Deuteronomio 18

Ti Bingay dagiti Papadi

1Intuloy ni Moises, “Awan ti daga iti Israel a maited kadagiti papadi a Levita. Pagbiagdanto dagiti sagut ken dagiti dadduma a daton iti Apo. 2Saanda#Num. 18:20. a mapalubosan nga agtagikua iti daga a kas kadagiti dadduma a tribu; ti bingayda isu ti gundawayda nga agserbi a papadi kas inkari ti Apo.

3“No adda maidaton a toro a baka wenno karnero, maited kadagiti papadi ti abaga, ti pingping ken ti bituka. 4Masapul a maited kadakuada ti umuna nga apit iti trigo, arak, lana ti olibo ken de lana. 5Kadagiti amin a tribuyo, ti tribu ni Levi ti pinili ti Apo nga agserbi kenkuana a kas papadi iti agnanayon.

6“Mabalin ti siasinoman a Levita iti uray ania nga ili ti Israel ti mapan iti lugar a pilien ti Apo a pagdaydayawan kenkuana, 7ket agserbi a padi iti Apo a Diosna a kas kadagiti dadduma a Levita nga agserserbi sadiay. 8Maipada ti kaadu ti awatenna a taraon iti kaadu ti taraon nga awaten dagiti dadduma a papadi. Mabalinna nga idulin ti aniaman nga ipatulod kenkuana ti familiana.#8 Mabalinna nga idulin…ipatulod kenkuana ti familiana; saan a nalawag iti Hebreo.

Ballaag a Maibusor iti Ugali dagiti Pagano

9“Inton dumtengkayo iti daga nga ited kadakayo ti Apo a Diosyo, diyo tultuladen dagiti makarimon nga ugali dagiti tattao nga agnaed sadiay. 10Diyo#Lev. 19:26; Ex. 22:18. idatag dagiti annakyo a kas daton a mapuoran iti altaryo. Diyo palubos nga agan-anito wenno agbuybuyon dagiti tattaoyo wenno aggamud 11wenno#Lev. 19:31. agipadles wenno makiumanda kadagiti espiritu dagiti natay. 12Kagura ti Apo a Diosyo dagiti agaramid kadagiti kastoy a makarimon a banag. Daytoy ti gapuna a paksiatennanto dagita a tattao bayat ti isusungadyo. 13Masapul#Mat. 5:48. a naan-anay ti kinapudnoyo iti Apo.”

Ikari ti Dios nga Agibaon kadagiti Profeta

14Kinuna ni Moises, “Iti daga nga inkay sakupen, agtulnog dagiti tattao iti pammagbaga dagiti agan-anito wenno dagiti agbuybuyon ngem saan nga ipalubos ti Apo a Diosyo a kasta ti aramidenyo. 15Mangpatanorto#Ara. 3:22; 7:37. iti profeta a kas kaniak nga agtaud iti Israel. Masapul nga agtulnogkayo kenkuana.

16“Iti daydi nga aldaw a panaguummongyo idiay Bantay Sinai, impakpakaasiyo a diyo koma mangngegen nga agsao ti Apo ken makitayo iti apuy ta mabutengkayo amangan no mataykayo. 17Kinuna ngarud kaniak ti Apo, ‘Nasayaat ti dawatda. 18Mangibaonakto iti profeta a kas kenka nga agtaud kadakuada. Ibagakto kenkuana ti isaona ket ibagananto met kadagiti tattao ti amin nga ibilinko. 19Agsaonto#Ara. 3:23. iti naganko, ket dusaek#19 Agsaonto…dusaek; wenno No agsao ti maysa a profeta, dusaek. ti siasinoman a di agtulnog kenkuana. 20Ngem no adda profeta a diak binilin a mangipakaammo iti mensahe iti naganko, masapul a mapapatay gapu iti inaramidna. Kasta met ti maaramid iti siasinoman a profeta nga agsao iti nagan dagiti didiosen.’

21“Nalabit a kayatyo nga ammoen no kasano a mailasinyo a saan a nagtaud iti Apo ti mensahe ti profeta. 22No agsao ti profeta iti nagan ti Apo ket saan a mapasamak ti ibagana, saan ngarud a nagtaud iti Apo ti ibagana. Nagsao dayta a profeta iti bukodna a nakem, ket dikay agbuteng kenkuana.”

Currently Selected:

Deuteronomio 18: RIPV

Highlight

Compare

Copy