Marcos 9

1Tsëpitanam Jesús kënö nirqan: <<Rasunpam niyaq: Manaraqpis wanurmi wakinniki rikäyanki Teyta Diospa mandakïnin poderninwan shamuqta>>.

Jesús chipapëkaq tikrakurinqan

Mateo 17.1-13; Lucas 9.28-36

2Tsëpita joqta junaqtanam Pedruta, Santiaguta y Juanta pusharkur Jesús ëwarqan jatun kaq jirkaman. Tsëchömi rikarëkäyaptin Jesús jukläyaman tikrakurirqan. 3Ratashninpis [rajunö] pasëpa yulaq tikrarmi chipapëparaq atsikyarqan. Mëläya taqsharpis manam pipis tsënöqa yulaqätsintsu. 4Tsëchömi rikäyarqan Moisésta y Elíasta Jesúswan parlëkäyaqta.

5Tsëmi Jesústa Pedro kënö nirqan: <<Rabí, allim këchö këkäyä. Kima tsukllata rurayämushaq: jukta qampaq, jukta Moiséspaq y jukta Elíaspaq>>.

6Mantsakashqa karmi mana käyishpa Pedro tsënö nirqan.

7Tsënö parlëkaptinmi pukutë tsaparirqan. Pukutëpitanam Teyta Dios kënö nimurqan: <<Pëmi kuyë Tsurï.#Mat. 3.17; Mar. 1.11; Luc. 3.22. Pë niyäshushqëkita cäsukuyë>>.

8Tsënö nimuptin yapë rikarqa pitapis manam rikäyarqannatsu, sinöqa Jesúsllatanam rikäriyarqan.

9Jirkapita urëkäyämushqanchönam Jesús kënö nirqan: <<Jirkachö rikäyashqëkita pitapis ama willakuyankiraqtsu. Nunapa Tsurin wanushqanpita kawarimuptinran willakuyanki>>.

10Tsënö niptinmi pitapis willayarqantsu. Tsënö kaptinpis kikinkunapuraqa kënömi parlayarqan: <<Wanushqanpita kawarimunanpaq kashqanta parlarqa ¿imapaqraq parlëkan?>>

11Tsëmi Jesústa tapuyarqan: <<¿Imanirtaq ley yachatsikuqkuna niyan Cristo shamunanpaq puntata Elíasraq shamunanpaq kashqanta?>>#Mal. 4.5-6.

12Jesúsnam nirqan: <<Rasunpam Elías puntata shamunqa llapanta alistananpaq. Tsënö këkaptinpis Diospa palabranchömi nikan Nunapa Tsurinta chikir alläpa jipatsiyänanpaq kashqanta. 13Noqam niyaq: Elíasqa shamushqanam.#Mat. 11.14. Teyta Diospa palabranchö qellqarëkashqannöllam pëta wanutsiyarqan>>.

Juk jövinta Jesús kachakätsinqan

Mateo 17.14-20; Lucas 9.37-43a

14Jirkapita discïpulunkunawan shamurnam tariyarqan atskaq nunakuna juntarëkäyaqta y tsëchö wakin kaq discïpulunkuna ley yachatsikuqkunawan liryëkäyaqta. 15Jesústa rikëkurmi nunakuna kushishqa ëqipa ëwar napayarqan. 16Jesúsnam discïpulunkunata nirqan: <<¿Imanirtaq ley yachatsikuqkunawan liryëkäyanki?>>

17Juk nunanam nirqan: <<Rabí, supë upayätsishqan tsurïta kachakëkatsimunëkipaqmi apamurqü. 18Tsurïtam supë patsaman seqirin, pushuqatapis kachutsin y kiruntapis ruchuchütsin. Tsarishqan höram qerunö chukru tikrakurin. Tsëmi supëta qarquyänanpaq discïpulïkikunata rowakuptïpis puëdiyashqatsu>>.

19Jesúsnam nirqan: <<¡Mana markäkuq nunakuna! ¡Imëyaqraq qamkunawan këkäshaq! ¡Imëyaqraq qamkunata awantayashqëki! Mä tsë jövinta apayämï>>.

20Tsënö niptinmi jövinta apayarqan. Jesústa rikëkurmi jövinta supë seqirïkuptin pushuqata kachur qarishpäkurqan. 21Jövinpa tëtantanam Jesús kënö tapurqan: <<¿Imëpitataq supë jipatsin?>>

Tëtannam nirqan: <<Wamra kashqanpita patsam. 22Atska kutim wanutsita munar ninamanpis yakumanpis seqir ushan. Ankupäyämarqa tsurïta kachakëkätsillämï, tëtë>>.

23Jesúsnam nirqan: <<¿Imanirtaq <puëdirqa> nimanki? Rasunpa markäkamuptikiqa manam imapis sasatsu>>.

24Tsënö niptinmi jövinpa tëtan juklla nirqan: <<¡Awmi, markäkullämi! Mas markäkunäpaq yanapëkallämë>>.

25Atskaq nunakuna tanqanakurraq shamïkaqta rikarmi tsë jövinchö këkaq supëta Jesús piñapar nirqan: <<¡Upayätsiq supë! ¡Kë jövinpita juklla yarqï! ¡Kananpitaqa amana pëman kutinatsu!>>

26Tsëmi tsë supë qaparir jövinta yapë seqirirqan. Tsëpita yarqurmi wanushqatanö jaqirir supë ewkurqan. Jövin jitarëkaqta rikarmi <<wanurishqanam>> niyarqan. 27Jesúsnam makipita tsarirkur kachakashqatana sharkatsirqan.

