I Korintemiunut 7
7
Nuliarêngnek pivlugo Paulusib kioninganik.
1Aglalauktasele uvamnut pivlugit kiovunga: Idluarpok inungmut, arnamik aktuingikune.
2Assiniarnerle pitjutigilugo angut nangminerijaminik nuliaᴋarle, arnarlo nangminerijaminik ueᴋarle.
3Angutib nuliane ilanersârvigiliuk, arnatauk uine taimailiorvigiliuk.
4Uilik timiminut ataniungilak, uingale; taimâktauk nulialik timiminut ataniunginivok, nuliangale.
5Avisârtoᴋarniarane aiparminit; kissiane tamaptik sivikitomik pijomavlutik issumaᴋaᴋatigêkuptik, nerritailinermut tuksiarnermullo piviksaᴋarᴋovlutik; ama katingmigitik, Sâtanasemut ôktorluktaukonatik, ikliguktailinek ajorapsiuk.
6Tamannale naglingnermut oᴋautigijara, perᴋojautilugo pinanga.
7Inuille tamaita uvaptun-erᴋojomagalloartakka; ilûnatigle ingmigôlingajomik tunitjiviovut Gûdemut, ilangat imâk, ilangat taimâk.
8Aipaᴋangitulle uigarnerillo imâk oᴋaupakka: Uvaptunikunik, nâmagajarpok tâpkonunga.
9Aipaᴋanginerle ajorunitsuk, aipatârlît; aipaᴋarnek idluarnersaungmat, ikligudlarnermit.
10Nuliarêlle uvangaungitub, Nâlekable peᴋovait, uilik uiminik ᴋemaiᴋonago.
11ᴋemakuniugle uitârtuksaungilak, uinelônêt saimarsarlugo piliuk. Angutiblo nuliane avitaksaringilâ.
12Assingille uvanga oᴋaupakka Nâlegaungitub: Okpertok okpingitomik nuliaᴋarune, taipsomalo najuênaromakpago, avitaksaringilâ.
13Arnaktauk okpingitomik ueᴋarune, taipsomalo najuênaromakpago, avitaksaringilâ.
14Okpingitok angut nuliaminut ivjornailingmat, arnaktauk okpingitok uiminut ivjornailivok. Taimaingipat, ᴋitorngase ivjornarajarput; mânale ivjornaiput.
15Okpingitorle avitsomagune, avile! Okpertok angullônêt, arnarlônêt, taimaitoᴋarpat, ᴋelaksorsimangilak. Ulapirsauteᴋarᴋovlutale Gûdib ᴋaiᴋolaukpâtigut.
16Igville arnak, ômât, uit piuliniarmangângne, ᴋanoᴋ ᴋaujimavît? Igvillônêt angut, nuliat piuliniarmangângne, ᴋanok ᴋaujimavît?
17Ilûnatigle atunit inôniarlît, sorlo Gûdib ilingatilaungmagit, sorlolo Nâlekab atunit ᴋaiᴋolaungmagit. Tamattominga ilagêne ilûnaine perᴋojivunga.
18Kipimavlune ᴋaiᴋojaumajub kipimanek maligaksarivâ. Kipimaluganelo ᴋaiᴋojaumajok kipijauniarane.
19Kipimanek atungilak, kipimanginerlo atunginivok; Gûdible perᴋojangit nâlektaukariaᴋarput.
20Inugle ᴋanok ilingalaungmangât ᴋaiᴋojautilugo, taimaitsainarle!
21Kivgautilutit ᴋaiᴋojaumaguvit, tamanna issumajârutiginago pît; kivgaujungnairungnaruville, taimaingârit.
22Kivgautilugo ᴋaiᴋojaumajok Nâlekame, tâmna Nâlekab kivgaujungnaitipâ; taimâktauk kivgautinago ᴋaiᴋojaumajok Kristûsib kivgarivâ.
23Akkitudlartomik pisiangovose; kivgauniarase inungnut.
24Ilûnase ᴋatangutikka, atunit, ᴋanok ilingalaungmangâpselônêt ᴋaiᴋojautiluse, taimaidluse Gûdemêtuaritse.
25Uigasuille pivlugit perᴋojaᴋsilaungilanga Nâlekamit; issumagale anipara, Nâlekamut nâpkigijaulaurama, nelâgôrᴋovlunga.
26Mâna tagva idluarasugivara, neliutub tamattoma kappianarninga pivlugo, inungmut idluarmat, taimailingatuinarpat (aipaᴋarane).
27Nuliamut ᴋelaksorsimaguvit, ᴋelarutjârasuarniarnak! Nuliaᴋangikuville, nuliaksarsiorniarnak!
28Nulianikkuville, idluitulingilatit; uigasuglo uinikkune, idluitulinginivok. Taimaitulle timikut kappianarneᴋarniarput. Taimaitaukojomangigalloarpapse.
29Mattomingale oᴋautjivunga, ᴋatangutikka, neliutok sivikipok. Ama imâk issumaga: Nulialit nuliaᴋangitutitunilerlît; ᴋeajullo ᴋeangitutitut;
30ᴋuviasuktullo ᴋuviasungitutitut; pisiniartullo perᴋuteᴋangitutitut;
31Silaksûblo mattoma pinginik atortut, atornerlungniarnagit; silaksûb tamattoma ilinganinga nungujomârmat.
32Issumagivapsele issumajârᴋojomanase. Aipaᴋangitub Nâlekab pingit issumagivait, Nâlekab idluarijanganut ilingajomavlune.
33Aipaliuble nunab pingit issumagivait, nuliaminut idluarijaujomavlune.
34Uilillo uigasuillo adsigêngilat. Ueᴋangitub Nâlekab pingit issumagivait, ivjornaitsomavlune timimigullo anernermigullo. Uiliuble nunab pingit issumagivait, idluarijaujomavlune uiminut.
35Tamattomingale oᴋarpunga, ilipsingnut idluarmat; napperomavluse pinanga, kissianele idluarᴋutaungmat, Nâlegarlo kivgartutsainarlugo ulapitaukonase.
36Ilapsele ilangata idluarasugingikuniuk paningme ueᴋangininga, inumariotsiartilugo, taimâglo pijariaᴋarᴋôrpat, issumaminik pile; idluitulingilak; taimaitut uiniglît.
37Kinale ômamigut kajusimagune, (agviaruteᴋarane issumaminik piniarungnarame); ômamine issumasimagune (panine) uigasuk aipaitôᴋovlugo, idluartomik pivok.
38Taimâk uiniktitsijok idluartomik pivok; uiniktitsingitorle idluarnersamik pivok.
39Arnab perᴋojat nâlengniariaᴋarpait, uine inôtilugo; uingale toᴋokpat, issumaminik pituinariaᴋarpok uiniklune pijomajaminik kissianele Nâlekame piniartuksauvok.
40Piloringnersaujorle, taimailingatuinarpat (aipaᴋarane,) issumaga maliklugo. Uvangaletauk Gûdib Anerninganik peᴋarasugivunga.
Currently Selected:
I Korintemiunut 7: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
