Exodus 18
18
Jetrob tikininga Mosesemut. Jetrob atanertuininga.
1Jetro, ajoᴋertuijok Midiame, Mosesib sakkia, tusarame tamainik Gûdib piniarninginik Mosesemut inuᴋotiminullo Israêlikunut, Nâlekablo Israêlikut anitingmagit Egiptenemit;
2Jetrub, Mosesib sakiata, tiguvâ Zipora Mosesib nulianga, angerartitavininga,
3Ernîgiglo; (aipâ Gersomemik atelik, oᴋarmat: Tujormiangovunga nuname ilitarnangitome:
4Aipangalo Eliêseremik atelik, oᴋarmat: Atâtama Gûdingata ikajortima piulivânga Faraub saviksoanganit:)
5Jetrub, Mosesib sakiata, ernîgik nuliangalo ilagellugit, Mosese tikipât sunaᴋajuitome, tangmârporlo Gûdib ᴋakᴋangane:
6Oᴋarporlo Mosesemut: Uvanga, Jetro, sakit, tikipunga ilingnut nuliat ernîgiglo ilagellugit.
7Mosese anivok sakinne pagrearlugo, okᴋovlunelo kunikpâ; aperiutivuglo ᴋanoelingamangârmik; tupermullo iterpuk.
8Mosesiblo sakinne unipkautivâ tamainik Nâlekab piniarninginik Faraomut Egiptenemiunullo Israêlikut pivlugit, siorniornerniglo tamainik tikitigijamingnik apᴋosinerme, ᴋanorlo Nâlekab piulingmagit.
9Jetrolo ᴋuviasudlarpok ajungitulinek tamât pivlugo, Nâlekab piniarnerijanga Israêlikunut piulijanginut Egiptenemiut agganginit.
10Jetrolo oᴋarpok: ᴋujanarsile Nâlegak piulijigijase Egiptenemiut agganginit, Faraublo agganginit, inuit piulijigijangat Egiptenemiut agganginit.
11Mânna nalojungnairpunga Nâlegak anginersaungmat Gûdinit tamainit; pingijairᴋsârningine tâpsoma alliutivait.
12Jetrolo, Mosesib sakia, âtsivok ôtaksanik tunergutiksaniglo Gûdemut: Aronelo Israêliblo angajoᴋângit ᴋaivut Mosesib sakkia nerriᴋatigivlugo Gûdib sângane.
13ᴋaungmallo Mosese ingipok inuit idluarsaromavlugit: inuillo nangerput Mosesib avatâne uvlârmit unnungmut.
14Mosesiblo sakia takonârmat tamainik piniarninginik inungnut, oᴋarpok: Sunauvâ tamanna piniarnerijat inuit pivlugit? Sugavit iksivavêt inutôvlutit, inuillo ilûnnatik nangerdlutik avatingne uvlârmit unungmut?
15Mosesiblo sakinne oᴋautiva: Inuit unneᴋsiorvigingmanga unertutijaujomavlutik Gûdemik:
16Anârtûtiksaᴋarpata uvamnôrput, idluarsaivungalo inungmik inôᴋatiminiglo, ajoᴋertorpakkalo Gûdib maligaksaurᴋojanginik perᴋojanginiglo.
17Mosesiblo sakiata oᴋautivâ: Iliornît tamanna nâmalungilak.
18Sujudlamarilârpotit, igvillo inuillo ukkoa ilagijatit; tamanna oᴋumailuarpok ilingnut; inutôvlutit tamanna suliarijungnangilat.
19Nipiga tusaruk mânna, ajoᴋertoromavagit, Gûdiblo ilagijomavâtit: Igvit inuit pivlugit sakᴋijârit Gûdib sângane, âtsijungnarᴋovlutit sujuksautigijanginik Gûdemut:
20Ajoᴋertoraksarivatillo maligaksaurᴋojaujunik perᴋojaniglo, unertûtijaksarivatillo apᴋomik arvertarvigijaksarijanginik, piniarnerniglo piniaraksarijanginik.
21Taimagletauk inuit ilûnnatik akornganit ᴋenertuksauvotit angutinik ᴋaᴋiarnaitunik, Gûdemik sivôrajunik, angutinik nalâgôrtunik, pijomatudlarnermik omisuktunik; angajoᴋângortilugillo tâpkonunga, angajoᴋautilugit 1,000nut, angajoᴋautilugit 100nut, angajoᴋautilugit 50nut, angajoᴋautilugillo 10nut.
22Tâpkoalo idluarsailit inungnik naliutune tamaine: imailingalârporlo, pijariaᴋortojut tamaita âlârpait ilingnut, pijariakitulle tamaita tâpkoa idluarsaijutigilârpait: taimâk oᴋinersauniarpok ilingnut, tâpkoalo nangmarᴋatiginiarpatit.
23Taimailioruvit, Gûdiblo perᴋopatit, piganerungnalârpotit, inuillo tamakkoa ilûnnatik angerarungnalârput ulapirᴋsauteᴋarlutik.
24Mosesiblo sakimme nipinga nâlakpâ, piniarlunelo tamainik oᴋautigijanginik.
25Mosesiblo angutit ᴋaᴋiarnaitut ᴋenerpait Israêlikunit tamainit, aulatsijungortipaillo inungnut, angajoᴋautilugit 1,000nut, angajoᴋautilugit 100nut, angajoᴋautilugit 50nut, angajoᴋautilugillo 10nut.
26Tâpkoalo inuit idluarsarpait naliutune tamaine: oᴋumaitut âpait Mosesemut, pijariakitulle tamaita nangminek idluarsaijutigivait.
27Mosesiblo sakinne aulartipâ; tâmnalo angerarpok nunaminut.
Currently Selected:
Exodus 18: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
