Marcos 10

Warminpita mana rakikäyänanpaq Jesús yachatsikunqan

Mateo 19.1-12

1Capernaúmpita ëwarmi Jesús chärirqan Judea provinciaman. Tsëpitanam Jordán mayu tsimpanman pasarqan. Tsëchöpis atskaq nunakuna ëllukäyaptinmi imëpis yachatsishqannölla yachatsirqan. 2Fariseukunapis tsëman ëwarmi llutanta parlatsiyänan rëkur Jesústa tapuyarqan: <<¿Warminpita nuna rakikanmanku o manaku?>>

3Jesúsnam nirqan: <<Moisés qellqashqanchö ¿imataq nikan?>>

4Fariseukunanam niyarqan: <<Moisésqa yachatsirqan pipis warminpita rakikëta munarqa divorciu papelta firmapëkur qarqurinanpaqmi>>.#Deut. 24.1-4; Mat. 5.31.

5Jesúsnam nirqan: <<Moisés tsënö yachatsirqan nunakuna chukru shonqu kayaptinmi. 6Teyta Diosqa kë patsata kamar ollquta y warmitam kamarqan.#Gén. 1.27; 5.2. 7Tsëmi mamäninpita tëtanpita ollqu yarqukun warminwan mana rakikëpa täkuyänanpaq. 8Warminwan täkurnam jukllëllanöna kayanqa. Tsënö këkaptinqa mananam ishkaqnatsu kayan, sinöqa jukllëllanönam.#Gén. 2.24. 9Tsëmi Teyta Dios juntashqantaqa pipis rakinmantsu>>.

10Wayichö këkarnam discïpulunkuna Jesústa tapuyarqan tsë yachatsishqanpita. 11Tsëmi Jesús kënö nirqan: <<Mëqan nunapis warminpita rakikärir juk warmiwan tärarqa adulteriu jutsatam rurëkan. 12Tsënöllam mëqan warmipis qowanpita rakikärir juk nunawan tärarqa adulteriu jutsata rurëkan>>.#Mat. 5.32; 1Cor. 7.10-11.

Wamrakunapaq Teyta Diosta Jesús mañakunqan

Mateo 19.13-15; Lucas 18.15-17

13Tsëpitanam wamrakunata Jesús kaqman apayarqan peqankunata yatëkur Teyta Diosta mañakunanpaq. Discïpulunkunanam tsë wamra apaqkunata michäyarqan. 14Tsëta rikarmi Jesús piñapar nirqan: <<Wamrakunata apayämunanta ama michäyëtsu. Wamranö kaqkunapaqmi Teyta Diospa mandakïninqa këkan. 15Rasunpam niyaq: Pipis Teyta Diospa mandakïninta wamranö mana chaskikurqa manam pëpa mandakïninman yëkunqatsu>>.

16Tsënö nirirmi wamrakunata mellqarkur peqanta yatëkur Teyta Diosta mañakurqan.

Rïcu nuna sasataraq salvakunanpaq Jesús ninqan

Mateo 19.16-30; Lucas 18.18-30

17Tsëpita Jesús ëwëkaptinmi juk jövin ëqillapa ëwar nöpanman qonqurikïkur nirqan: <<Rabí, alli nunam kanki. ¿Imatataq ruräman wiñë kawëta tarinäpaq?>>

18Jesúsnam nirqan: <<¿Imanirtaq alli nuna kashqäta nimanki? Teyta Diosllam alliqa. 19Musyankim mandamientukuna ninqanta: <Ama nuna mayikita wanutsinkitsu.#Éxo. 20.13; Deut. 5.17. Ama casakushqa këkar jukwan kakunkitsu.#Éxo. 20.14; Deut. 5.18. Ama suwakunkitsu.#Éxo. 20.15; Deut. 5.19. Ama manakaqkunata pitapis tumpankitsu.#Éxo. 20.16; Deut. 5.20. Ama nuna mayikita ulipankitsu. Tëtëkita y mamëkita alli rikanki#Éxo. 20.12; Deut. 5.16.> >>.

