Deuteronomio 19
19
Dagiti Siudad a Pagkamangan
(Num. 35:9-34; Jos. 20:1-9)
1Intuloy#Jos. 20:1-9. ni Moises, “Kalpasan ti panangparmek ti Apo a Diosyo kadagiti tattao nga agnaed iti daga nga itedna a tagikuaenyo ken nasakupyon dagiti siudad ken balbalayda ket agtaengkayon sadiay, 2-3bingbingayenyo ti daga iti tallo a paset; adda siudad ti tunggal paset a nalaka a papanan. No adda pimmatay, mabalinna ti agkamang iti maysa kadagitoy a siudad tapno masalakniban. 4No makapapatay ti maysa a tao iti saanna a kabusor, mabalinna ti agkamang sadiay tapno saan a maan-ano. 5Kas pangarigan, adda dua a tao a mapan mangayo iti kabakiran. Bayat ti panagpukan ti maysa, masukto ti ulo ti wasay ket mapuntaan ti kaduana a pakaigapuan ti pannakatayna. Mabalin ti nakapatay ti agkamang iti maysa kadagitoy a siudad tapno saan a maan-ano. 6No maymaysa ti siudad ket adayo unay a papananna, nalabit a makamakam ti kabagian ti natay nga agibales ket gapu iti pungtotna, mapatayna ti tao nga awan basolna. Kinapudnona, aksidente laeng ti pannakatay ti tao a dina kabusor. 7Daytoy ti gapuna nga ibilinko a mangilasinkayo iti tallo a siudad.
8“Inton palawaen ti Apo a Diosyo ti daga a masakupanyo a kas imbagana kadagiti kapuonanyo ket itedna ti amin a daga nga inkarina, 9mangilasinkayto iti tallo pay a siudad. (Itednanto daytoy a daga no tungpalenyo ti amin nga imbilinko ita nga aldaw ken no ayatenyo ti Apo a Diosyo ket agbiagkayo a kas mayannurot kadagiti pannursurona.) 10Aramidenyo daytoy tapno dikay makabasol iti pannakapapatay iti tao nga awan basolna iti daga nga ited kadakayo ti Apo a Diosyo.
11“Ngem no kas pangarigan igagara ti maysa a tao a patayen ti kabusorna sa mapan agkamang iti maysa kadagitoy a siudad, 12paalanto dagiti panglakayen ti ilina ket yawatda iti kabagian nga agibales tapno patayenna. 13Diyonto kaasian. Pukawenyo iti Israel daytoy a mammapatay tapno awanto ti pakaan-anoanyo.
Dagiti Mohon
14“Diyo#Deut. 27:17. yalis ti mohon ti kaarrubayo a nabayagen nga inkabil dagiti kapuonanyo iti daga nga ited kadakayo ti Apo a Diosyo.
Linteg maipapan iti Panagsaksi
15“Saan#Num. 35:30; Deut. 17:6; Mat. 18:16; Jn. 8:17; 2 Cor. 13:1; 1 Tim. 5:19; Heb. 10:28. nga umdas ti maysa a saksi tapno masentensiaan ti maysa a tao iti nakaidarumanna. Masapul nga adda dua a saksi a mangpaneknek a nakabasol ti maysa a tao. 16No idarum ti maysa a tao ti padana a tao iti basol a dina inaramid, 17masapul a dumatagda a dua iti imatang ti Apo ket usigen ida dagiti papadi ken dagiti ukom nga agserserbi sadiay. 18Usigen a naimbag dagiti ukom ti kaso ket no saan a pudno ti pammabasol ti nagdarum a maibusor iti padana nga Israelita, 19isu ti umawat iti dusa a maipatay koma iti indarumna. Kastoy ti panangikkatyo iti daytoy a kinadakes. 20Madamagto ti amin ti napasamak; agbutengdanto ket awanton ti agaramid iti kasta a kinadakes. 21Dikay#Ex. 21:23-25; Lev. 24:19-20; Mat. 5:38. mangngaasi; no biag ti inutangmo, biag met ti pagbayadmo, mata iti mata, ngipen iti ngipen, ima iti ima ken saka iti saka.”
Currently Selected:
Deuteronomio 19: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
