugolo, ubvalo nagvârtaukpat aggangine, tâmna toᴋotaksaudlarpok.

17Oᴋarniluktorlo atâtaminik anânamimiglônêt, tâmna toᴋotaksaudlarpok.

18Angutillo ningautigunik, aipangatalo aipâ milorpago ujarangmut, tiglukpagolônêt, toᴋolungipat, inangavingminele nalangajuksaukpat:

19Makkimikpat anilunelo ajaupialijarlune, milornilauktok tâpsominga pidlaraksaungilaᴋ: kisianele akkilêjuksauvok taipsoma sulitailititauninganik, âᴋiktaumariktitaksarivâlo.

20Inuble kivgane angut arnarlônêt anaukpago ajaupiamut, tâmnalo toᴋokpat agganginut, pidlaraksaudlarpok.

21Kisianele ᴋuggujaukpat uvlormik atautsemik maggûngniglônêt, pidlaraksauniangilaᴋ; perᴋutigigamiuk.

22Inuit ningautigunik, arnarlo singaijok akᴋunarlugo, singainga pêrᴋovlugo, ᴋanoetomigle maliktoᴋartinago: pidlartaujuksauvok arnab uingata pijomajanga maliklugo; akkilêjuksauvorlo idluarsaijut nâmagijanganik.

23ᴋanoetomigle maliktoᴋarpat, tagva tunitjijuksauvotit inôtsemik inôtsemut,

24Ijemik ijemut, kigumik kigumut, aggangnik aggangnut, itiganik itiganut,

25Ônermik ônermut, ikkemiglo ikkemut, tiglûjarmiglo tiglûjarmut.

26Inublo kivgane angut kivganelônêt arnak tiglukpago ijingagut, ije aserorlugo; kivgaujungnaivlune aulartitaksarivâ ijine pivlugo.

27Tigluklugolônêt kivgane angut kivganelônêt arnak kigutairpago, kivgaujungnairlune aulartitaksarivâ kigutine pivlugo.

28Tuktuvaublo angut arnarlônêt nakjungmigarpago toᴋodlugo, tuktuvak milortaujuksauvok ujarᴋanut, nerᴋingale nerrijaksaungilak; tuktuvauble inua pidlaraksaungilak.

29Tuktuvagle nakjungmigarsôngolaukpat sivorngane, inualo ᴋaujititaulauᴋpat tamattominga, parngnanairsorlaungipagolo, tâmnale toᴋotsigune angumik arnarmiglônêt; tuktuvak taimna miloraksauvok ujarangnut, inualotauk toᴋotaujuksauvok.

30Kênaujanigle akilêrᴋojaugune tagva tunitjijuksauvok ilijivionermitut inôsine pisiarijomavlugo.

31Nakjungmigarsimamangât ernermiglônêt paningmiglônêt maligaksak tamanna maliklugo piniarviojuksauvok.

32Tuktuvaub kivgak angut kivgarlônêt arnak nakjungmigarpago, kivgab angajoᴋânga tunitjiviojuksauvok silberemik sêkeletut 30tut. (Sêkele atausek 50 censustut akkitutigingoarpok.)

33Inublo imektarvik angmarpago, inublônêt imektarvik poagijarpago, matunagolo, tagvungalo tuktuvak siuterᴋortojarlônêt nakkarpat;

34Imeᴋtarviub inuata akileraksarivâ, tunitjivlune kênaujanik taipkoa inuanut, ᴋigdlorlo pigijaksarivâ.

35Inuille naliata tuktuvangata asime tuktuvanga akᴋunarpago toᴋodlugo, tuktuvak ômajok niorvgutigijaksarivât, akingalo avilugo; ᴋigdlorlo avigaksarivâttauk.

36ᴋaujijaukpallônêt tuktuvak nakjungmigarsôngolaungmat sivorngane, inuatalo parngnanairsorlaungipago, tuktuvangmik tauksêjuksauvok tuktuvangmut; ᴋigdlorlo nangminerijaksarivâ.

Currently Selected:

Exodus 21: LIHB08

Highlight

Copy

Compare