II Korintemiunut 5
5
Paulusib nerriungninga nâksaungitomik pinnarnartomik. Kajungertitauninga Kristûsib naglingninganut.
1ᴋaujimavogulle, igluvut (timivut) nuname atortoᴋ asserorpat, igloᴋarapta Gûdemut igloliangomajomik, iglomik aggangnu-ungitoᴋ senamajomik, nâksaungitomik ᴋilangme.
2Tamannatauᴋ anersaumitigivavut kajungilârluta ulliktaujomavluta igluksaptingnut ᴋilangmit pijomut.
3Naipitaujomârupta annorârsimavluta, ussingalugata (timeᴋarluta).
4Uvagut iglomêtogut (timemêtogut) anersaumigapta, oᴋumaidluta; annorairomanginapta, ᴋalinetâromavlutale pivogut, toᴋojuksaᴋ êjauᴋovlugo ômanartomut.
5Uvaptingnigle taimailertitsjoᴋ tagva Gûde; tâpsomalo Anernermik nelunaikutaksaptingnik tunitsivigivâtigut.
6Taimaimat sivôrangitsainarpogut, ᴋaujimavlutalo, Nâlekamit apsimagapta timemêtiluta.
7Okpernerme arvertarapta, takolugatalo.
8Sivôrangilagulle; timelo ᴋemaklugo angergarneᴋ Nâlekamut ᴋuviaginersarivavut.
9Taimaimat najoruptigolônêt avisimaguptigolônêt, ilinganasuarpogut tâpsomunga ᴋuviagijaujomavluta.
10Ilûnata saᴋᴋijartuksaugapta Kristûsib erᴋartuiviksangata sângane, ilûnata atunit akkiniartaulerᴋovluta iliorniptingnik timeme inôtiluta, ajungitomiglônêt ajortomiglônêt.
11Nâlegak tagva nâlektaujariaᴋartoᴋ ᴋaujimagaptigo inuit okpertinasuarpavut, ᴋaujijauvogulle Gûdemut. Nerriukpungale ᴋaujijaugaptatauᴋ issumapsingnut.
12Ama nertorᴋonata uvaptingnik ilipsingne, nertordlerutiksaᴋartipapsele pivluta, akkiniarutiksaᴋarᴋovluse nertôtijunut ᴋalinermikut ajungitôjârtunik, ômatib pigingitanginik.
13Pinialuadlaruptale, tamattominga Gûde pivlugo pivogut; nâmatuinartuligupta, tamattominga pivluse pivogut.
14Kristûsib naglingningata taimâk kajungertingmatigut. Issumaᴋarapta imâk: Atauseᴋ tamaita pivlugit toᴋungmat, ilûnatiktagva toᴋovut.
15Tâpsomalo tamaita toᴋotigivait, inôjut kingorngane nangminermingnut inôniaᴋonagit, tâpsomungale pivlugit toᴋolauᴋtomut makisimangmijômullo.
16Mânamit tagva kinamik illitarsingilagut uviningmit; Kristûse illitarilauralloaraptigo uviningme, mâna taimâk illitarijungnairpavut.
17Taimaimat, Kristûsemêtoᴋarpat, tâmna nutângortitauvoᴋ; pitoᴋaᴋ itsungnairpoᴋ, ilûnane nutângorsimavoᴋ.
18Tamaitale tamakkoa Gûdemit pivut, tâpsoma ullapirsarmatigut ingminut Jêsuse Kristûsikut, kivgartornermiglo pitiluta ulapirsainartomik oᴋâlaᴋojijomik.
19Gûdib Kristûsemêdlune silaᴋsûb inungit ulapirsarmagit ingminut, ajorninginit issumagijungnaivigilugit, ulapirsainartomiglo ilumertiluta oᴋâlaᴋovâtigut.
20Taimaimat tilijaumajôvogut Kristûse simerdlugo, Gûdib uvaptigut kaiblarmase, tagva ᴋenuvogut mâna Kristûse simerdlugo: Gûdemut ulapirsartauleritsetôᴋ.
21Ajortomik ᴋaujimangitoᴋ ajortungortilaungmago pivluta; uvagut tâpsomane idluartungortitauᴋovluta Gûdib sângane nâmagijaujomik.
Currently Selected:
II Korintemiunut 5: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