20Tsë nunanam nirqan: <<Rabí, tsëkunataqa wamra kashqäpita patsam llapanta cumplirqü>>.

21Tsëmi Jesús rikärir ankuparnin nirqan: <<Jukran pishin cumplinëkipaq. Llapan kapushunqëkikunata rantikïkur tsë qellëta waktsakunata qoykï. Tsënö ruraptikiqa ciëluchömi riquëzëki kanqa. Tsëpita [cruznikita katarkur] qatimë>>.

22Tsënö niptinmi alläpa rïcu kar tsë jövin llakishqa ewkurqan. 23Ewkuptinnam wakpa këpa rikachakurir discïpulunkunata Jesús kënö nirqan: <<¡Alläpa sasam rïcu nunakuna Teyta Diospa mandakïninman yëkuyänanpaq!>>

24Tsënö niptinmi discïpulunkuna mantsakashqa quedariyarqan. Tsëmi Jesús yapë kënö nirqan: <<Kuyë wamräkuna, ¡alläpa sasam [riquëzankunaman markäkuq nunakuna] Teyta Diospa mandakïninman yëkuyänanpaq! 25Rïcu nuna Teyta Diospa mandakïninman yëkunqanpitaqa mas alërum juk camëllupis agüjapa uchkunpa pasarinman>>.#Prov. 11.28.

26Tsënö niptinmi discïpulunkuna masraq mantsakar kikinkunapura kënö ninakuyarqan: <<Tsënö kaptinqa ¿piraq salvakunqa?>>

27Pëkunata rikärirnam Jesús nirqan: <<Nunakuna salvakunanpaqqa alläpa sasam këkan. Tsënö kaptinpis Teyta Diospaqqa imapis manam sasatsu>>.

28Pedrunam nirqan: <<Teyta, noqakunaqa llapan imëkäkunatapis jaqirirmi qamta qatirëkäyaq>>.

29Jesúsnam nirqan: <<Rasunpam niyaq: Pipis wayinta, wawqinkunata, paninkunata, mamäninta, tëtanta, [warminta,] tsurinkunata y chakrankunatapis noqa rëkur y alli willakïnï rëkur jaqiriq kaqqa 30kë vïdachö juk pachak (100) kuti mastam chaskinqa. Tsënöpam wayinkuna, wawqinkuna, paninkuna, mamäninkuna, tsurinkuna y chakrankunapis pëpa kanqa. Tsënö kaptinpis chaskimashqanpitam chikiyanqa. Tsënö kaptinpis wak vïdachö wiñë kawëtam tarinqa. 31Atskaqmi precisaq kaqkuna manakaqpaq churashqa kayanqa. Manakaqpaq churashqa kaqkunanam precisaq kayanqa>>.

Wanutsiyänanpaq kanqanta yapë Jesús willakunqan

Mateo 20.17-19; Lucas 18.31-34

32Jerusalénpa ëwar discïpulunkunapa puntantam Jesús ëwarqan. Jerusalénchö wanutsita munayashqanta musyarmi discïpulunkuna y pëwan ëwaqkunapis mantsakïkar ëwayarqan. Tsëmi chunka ishkë discïpulunkunata juk läduman qayarir ima pasananpaq kashqantapis willar Jesús kënö nirqan: 33<<Musyayankim Jerusalénman ëwëkashqantsikta. Tsëchömi Nunapa Tsurinta prësu tsarïkur mandakuq sacerdötikunaman y ley yachatsikuqkunaman apayanqa. Pëkunam wanutsiyänanpaq condenayanqa. Mana Israel autoridäkunaman entreguëkuyaptinmi 34asipäyanqa, astayanqa, toqapuyanqa y wanutsiyanqa. Tsëpita kima junaqllatam kawarimunqa>>.

Santiago y Juan rowakuyanqan

Mateo 20.20-28

35Tsëpitanam Zebedeupa tsurinkuna Santiaguwan Juan Jesúsman witïkur kënö niyarqan: <<Rabí, rowakulläyashqëki>>.

