Smart Guys 6
6
No Tell You Goin Pay Fo Anodda Guy Dat Owe Money
1Eh my boy! If some guy owe somebody money,
An you make one promise
Dat you goin pay wateva dat guy owe
If he no can pay,
Even if you donno da guy,
2Dass jalike you stay get trap
Cuz a wat you wen tell.
Cuz a yoa big mout,
Dey catch you.
3So my boy, dis wat you gotta do,
Cuz now, dis odda guy get powa ova you, you know!
Go in front him an make jalike you notting.
Try make him let you go from da deal.
No stop till he let you go.
4No even tink fo go sleep till you fix um!
No close yoa eye even litto bit!
5You betta run away from da deal,
Jalike da deer run away from da hunta guy
An da bird fly away from da trap da hunta guy wen put.
Mo Betta Work Den Ony Sleep
6Eh, you lazy buggah! Go look da ants.
See how dey do stuff,
So den you know wat fo do erytime.
7Da ants, dey no mo leada guys,
Fo tell um wat fo do.
No mo big boss,
No mo govmen leada guys.
8Even wen stay hot, da ants work
Fo make shua dey get food.
Wen time fo peopo harves food,
Dey bring in dea food too.
9Eh, you lazy buggah! How long you goin sleep?
Wen you goin wake up?
10 #
Smart 24:33-34
You go sleep litto bit moa,
An litto bit mo you moemoe,
An lay back,
11An bumbye all one time, all yoa stuff, gone,
Jalike one steala guy wen come take um.
An all one time you no mo da stuff you need,
Jalike one guy wit one knife wen jump you.
Da No Good Kine Peopo
12Da good fo notting kine peopo, dat ony do bad kine stuff,
Dey go all ova da place an bulai peopo.
13Dey make sign wit dea eyes,
An dea feets an dea fingas,
So dea guys know dey stay bulai somebody.
14Eryting inside dea head, all crooked.
All da time, dey tink how fo do bad kine stuff,
An fo make peopo fight wit each odda.
15Dass why dey all goin come wipe out one time,
An dey all goin come bus up one time,
Den dey no can come good bumbye.
Seven Tings Da One In Charge No Take
16Get six kine tings dat Da One In Charge had it wit um.
He come sick a dat kine tings.
17Da peopo dat ack high makamaka,
Da peopo dat erytime bulai,
Da peopo dat make peopo bleed,
Even if da peopo neva do notting to dem,
18Peopo dat use dea head fo make one plan
Bout how fo do wrong kine tings,
Peopo dat use dea feets
Fo hurry up an go do bad kine stuff,
19Peopo dat bulai any kine
In front da judge.
An numba seven, mo worse—
Az da kine peopo
Dat make braddahs go beef each odda.
Dass da kine peopo Da One In Charge tell “Laytas” to.
Da Tings I Teach You, Show You Wea Fo Go
20Eh my boy! I yoa faddah,
So do da ting I stay tell you fo do,
An no foget da rules
Yoa muddah wen teach you.
21Stick wit all dat stuff
Jalike stay inside you
An stay hang aroun yoa neck, all da time.
22Any place you go, da tings we teach
Goin show you wea fo go.
Wen you go sleep, jalike dey goin watch you
So notting bad happen.
Wen you wake up,
Jalike da teaching stay tell you wat fo do.
23Cuz da ting I tell you fo do,
An da rules yoa muddah teach you,
Dass jalike one small lamp,
O one light
Dat show you da way fo live fo real kine,
An show you wat you wen do wrong,
Fo you go back to da right way fo live.
No Fool Aroun If You No Stay Married To Dem
24I stay tell you all dis
Fo make shua you stay away from bad kine wahines,
An from any wahine dat not yoa wife,
No matta dey talk nice kine to you.
25No go tink,
“Ho, dis wahine good looking! I like get her!”
No good if da way she look at you goin trap you.
26Cuz da wahines dat fool aroun fo money,
Dey ony charge enuff fo buy food, dass it.
But wen da wahine dat awready get husban try come get you,
You goin lose da mos expensive ting you get—yoa life,
Dass wat she fo real kine goin do!
27So, wat you tink? Can pick up some hot charcoals,
Throw um inside yoa clotheses,
An da clotheses no get burn?!
I no tink so!
28If you go step on top hot charcoals,
You tink, no goin burn yoa feets, o wat?
29Same ting if you go fool aroun wit anodda guy wife.
You touch her, garans you goin get punish!
30Wen one guy go steal cuz he hungry,
Da peopo no make jalike him one pilau buggah, you know.
31But wen dey catch da guy,
He gotta pay back
Seven time mo den wat he wen take,
Even if he gotta sell
Eryting inside his house.
32But da guy dat fool aroun one wahine dat stay married,
Jalike da guy no mo one brain,
Cuz he ony stay kill himself,
An dass his fault.
33He goin get bus up an come shame.
He goin get one bad rep from dat,
An nobody goin foget dat eva.
34Cuz wen da husban find out,
He goin come all jealous an wild.
An wen he get mad,
He no goin hold back,
He goin geev um.
35Da husban no goin like you tell him, “Kay den,”
No matta how much silva you give him fo no tell.
Even if you give him plenny silva
Fo try make him change his mind,
He no goin change his mind.
Currently Selected:
Smart Guys 6: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
