I Korintemiunut 15
15
Kristûsib makininganik. Timiptalo makiningata ilinganinganik.
1Erᴋaitipapsele, ᴋatangutikka oᴋautsinik tussarnertunik, oᴋâlatigilauktamnik ilipsingnut; tâpkoa ilaliulaurapsigiktauk tungavigigapsigiglo.
2Tâpkonunga piulijauniarapsetauk, sorlo oᴋâlatigilaurapkit ilipsingnut; issumamiutarigupsigiglônêt; sulinase okperilaungikupsigik.
3Nangminektauk tunergusiarilauktakka ilipsingnut oᴋautigilaukpakka, sivorliudlugit makkoa: Kristûse ajornivut pivlugit toᴋolaungmat, aglait maliklugit.
4Ilijartortaungmallo, uvluglo pingajuangne makisimangmat, aglait maliklugit.
5Takojaungmallo Kêfasemut, kingorngagut 12 inut.
6Ama kingorngagut takojaulaukpok atautsikut ᴋatangutigênut 500 it unorᴋejanginut; sulle mâna unuktut tâpkonangat inôvut, ilangille sinisimanerput.
7Ama takojaulaukpok Jâkobusemut, kingorngagut Apostelinut ilûnainut.
8Ilûnainit kingorlerpângovlunga uvangatauk takolaukpara, erniangojotut innersimangitotut-idlunga.
9Uvanga mingnerôvunga Apostelinit; nelopᴋotijunga taijaunermik Apostelemik; Gûdib ilagêktoᴋotingit unangmilaurapkit.
10Gûdible saimarsaininganut ilinganera taimaipok; saimarsautâlo uvamnut pijok sulinane pimangilak, uvangale taipkonangat tamainit piniarnersaulaukpunga; uvangale pingitunga, Gûdible saimarsainingata ilagingmanga.
11Tagva uvangalônêt taipkoalônêt, taimâk oᴋâlavogut, taimaglo okpilaukpose.
12Kristûsele toᴋungajunit makisimajok oᴋautigijaungmat, ᴋanok tagva illapse ilangit oᴋauseᴋarᴋât, makinek toᴋungajunit sunaungimât?
13Makinerle toᴋungajunit sunaungipat, Kristûsetauk makisimangilak.
14Kristûsele makisimangipat, oᴋâlanivut sulingilak, okpernisetauk sulinginivok.
15Uvagullo naipitaunajarpogut kigligiutsijutitut nelangaitutitut Gûdemik; tâmna Kristûsemik tupaktitsijok oᴋautigigaptigo, tupaktinajalaungitanganik, toᴋungajut makiviksaᴋangipatta.
16Toᴋungajut makiviksaᴋangipatta, Kristûsetauk makisimanginivok.
17Kristûsele makisimangipat, okpernise sunaungilak, suilelo ajornipsingnêpose.
18Taimâktauk assiomavut Kristûseme sinisimajut.
19Mâne kisiane inôtiluta Kristûse neriugilauruptigo, inungnit tamainit ajulernerpângovogut.
20Mânale Kristûse toᴋungajunit makisimavok, sivorlerpângovorlo sinisimajut akornganit.
21Inungmut atautsemut toᴋo pingmat, inungmullo atautsemut makiviksak toᴋungajunit pivok.
22Sorlo ilûnatik Adameme toᴋolermatta, taimâk Krîstuseme ilûnnatik ômartitaujomârput.
23Ilûnnatigle tuglerêtsiartuksaunitik maliklugo. Sivorliotijok Kristûse; kingorngagut Kristûsib inuᴋotingit, tikitsomârpat.
24Tamattoma kingorngagut naggatiksak, nâlegauvik pititsomârpago Gûdemut Atâtamut nâlegaunerillo, ataniotinerillo pitsartunerillo tamaita atorungnairᴋojomârunigit.
25Ataniotijariaᴋarporle, ômigijiminik ilûnnainik ilijerᴋârane itikame atânnut.
26Omisuktut kingorlerpângat pêjartaujomârtok tagva toᴋo.
27Tamaitaksuit ililaungmagit itigangita atânut. Tamaitaksuillo nâlektitaujut (tâpsomunga) oᴋautigingmagit, nalonangilak, tâpsomunga tamainik nâlektitsijok, tâmna pijaungilak.#Img. 8:7.
28Tamaitale nâlegarilerpatsuk, tagva Ernerubtauk nangminek nâlegarijomârpâ nâlektitsijok tamainik tâpsomunga, Gûde kissime pitôᴋovlugo tamaine.
29Toᴋungajut makitsomângipatta, ᴋanok sulinajarᴋât baptitaulertut toᴋungajut pivlugît? Sôk baptitaujomavât toᴋungajut pivlugît?
30Sôklo uvagut nangianartomêtsainarᴋitâ?
