Smart Guys 5
5
1Kay den, my boy. You lissen good,
Cuz I know wat kine stuff you betta do.
All dis kine stuff dat I undastan,
Goin help you, so lissen up.
2Az good, you know wen mo betta you no say notting
Bout wat you tink,
An you talk bout wat you know.
No Go Nea Da Odda Guy Wife
3Cuz wen da wahines dat not yoa wife talk,
Come out sweet jalike honey.
Da words from dea mout, stay smooth
Jalike olive oil.
4But afta dat, dey goin give you bitta taste in da mout,
Jalike da kine plant dat taste bitta,
An dey goin cut you
Jalike dey use one sword dat stay sharp on two side.
5Da way dey go, goin drag you down
To da place wea you goin mahke.
Fo shua dey stay go strait
To da Mahke Peopo Place!
6Cuz dey no like follow da strait way
Fo get da real kine life.
Dey go all ova da place,
An dey donno wea dey going.
Wat Happen Wen You Fool Aroun
7So now den, my boys, lissen me,
An make shua you stick wit da tings I tell you.
8You betta stay away from dat kine wahine!
No even go nea da door by da place wea she stay.
9Cuz if you hang out wit her,
Bumbye you goin lose da bestes time in yoa life,
An give um away to odda peopo.
Den her husban goin hurt you,
An make you suffa da res a yoa life.
10No good all yoa hard work go to odda peopo
An you donno who dem.
An eryting you get from yoa hard work,
Anodda guy from one diffren country
Goin bring all dat inside his house.
11An if you no watch out,
You goin moan wen you come ol,
Cuz yoa body stay all wasted
An no mo meat on top yoa bones.
12An den you goin tell:
“Bummahs! I no like
How peopo wen try teach me
Fo do da right ting!
How dey tell me az wrong,
Erytime I go do someting bad.
But inside, I tink,
‘I no goin change!’
13I neva lissen my teacha guys.
I neva like hear wat anybody try fo teach me.
14An now, eryting bad stay happen one time,
An I no can handle
In front all da peopo dat stay come togedda hea!”
Stay Tight Wit Yoa Wife
15Wen you make love to yoa wife,
Dass jalike you stay drink watta
From da big hole wea you keep watta,
Get yoa watta from ony yoa puka.
16Bumbye if you go chase odda wahines,
Az jalike yoa watta come too full.
Goin go down outside on top da street,
An make da place wea get plenny wahine,
Come full wit da watta dat come from yoa place.
17Mo betta you keep um all, ony fo you,
No good you share um wit wahines you donno.
18Yoa wife, da one you wen marry wen you was young,
She da one make good tings happen fo you,
An you feel good wen you stay wit her.
19She jalike one deer,
Real nice an good looking.
Her body, az all you need,
An she love you.
So, erytime you guys go make love,
No hold back from each odda!
20Eh my boy!
No good, you go all out wit somebody
An dey not yoa wife,
O you go grab somebody
Dass not fo you.
You Do Bad Kine Stuff, You Kill Yoaself
21Cuz Da One In Charge, he can see eryting dat erybody do,
Jalike dey stay do um right in front him.
An Da One In Charge, he look wat dey do,
If good o no good.
22Wen somebody do bad kine stuff,
Da tings dey do, trap dem.
Dey no can run away,
Cuz jalike dey all tie up wit rope.
23Dey goin mahke,
Cuz inside, dey no like learn
Wass importan fo do,
An cuz dey ony like do
Wat dey like do,
An no bodda dem.
Currently Selected:
Smart Guys 5: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
