Marcos 8

Chusku waranqa nunakuna mikuyänanpaq milagruta Jesús ruranqan

Mateo 15.32-39

1Tsë junaqkunam atskaq nunakuna Jesús kaqman yapë ëllukäyarqan. Imapis mikuyänanpaq mana kaptinmi discïpulunkunata qayarir Jesús nirqan: 2<<Kë nunakunatam alläpa ankupä. Kima junaqnam mikïtapis mana llamishpa noqantsikwan këkäyan. 3Wakinqa karu markapitam shayämushqa. Mallaqta qarquriptïqa wayinkunamanpis manaraq charmi ishkiriyanqa>>.

4Discïpulunkunanam niyarqan: <<Kë chusyaq jirkachöqa ¿mëchöraq mikïta tarishun këtsikaq nunakunapaq?>>

5Jesúsnam tapurqan: <<¿Ëkallataq tantëkikuna këkan?>>

<<Qanchisllam, tëtë>> niyarqan.

6Tsënö niyaptinmi Jesús nunakuna täkuriyänanpaq nirqan. Täkuriyaptinnam qanchis tantata tsarirkur Teyta Diosman mañakur payllä nikurqan. Tsëpitanam pakirir discïpulunkunata makyarqan nunakunata rakiyänanpaq. 7Tsënöllam juk ishkë akapalla pescädutapis Jesúsman apayarqan. Tsëkunatapis tsarirkurmi Teyta Diosman payllä nikurir discïpulunkunata makyarqan nunakunata ëpuyänanpaq. 8Tsënam pacha junta llapan mikuyarqan. Katunkunatanam qanchis canasta juntata discïpulunkuna ëlluriyarqan. 9Tsëchö mikuqkunaqa chusku waranqanömi (4,000) kayarqan.

Mikur ushariyaptinnam nunakunata Jesús despidïkurqan. 10Tsëpitanam barcuman lloqarkur discïpulunkunawan ewkuyarqan Dalmanuta niyashqanman.

Milagrutaraq rikëta munayanqan

Mateo 16.1-4

11Chäriyaptinmi fariseukuna Jesústa ishkitsita munar niyarqan: <<Tëtë, Teyta Dios rasunpa kachamushushqëkita musyayänäpaq ima milagrullatapis ruraramï>>.#Mat. 12.38; Luc. 11.16.

12Tsënö niyaptinmi Jesús llakikur nirqan: <<¿Imanirtaq kanan witsan nunakuna munëkäyan milagrutaraq ruranäta?#Mat. 12.39; Luc. 11.29. Rasunpam niyaq: Qamkuna munayashqëkinöqa manam ima milagrutapis rurashaqtsu>>.

13Tsënö nirirmi nunakunata jaqirir barcuman lloqarkur discïpulunkunawan wak tsimpaman ewkuyarqan.

Fariseukuna mana creyiyanqanta levadüraman Jesús iwalatsinqan

Mateo 16.5-12

14Jesúspa discïpulunkuna mirkapankuna apëta qonqashqa kayaptinmi barcuchö juk tantalla këkarqan. 15Jesúsnam nirqan: <<Fariseukunapa y Herodespa levadüranta paqtam chaskiyankiman>>.#Luc. 12.1.

16Tsënö niptinnam discïpulunkuna kikinkunapura kënö ninakuyarqan: <<Tantata mana apamunqantsikpitam tsënö nikämantsik>>.

17Tsënö parlëkäyashqanta käyirmi Jesús kënö nirqan: <<¿Imanirtaq parlëkäyanki tantata mana apayämushqëkipita? ¿Manaku käyiyanki imapaq parlëkashqätapis? ¡Imaläya mana käyikuqtaq kayanki! 18Nawiyuq këkarpis ¿manaku rikäyanki? Rinriyuq këkarpis ¿manaku wiyayanki?#Jer. 5.21; Eze. 12.2; Mar. 4.12. ¿Manaku yarpäyanki? 19Pitsqa tantallapita pitsqa waranqa (5,000) nunakuna mikuyänanpaq milagru rurashqäpita katukunata ¿ëka canasta juntatataq ëlluyarqëki?>>

Pëkunanam niyarqan: <<Chunka ishkëtam, tëtë>> nir.

20<<Tsënöllam qanchis tantallapita chusku waranqa (4,000) nunakuna mikuyänanpaq milagruta ruraptï katukunata ¿ëka canasta juntatataq ëlluyarqëki?>>

Pëkunanam niyarqan: <<Qanchistam, tëtë>> nir.

