Deuteronomio 20
20
Dagiti Linteg maipapan iti Gubat
1Intuloy ni Moises, “No inkay gubaten dagiti kabusoryo ket makitayo dagiti lugan a pakigubat ken dagiti kabalio ken ti armada a nabilbileg ngem ti armadayo, dikay agbuteng kadakuada. Tulongannakayto ti Apo a Diosyo a nangiruar kadakayo idiay Egipto. 2Sakbay a makigubatkayo, masapul a mapan ti maysa a padi iti sangoanan dagiti soldado ket kunana: 3‘Tattao iti Israel, dumngegkayo! Ita nga aldaw, inkay makigubat. Dikay agbuteng kadagiti kabusoryo; dikay agdandanag. 4Kumuyog kadakayo ti Apo a Diosyo ket pagballigiennakayo.’
5“Kalpasanna, kasaonto dagiti ofisiales dagiti tattao ket kunada: ‘Adda kadi kadakayo ti siasinoman a kaipatpatakderna ti balayna ngem dina pay inkonsagrar? No adda, masapul nga agawid amangan no matay iti paggugubatan ket sabali ti mangikonsagrar iti balayna. 6Adda kadi kadakayo ti kalkalpasna a nagmula iti ubas ngem di pay nagburas kadagiti bungana? No adda, masapul nga agawid amangan no matay iti paggugubatan ket sabalinto ti aglak-am iti arakna. 7Adda kadi kadakayo ti nakitulag a makiasawa? No adda, masapul nga agawid amangan no matay iti paggugubatan ket sabalinto ti mangasawa iti babai a nakitulaganna.’
8“Kunanto pay dagiti ofisiales: ‘Adda kadi kadakayo ti mabuteng wenno napukawna ti tured-pakinakemna? No adda, masapul nga agawiden tapno di met tumakrot dagiti dadduma.’ 9Kalpasan ti panagsao dagiti ofisiales iti armada, mapili dagiti pangulo ti tunggal bunggoy.
10“No rautenyo ti maysa a siudad, ikkanyo nga umuna iti gundaway dagiti umili a sumuko. 11No luktanda dagiti ruangan ti siudad ket sumukoda, pagbalinenyo amin ida a tagabu ket kapilitan nga agtrabahoda kadakayo. 12Ngem no saanda a sumuko, ket kaykayatda ti makigubat, lakuben ti armadayo ti siudad. 13No tulongannakayo ti Apo a mangparmek iti dayta a siudad, papatayenyo dagiti amin a lallaki sadiay. 14Ngem mabalinyo nga alaen dagiti babbai ken ubbing, dagiti animal ken amin a masarakanyo iti siudad. Mabalinyo nga usaren ti amin a kukua dagiti kabusoryo. Inted kadakayo ti Apo a Diosyo dagitoy. 15Kastoy ti aramidenyo kadagiti siudad nga adayo iti daga a pagnaedanyonto.
16“Ngem no sakupenyo dagiti siudad iti daga nga ited kadakayo ti Apo a Diosyo, papatayenyo dagiti amin nga agnaed. 17Ikisapyo dagiti amin a tattao: dagiti Heteo, Amorreo, Cananeo, Perezeo, Heveo ken dagiti Jebuseo kas imbilin kadakayo ti Apo nga aramidenyo. 18Papatayenyo ida tapno dikay agbasol iti Apo babaen iti panangisuroda kadakayo kadagiti amin a makarimon a banag nga ar-aramidenda iti panagdaydayawda kadagiti didiosenda.
19“No adda kayatyo a sakupen a siudad, diyo pukanen dagiti kayo nga agbunga, uray no mabayag a tiempo ti pananglakubyo. Kanenyo ti bunga ngem diyo dadaelen dagiti kayo; saanyo a kabusor dagiti kayo. 20Mabalinyo ti agpukan kadagiti dadduma a kayo nga usarenyo iti pannakalakub ti siudad agingga a maparmekyo.”
Currently Selected:
Deuteronomio 20: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
