I Korintemiunut 12
12
Anernerub tunergutinginik adsigêngitunik.
1ᴋatangutikkale, neloᴋojomangilapse tunergutinik Anernerub pinginik.
2Nalungilase, nalojoᴋsôlaurapse, ailaurapselo Gûdingoanut oᴋajuitunut, sorlo tessiortaulaurapse.
3Taimaimat ᴋaujitipapse Gûdib Anerningagut oᴋâlajub Jêsuse oᴋarnerlôtigitsangilâ; neliatalônêt Jêsuse Nâlekamik taijungnangilâ, Anernerub ajunginerub pitingipago.
4Tunergutit sunatuinauvut, Anernerle tâmnautsainarpok.
5Kivgartûtillo sunatuinauvut, Nâlegarle tâmnautsainarpok.
6Pitsartunerillo sunatuinauvut, Gûdele tâmnautsainarpok, tamainik piniartitsijok tamaine.
7Ilûnainelo Anernerub tunergutingit sakᴋerput assingita idluarᴋutiksanginut.
8Ilangat illisimanartunik oᴋauseᴋarlune tunitjiviovoᴋ Anernermut; ilangalle ilitarsinermik oᴋauseᴋarlune, Anernermut tapsomungainak.
9Ilangallo okpernermik (tunitjiviovok) Anernermut tâpsomungainak, ilangallo tunergumik inûliklernermut, Anernermut tâpsomungainak.
10Ilangallo tatamnartulinermik; ilangallo nelautainermik oᴋâlavlune; ilangallo illitarsivlune anernernik; ilangallo oᴋautsinut tussarngartanut oᴋâlavlune; ilangallo oᴋautsit tussarngartat nelonairlugit.
11Tamakkoale tamaita Anernerub tâpsoma atausetôjub piniarpait, issumaminiglo ilûnaita atunit ilangiutitipait nangminerijaksanginik.
12Sorlo time atausiojok unuktunik avateᴋarmat, sorlolo timib tâpsoma atautsib avatingit ilûnatik, unugalloardlutik, atausek timigingmatsuk: Kristûsetauk taimainivok.
13Tamapta Anernermut atautsemut baptisimagapta, atautsemik timeolerᴋovluta Jûdiongmangâptalônêt, Grîᴋiongmangâptalônêt, kivgaungmangâptalônêt, kivgaungimangâptalônêt; ilûnatalo imitauvogut Anernermut atautsemut.
14Timelo atausênarmik avateᴋangimat, unuktunigle.
15Itikat oᴋarajarpatta: aggaunginapta, tamanna pivlugo timib avatigingilâtigut; timib tagva avatiginajangilagît?
16Siuttauk oᴋarajarpat: ijiunginama, tamanna pivlugo timib avatigingilânga; timib tagva avatiginajangilaûk?
17Time ilûnane ijiokpat, tussarnek nanênajarᴋâ? Time ilûnane siutaukpat, naimanek nanênajarᴋâ?
18Mânale Gûdib avatit tamaita ililaukpait ilûnaita ingmikôrtilugit timemut, issumaminik.
19Avatille ilûnatik atausênak avateokpatta, time nanênajarᴋâ?
20Mânale avatit unudlarput, timele atausiovok.
21Ije aggangnut oᴋarungnangilak: atoriaᴋangilapse; niaᴋorlônêt itikanut: atoriaᴋangilapse.
22Imailuarporle: Timib avatingit sangênersaungasugijavut, tamakkoa atoriaᴋarnerpângovut.
23Kangunarluarasugijavut timeme, tâpkoa pinnarnarsitinersarivavut; pinnarnaitigijavullo, tâpkoa ânanausitinersarivavut.
24Ananausitigijavut pinarnarsititaujariaᴋangimatta. Gûdible time taimâk avatitârdlugo pivâ, avat ajoᴋsarnersak pinnarnarnersautilerdlugo;
25Akkerartortigêrᴋonagit timemêtut, ikajortigêrᴋovlugille avatit ingmingnut.
26Tagva avatit ilangallônêt ânialerpat, avatit ilûnatik âniaᴋatigivât; avatillônêt ilangat nertornartitaukpat, avatit ilûnatik ᴋuviasuᴋatigivât.
27Kristûsible timigivâse, avatigivâse ingmiᴋôrtiluse.
28Gûdiblo illagêktune kivgartorᴋolaukpait sivorlermik Apostelit, aipanganik nelautaijut, pingajuanik ajoᴋertuijut, tungâgut tatamnartulijut, tungâgut inûliklernermik tunergutilit, ikajortuksallo, ataniotijullo, oᴋautsiniglo (ingmigolingajunik) sunatuinarnik oᴋâlajut.
29Ilûnatik Aposteliovât? Ilûnatik nelautaijôvât? Ilûnatik tatamnartulijungnarᴋât?
30Ilûnatik inûliklernermik tunerguteᴋarᴋât? ilûnatik oᴋautsinik (ingmigôlingajunik) sunatuinarnik oᴋâlavât? Ilûnatik nalonarungnaititsijungnarᴋât?
31Tunergutit saimanartut idluarnersat pinasuarsigik. Sullelo mâna unertôtijomavapse apᴋomik idluarnerpângojomik.
Currently Selected:
I Korintemiunut 12: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