28Tsëpita juk wayiman Jesús yëkuriptinmi discïpulunkuna kënö tapuyarqan: <<Noqakunaqa ¿imanirtaq tsë supëta qarqïta puëdiyarqütsu?>>

29Jesúsnam nirqan: <<Tsënö supëtaqa [ayunar] Teyta Diosta mañakurran qarquyanki>>.

Wanutsiyänanpaq kanqanta Jesús yapë willakunqan

Mateo 17.22-23; Lucas 9.43b-45

30Tsëpita ewkurnam discïpulunkunawan Jesús pasayarqan Galileapa. Discïpulunkunallata yachatsita munarmi mëman ëwayashqantapis nunakuna musyayänanta munarqantsu. 31Discïpulunkunata yachatsirmi Jesús nirqan: <<Nunapa Tsurinqa chikiqninkunapa makinman entregashqam kanqa. Wanuratsiyaptinpis kima junaqtam kawarimunqa>>.

32Tsënö willakuptinpis discïpulunkuna manam käyiyarqantsu imata nishqantapis. Mana käyirpis tapïtaqa mantsakuyarqanmi.

Wamranö kanantsikpaq Jesús käyitsinqan

Mateo 18.1-5; Lucas 9.46-48

33Tsëpita Capernaúm markaman chärir wayichö këkarnam discïpulunkunata Jesús kënö tapurqan: <<Nänipa shamïkashqa ¿imapitataq parlëkäyarqunki?>> nir.

34Mas mandakuq këta qochinakur liryashqa karmi tapuptin upälla kakuyarqan.#Luc. 22.24. 35Tsënam Jesús tëkur chunka ishkë discïpulunkunata qayarir nirqan: <<Mëqanpis mas mandakuq këta munarqa llapanpitapis qollmi shonqu karmi sirwikuqnölla pïmëtapis yanapayänan>>.#Mat. 20.26-27; 23.11; Mar. 10.43-44; Luc. 22.26.

36Tsëpitanam llapanpa chöpinchö juk wamrata mellqarkur nirqan: 37<<Kë wamranö kaqkunata noqapa shutïchö pipis chaskirqa noqatam chaskikäman. Noqata chaskimarqa kachamaq Teytätapis chaskikäyanmi>> nir.#Mat. 10.40; Luc. 10.16; Juan 13.20.

<<Contrantsik mana karqa noqantsikwanmi këkan>> Jesús ninqan

Lucas 9.49-50

38Tsëpitanam Juan kënö nirqan: <<Rabí, noqakunam rikäyarqü juk nuna shutikichö supëkunata qarqïkaqta. Tsënö kaptinpis noqantsikwan mana puriptinmi michäyarqü>>.

39Jesúsnam nirqan: <<Ama michäyankitsu. Pipis shutïchö milagruta ruraq kaqqa manam conträ parlanmantsu. 40Contrantsik mana karqa noqantsikwanmi këkan.#Mat. 12.30; Luc. 11.23. 41Rasunpam niyaq: Discïpulü kayashqëki rëkur pipis juk täza yakullatapis makyayäshurnikiqa premiutam chaskiyanqa>>.#Mat. 10.42.

Jutsaman pitapis mana ishkitsinanpaq Jesús ninqan

Mateo 18.6-9; Lucas 17.1-2

42<<Pipis noqaman markäkamuqta juk wamrallatapis jutsaman ishkitsiptinqa mas allim kanman mulinu rumita kunkanman watarkur lamarman jitarkuyaptin. 43Makiki jutsata ruratsiyäshuptikiqa roquriyë. Imëpis mana upiq ninaman ishkë makiyuq jitashqa kayänëkipa rantinqa mas allim kanman juk makiyuqllapis wiñë kawëta chaskiyaptiki.#Mat. 5.30. 44[Infiernuchöqa nunata ushakätsiq kurukuna manam imëpis wanuyanqatsu. Ninapis manam ni imë upinqatsu.]

45<<Chakikipis jutsaman pushashuptikiqa roquriyë. Infiernuman ishkë chakiyuq jitashqa kayänëkipa rantinqa mas allim kanman juk chakiyuqllapis wiñë kawëta chaskiyaptiki. 46[Infiernuchöqa nunata ushakätsiq kurukuna manam imëpis wanuyanqatsu. Ninapis manam ni imë upinqatsu.]

47<<Nawikipis jutsata ruratsiyäshuptikiqa jorquyë. Infiernuman ishkë nawiyuq jitashqa kayänëkipa rantinqa mas allim kanman wiskullapis Teyta Diospa mandakïninman yëkuyaptiki.#Mat. 5.29. 48Infiernuchöqa nunata ushakätsiq kurukuna manam imëpis wanuyanqatsu. Ninapis manam ni imë upinqatsu.#Isa. 66.24.

49<<Sacrificiuta kachitarkur#Lev. 2.13; Eze. 43.24. kayayashqannömi llapan nunakunapis imëka ninapa pasaqnö jipayanqaraq. 50Kachiqa allim. Tsënö kaptinpis qamläkurirqa manam imapaqpis sirwinnatsu.#Mat. 5.13; Luc. 14.34-35. Nuna mayikiwan kuyanakur alli kawarqa qamkunapis kachinömi kayanki>>.

Currently Selected:

Marcos 9: qwhB

Highlight

Copy

Compare