36Jesúsnam nirqan: <<¿Imallataraq munëkäyanki?>>

37Pëkunanam niyarqan: <<Mandakuq kanëkipaq Teyta Dios churashuptiki juknïta allawkëkiman y juknïtana itsuqnikiman tëkatsilläyämanki>>.

38Jesúsnam nirqan: <<Manam musyayankitsu imata mañakayämanqëkitapis. ¿Noqa upunäpaq kaq cöpata#10.38a Cöpapaq parlarqa Teyta Dios piñakur jutsa ruraqkunata castigananpaq kashqantam parlarqan. Tsëpita masta musyanëkipaq leyinki Sal. 75.8; Isa. 51.17; Jer. 25.15-29; Hab. 2.16. upuyankimantsuraq? ¿Awantayankimantsuraq bautizayämänanpaq kashqannö bautizayäshuptiki?>>#10.38b Bautizayämänanpaq kashqannö bautizayäshuptiki ninanqa wanutsiyämänanpaq kashqannö wanutsiyäshuptiki ninanmi.

39Pëkunanam niyarqan: <<Awmi, puëdiyämi>>.

Jesúsnam nirqan: <<Rasunpam noqa upunäpaq kaq cöpata upuyanki y bautizayämänanpaq kashqannömi bautizayäshunki. 40Tsënö kaptinpis allawka kaq lädüman y itsuq kaq lädüman täkuyänëkipaqqa manam noqapitatsu këkan. Tsëmanqa täkuyanqa Teytä dispunishqan kaqkunallam>>.

41Rowakuyashqanta wiyëkurmi wakin kaq discïpulunkuna Juanta Santiaguta mana alli nawinkunawan rikäyarqan. 42Tsëmi discïpulunkunata qayëkur Jesús kënö nirqan: <<Musyayashqëkinöpis nación mandakuq nunakunaqa nunakunata munayashqantam ruratsiyan. 43Qamkunachöqa manam tsënö kanmantsu. Mëqëkipis mandakuq këta munarqa sirwikuqnölla nuna mayikikunata yanapayë.#Luc. 22.25-26. 44Alli rikashqa këta munarqa pïmëpaqpis esclävunölla kayë.#Mat. 23.11; Mar. 9.35; Luc. 22.26. 45Nunapa Tsurinpis manam sirwishqa kananpaqtsu shamushqa, sinöqa sirwinanpaqmi#Luc. 22.27; Juan 13.12-15. y nunakuna rëkur wanur atskaqta salvananpaqmi>>.

Bartimeuta Jesús kachakätsinqan

Mateo 20.29-34; Lucas 18.35-43

46Tsëpitanam Jericó markaman chäriyarqan. Jericópita discïpulunkunawan y mas atskaq nunakunawan yarqïkäyaptinmi Timeupa tsurin Bartimeo limushnata mañakur nänichö tëkarqan. Pëqa wiskum karqan. 47<<Nazaret nuna Jesúsmi pasëkan>> nir willëkuyaptinmi qayakur nirqan: <<¡Davidpa Tsurin Jesús, ankupëkallämë!>>

48Tsënö qayakuptinmi upälla kananpaq nunakuna piñapäyarqan. Piñapäyaptinpis masmi qayakur nirqan: <<¡Davidpa Tsurin, ankupëkallämë!>>

49Qayakushqanta wiyëkurmi Jesús shäkurir tsë wiskuta qayatsirqan. Tsëmi wiskuta nunakuna kënö niyarqan: <<Kallpata tsari. Jesúsmi qayëkäshunki. Juklla ëwashun>>.

50Tsënö niyaptinmi juklla shärirkur ponchunta jitarir Jesús kaqman ëwarqan. 51Jesúsnam tapurqan: <<¿Imachö yanapanaqtataq munanki?>> nir.

Wiskunam nirqan: <<¡Nawï rikänantam munallä, rabí!>>

52Jesúsnam nirqan: <<Kanan ewkïna. Markäkamushqëkipitam nawiki rikanqana>>.

Tsënö niptinmi tsë höra nawin rikachakurirqan. Tsënam Jesúspa qepanta ewkurqan.

Currently Selected:

Marcos 10: qwhB

Highlight

Copy

Compare