31Sorlo nalâgut nertornautigigapse Kristûseme Jêsuseme Nâlekame, uvlut tamaita toᴋolertotun-ipunga.
32Inuktut iluseᴋarlunga, nergjutit nujuartut pâlaurapkit Efêsuseme, tamanna suksarinajarpigô, toᴋungajut makitsomângipattâ? “Nerrilerta imilutalo, ᴋaupat toᴋoniarapta.” #Jes. 22:13.
33Uivêrijauniarase. Oᴋausilungnerub asserortipait ilusit ajungitut.
34Tupatsialerluselo idluituliniarase; ilangit Gûdemik tukkisineᴋangimatta; kangusuᴋovluse taimâk oᴋarpunga.
35Oᴋartoᴋarajarpalle: ᴋanok toᴋungajut makitsomârᴋât? ᴋanorlo ilingajomik timeᴋarlutik sakᴋeromârᴋât?
36Silaidlartotit, karngarsortat ômarniangilak, toᴋogune kissiane.
37Karngarsortallo ilâ timeungilak pijomârtuksak; karngasûtetuinauvorle, sanaugaksarlônêt assialônêt.
38Gûdible timeᴋartipâ issumaminik karngasûtillo ilûnaita ingmikut timiksaᴋartipait.
39Uvinît ilûnatik adsigêngilat: inuit assianik uvineᴋarput, nergjutillo assianik, mingeritjattauk assianik tingmitjattauk assianik.
40Timeᴋarpok ᴋilangme, timeᴋarivok nuname. ᴋilangmêtut pinnarnarnekarput assianik nunamêtullo assianik.
41Seᴋinek ᴋaumaneᴋarpok assianik, taᴋkek ᴋaumaneᴋarpok assianik, uvloritjat ᴋaumaneᴋarput assianik; uvloritjat ilangit ilamingnit ᴋaumanersaungmatta.
42Taimaitsomârivoᴋtauk toᴋungajut makitsomârningat. Asseroraksak ilijaulerpok, asserojuitorlo makitsomârpok.
43Pinnarnaidlartok ilijaulerpok, ânanaulunelo makitsomârpok. Ajulertok ilijaulerpok, pitsartudlarlunelo makitsomârpok.
44Time uvinilik ilijaulerpok, makitsomârporlo time anernilik. Sorlo timeᴋarmat uvinilingmik, taimâktauk timeᴋarivoᴋ anernilingmik.
45Sorlo aglaksimangmat: Inuk sivorlerpâk Adame pingortitaulaukpok timeᴋardlune ômajomik tarnilingmik (uvinilingmik); Adamelo kingorlek anerneliotitauvok ômartitsijomik. #Gen. 2:7.
46Timele anernilik sivorliungilak; uviniligle, kingorngagut anernilik.
47Inuk sivorlek ivjomit pivok, uviniliovlune. Inûble aipanga Nâlegauvok ᴋilangmit pijok.
48Uviniliub ilinganingatut, taimainivuttauk ᴋilangmêtut.
49Sorlo uvinilik adsigilauraptigo, taimâktauk adsigijomârivavut ᴋilangmêtub ilinganinga.
50Mattomingale oᴋautjigivunga ᴋatangutikka, uvingub aublo Gûdib nâlegauvinga kingormgutijungnangilâk; asseroraksablo asserojuitok kingormgutinianginivâ.
51Ahâk, nalonartomik oᴋautivapse: Ilûnata siningniangilagut, ilûnatale ablatsângortitaujomârpogut.
52Tagvainak ijib sikkungilarningane tiptulautib kingorliksab naliuningane. Tiptulaut nipleromârmat; toᴋungajullo makitsomârput asserojuilutik, uvagullo ablatsângortitaujomârpogut.
53Asseroraksak tamanna asserojuitomik atiniariaᴋarmat, toᴋojuksarlo tamanna toᴋosuitomik atiniariaᴋarivok.
54Asseroraksarle tamanna atiniarpat asserojuitomik toᴋojuksarlo tamanna atiniarpat toᴋosuitomik tagva nalautsiniarput oᴋautsit aglaksimajut:
55Toᴋo êjauvok sâlaᴋarnermut. Toᴋo, kapputit naûk? Kappianartovik, sâlaᴋarnît naûk? #Jes. 25:8; Hos. 13:14.
56Toᴋuble kapputâ tagva ajornek, ajorneruble pitsartuninga tagva perᴋojak.
57Gûde ᴋujagidlartaule, sâlaᴋartimattigut Nâlegaptigut Jêsuse Kristûsikut.
58Taimaimat nagliktakka ᴋatangutikka, Nâlekab piniarᴋojanginik pivalliatsainaritse, sôngoluse soᴋᴋosijuititse! Nalunginapse, piniarnise Nâlekame sulinase pinginapsigik.
Currently Selected:
I Korintemiunut 15: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
