I Korintemiunut 14
14
Nelautainerub ᴋanok atortaujuksauninganik.
1Naglingnek pinasuarsiuk. Tunergusiat, Anernerub pingit tussugisigik, tukkeᴋartitsinerle piluardlugo.
2Oᴋautsit tussarngartat atorlugit oᴋâlajok inungnut oᴋâlangimat Gûdemulle; tukkisijaujungnangimat kimut, anernikulle nelonartut oᴋautigivait.
3Tukkeᴋartitsilunele oᴋâlajok inungnut oᴋâlavok, idluarsarlugit, ᴋaiblarlugillo nekoksitilugillo.
4Oᴋautsit tussarngartat atorlugit oᴋâlajok nangminek idluarsivok; tukkeᴋartitsilunele oᴋâlajub illagêt idluarsitipait.
5Oᴋautsit tussarngartat atorlugit oᴋâlajungnarᴋogalloarpapse ilûnase, anginersamigle tukkerᴋartitsiluse oᴋâlaᴋovapse. Tukkeᴋartitsilune oᴋâlajok anginersaungmat oᴋâlajomit oᴋautsit tussarngartat atorlugit; tâmna (mikinersaulungilak) kissiane tukkeᴋartitsiᴋassiutjigune, illagêt tamakkonunga idluarsartauᴋovlugit.
6Tagvale ᴋatangutikka, oᴋâlajartoruma ilipsingnut, oᴋautsit tussarngartat atorlugit, suksaunajarᴋîk ilipsingnut, oᴋâlavigingikupse, sakᴋijâtsiartullônêt, illisimanartullônêt, tukkeᴋartitsinerlônêt, ajoᴋertûserlônêt atorlugît?
7Sorlotauk ômajôngitut nipliajôrutit, nipjautaungmangâllônêt, harfeongmangâllônêt, ingmikôrtomik errinaᴋangipatta, ᴋanok ᴋaujimanarᴋâ, suna nipjausijautaungmangât, harfesijautaungmangâllônêt.
8Tiptulautiblo nippinga nelonarpat, kina oppalungainajarᴋâ sorsungniarnermût?
9Taimâktauk ilipse oᴋautsit tussarngartat atorlugit oᴋarupse, tukkisijaujungnangitunik oᴋauseᴋarluse, ᴋanok tagva ᴋaujijaujungnarᴋâ, suna oᴋautaungmangât? Maungatuinak oᴋâlaniarapse.
10Oᴋautsit sunatuinaugalloarput silaksoarme, atautsillônêlle tukkeᴋangitoᴋangilat.
11Nippible tukkinga tussângikupko, oᴋâlajomut tukkisinarniangilanga; tâmnatauk oᴋâlajok tukkisinarniangilak uvamnut.
12Taimâktauk ilipse, Anernerub tunergutingit pinasuarvikkapsigik, anginerpângojomigle illagêt idluarsitiksanginik pinasuaritse, tamainik peᴋaluarᴋovluse.
13Taimaimat, oᴋautsit tussarngartat atorlugit oᴋâlajok tuksiarle, oᴋautsine nelonarungnaititsomavlugittauk.
14Oᴋautsit tussarngartat atorlugit tuksiaruma, anernipkut tuksiaralloarpunga, issumagijakkale atornangilat kimullônêt.
15ᴋanorle tamanna ilingajuksauvâ? Imâgle: Tuksiaromavunga anernikut, tukkisinartomiglo tuksiaromavunga; nertordlerutiksanik imgeromavunga anernikut, tukkisinartuniktauk nertordlerutiksanik imgeromavunga.
16Saimartitsiguville anernikut, ᴋanok illisimangitok tagvanêtok Amenemik oᴋarungnarᴋâ ᴋujalitiksatit pitjutigilugit, oᴋautsitit tukkisinginamigît?
17Igvit ᴋujalitsiaralloarpotit, assingnulle idluarsititaujutiksaungilak.
18Gûdiga ᴋujagivara, oᴋautsit tussarngartat atorlugit oᴋâlanersaugama ilûnapsingnit.
