II Korintemiunut 4
4
Paulusib manigorninganik kappianartome.
1Taimaimat, taimaitomik kivgartôteᴋarapta, nâpkoarijaunivut maliklugo merngortorniangilagut;
2ᴋangunartunigle ijersimajunik ulloreasukpogut, nelangaitomiglo iluseᴋangilagut, Gûdiblo oᴋausingit asserᴋotsitingilavut; mikseᴋârnermigle saᴋᴋertitsiluta perᴋovogut uvaptingnik inuit ilûnatik erᴋarsautinginut Gûdîb sângane.
3Oᴋautsinik tussarnertunik oᴋâlanivut mattumakpatta, mattumavut tagva assioniartune:
4Silaᴋsûb tamattoma Gûdingata okpingitut taipkoa issumangît takpêtilauᴋpait, oᴋautsit tussarnertut Kristûsemik, Gûdib adsingata pinnarnarninganik, ᴋaumaningat ᴋaumaᴋonago taipkonunga.
5Nangminek uvaptingnik oᴋâlanginapta, Jêsuse Kristûsele (oᴋautigivavut) Nâlegaujoᴋ, uvagulle kivgaujogut ilipsingnut Jêsuse pivlugô.
6Gûdele, ᴋaumajomik nuerᴋojijoᴋ tâᴋtomit, ômatiptingne ᴋaumarsaivoᴋ, uvaptigut nellonarungnaititauᴋovlugo illitarsineᴋ Gûdib pinnarnarninganik Jêsusib Kristûsib sângane.
7Pivianartovaksoarle tamanna pigivavut illuleᴋutine machainarne, pitsartunersoaᴋ Gûdemit perᴋovlugo, nangminiptingnillo pinane.
8Ilûnâne kappiasuktitauvogut, sivôranatale; sivôragalloarpogut mungunganatele.
9Unangmijauvogut, ᴋemaktaunatale; ochotitauvogut, nungutaunatale.
10Nâlekablo Jêsusib toᴋâtauninganik timimiutaᴋatsainarpogut, Jêsusib ômarningatauᴋ saᴋᴋijârᴋovlugo timiptingne.
11Uvagulle inôjogut toᴋomut pititautsainarpogut Jêsuse pivlugo, Jêsusib ômarningatauᴋ saᴋᴋijârᴋovlugo uviniptingne toᴋojuksame.
12Toᴋo tagva pitsartudlarpoᴋ iluptingne, ômarnerle ilupsingne.
13Anernermigle taipsominga okpertitsijomik peᴋarapta, aglait maliklugit: “Okperama oᴋâlavunga”; uvaguttauᴋ okperapta, oᴋâlagivogut; #Img. 116:10.
14Nelunginapta, Nâlekamik Jêsusemik tupaktitsijûb uvaguttauᴋ tupaktitsomârivâtigut Jêsusikut, saᴋᴋertitsomârpâtigullo ilipse illagiluse.
15Tamaita taimaidlarmatta ilipse pivluse, saimanersoaᴋ unuktut ᴋujalininginut angidlarᴋovlugo, Gûde angijomik nertortauᴋovlugo.
16Taimaimat merngortorniangilagut, inuptale ᴋalininga asseroralloarpallônêt, ilumêtorle uvlut tamaita nutângortitaulerpoᴋ.
17Kappiasungnipta mâne oᴋidlutik mânakut anigortut, piksarsiormatigut pinnarnartoᴋsoarmik neleᴋangitomik nâksaungitomik;
18Uvagut, takuksaujunik pingitogut, takuksaungitunigle. Takuksaujut nâksaungmatta; takuksaungitulle naggateᴋangilat.
Currently Selected:
II Korintemiunut 4: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