19Ilagênele oᴋâlavlunga oᴋautsit tallimainait tukkisinartut atorlugit, assikka ajoᴋertoromavlugit, tamanna idluarinersarivara oᴋautsinit ten tausendinit tussarngartanit.
20ᴋatangutikka, sorutsititut silatuneᴋarniarase; ajortomulle nutakᴋatitun-ititse, inersimajutitulle silatuneᴋaritse.
21Perᴋojane aglaksimavok: Inungnut ukkununga oᴋâlajomavunga oᴋautsinut tussarngartanut, takorngartallo ᴋaninginut; taimailioralloarumale, nâlengniangilânga. #Jes. 28:11,12.
22Taimaimat oᴋautsit tussarngartat nalunaikutauvut okpertunu-ungitok, okpingitunulle; tukkeᴋartitsinerle okpingitunu-ungitok, okpertunulle.
23Ilagêt iluengarlutik atautsime katimalerunik ilûnatiglo oᴋautsit tussarngartat atorlugit oᴋâlakpatta; ilisimangitullo okpingitullônêt iterunik, tâpkonunga ilisimainerartaunajangilasê?
24Ilûnatigle tukkeᴋartitsilutik oᴋâlakpatta, okpingitorlo ilisimangitorlônêt iterune, ilûnainut tagva inertertaulerpok erᴋartortaulerlunelo ilûnainut.
25Taimaglo ômatingane ijersimajut sakᴋerajarput; pâmakterlunelo Gûde tuksiarviginajarivâ, kigligiutsinajarporlo Gûdemik nalâgut ilipsingnêtomik.
26ᴋanok tamanna ilingavâ, ᴋatangutikkâ? Katimalerangapse, ilûnase nelise imgerutiksaᴋarpok, ajoᴋertuitiksaᴋarpok, oᴋautsinut tussarngartanut oᴋalavok, sakᴋerviomajutiksaᴋarpok, nalonarungnaititsijutiksaᴋarpok. Tamakkoa tamaita ilingatitaulit âᴋiktaujutiksamut.
27Oᴋâlajoᴋarpat oᴋautsit tussarngartat atorlugit, Maggûglônêt pingasunillônêt ununersaungitut Nelliᴋârlutik pilît, atautsible nalonarungnaitiligit.
28Nalonarungnaititsijoᴋangipalle, ilagêktune (imna) nippangerle; ingminulle Gûdemullo oᴋarle.
29Tukkeᴋartitsijulle maggûglônêt pingasullônêt oᴋâlalit, assingillo kiglisiniarlit.
30Tagvanele iksivajut ilangat sakᴋerviomajutiksaᴋarpat, sivorlek nippangerle.
31Ilûnase tukkeᴋartitsiluse oᴋâlatuinariaᴋarpose Nalliᴋârluse, ilûnatik ilinniarᴋovlugit, ilûnaitalo ᴋaiblartauᴋovlugit.
32Nalautaijulle (tukkeᴋartitsijut) anerningita nelautaijut (assitik) nâlegarivait.
33Gûde idluangitomik perᴋojitsangimat, ulapirsaumigle, sorlo illagêktune ivjornaitune ilûnâne.
34Arnase nippangerlit katimavingme; oᴋâlanermik perᴋojautsangimatta, nâlektuksautuinarlutigle, sorlo perᴋojattauk oᴋarmatta.
35Sumigle ilinniaromagunik, uitik aperilitigik iglomingne. Oᴋâlanek katimavingme idluangimat arnanut.
36Ilipsingnillônêt Gûdib oᴋausingit pimavât? Ilipsingnullônêt kissipsingnut pititaumavât?
37Nelautaijônasugijoᴋarpat, anernelionasugijokarpallônêt, tâmna ᴋaujilerle, aglaktakka ilipsingnut Nâlekab perᴋojaringmagit.
38ᴋaujimangitoᴋarpalle, tâmna ᴋaujimangilerle.
39Taimaimat ᴋatangutikka, tukkeᴋartitsinermik pinasuaritse, Oᴋautsinullo tussarngartanut oᴋâlajut inerterniarasigik.
40Ilusitsiarikluselo, idluarsainiaritse tamainik.
Currently Selected:
I Korintemiunut 14: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