21Jesúsnam nirqan: <<Tsëkunata rikëkarpis ¿manaku käyiyankiraq?>>

Betsaidachö wisku nunata Jesús kachakätsinqan

22Tsëpitanam Betsaida markaman chäyarqan. Tsëchö këkäyaptinmi wisku nunata pushëkur Jesústa rowayarqan kachakätsinanpaq. 23Tsëmi makinpita janchakurkur markapita juk läduman Jesús jorqurqan. Tsëchömi wiskupa nawinman toqapïkurnin yatëkur tapurqan: <<¿Imallatapis rikankinaku?>> nir.

24Tsëmi rikachakurir nirqan: <<Montikunatanömi nunakunata rikëkä. Tsënö karpis purikäyanmi>>.

25Tsëmi nawinta yapë yatëkuptin llapantapis allina rikarqan. 26Kachakäratsirnam Jesús kënö nirqan: <<Markaman mana yëkushpa [ni pitapis mana willashpa] wayikiman kutikï>>.

Jesús Cristo kanqanta Pedro ninqan

Mateo 16.13-20; Lucas 9.18-21

27Tsëpitanam discïpulunkunawan Jesús ëwarqan Cesarea de Filipupa caseriunkunaman. Ëwëkäyashqanchömi discïpulunkunata kënö tapurqan: <<¿Pï kashqätataq nunakuna niyan?>>

28Discïpulunkunanam niyarqan: <<Wakinmi niyan Bautizakuq Juan kashqëkita. Wakinnam niyan profëta Elías kashqëkita. Y wakinnam niyan mëqan profëtapis kashqëkita>>.#Mar. 6.14-15; Luc. 9.7-8.

29Jesúsnam tapurqan: <<Qamkunaqa ¿pï kashqätataq yarpäyanki?>>

Pedrunam nirqan: <<Qamqa Teyta Dios kachamushqan Cristum kanki>>.#Juan 6.68-69.

30Tsënö niptinmi discïpulunkunata Jesús nirqan Pedro nishqanta pitapis mana willayänanpaq.#8.30 Tsë witsan Israel nunakuna yarpäyarqan Cristuta Teyta Dios kachamuptin Roma nunakunata guërrachö vencinanpaq kashqantam. Tsënö yarpäyaptinpis Jesucristo manam guërrata rurananpaqtsu shamurqan, sinöqa noqantsik rëkur cruzchö wanunanpaqmi. Tsëmi discïpulunkunata Jesús nirqan pë Cristo kashqanta pitapis mana willapäyänanpaq. Tsënö kaptinpis wanushqanpita kawarirkamurnam nirqan pïmëtapis willapäyänanpaq (Mat. 17.9; 28.19).

Wanunanpaq kanqanta Jesús willakunqan

Mateo 16.21-28; Lucas 9.22-27

31Tsëpitanam discïpulunkunata Jesús willapar nirqan: <<Nunapa Tsurintam alläpa jipatsiyanqa. Anciänukuna, mandakuq sacerdötikuna y ley yachatsikuqkunam contran shärir wanutsiyanqa. Tsëpita kima junaqtaqa kawarimunqam>>.

32Tsëtaqa Jesús clärum nirqan. Tsënö niptinmi juk läduman qayëkur Pedro piñaparqan. 33Tsëmi discïpulunkunaman Jesús tumëkur Pedruta kënö nirqan: <<¡Nöpäpita witikï, Satanás! Qam manam munankitsu Teyta Dios munashqanta ruranäta, sinöqa nuna munashqanta ruranätam munëkanki>>.

34Tsëpitanam discïpulunkunata y nunakunata qayëkur Jesús kënö nirqan: <<Pipis discïpulü këta munarqa kikin munashqannö ama kawatsuntsu, sinöqa cruzninta apaqnö noqata qatimätsun.#8.34 Jesucristo kawashqan witsanqa pipis cruzninta aparqan wanutsishqa kananpaqmi. Tsëmi cruzninta apaqnö noqata qatimätsun nirqa jutsa rurëpaq wanushqanö kar Jesucristuta qatiränanpaq kashqanta nikan.#Mat. 10.38; 16.24; Luc. 9.23; 14.27; Juan 12.25. 35Kawëninta salvëta munaq nunaqa kawëninta oqranqam. Kawëninta noqa rëkur y alli willakïnï rëkur oqraq nunanam kawëninta salvanqa.#8.35 Tsënö nirqa Jesucristo kënömi nirqan: <<Kikin munashqannö lluta kawakuqkunaqa manam salvakuyanqatsu. Noqa munanqänö kawaqkunam sï salvakuyanqa>>.#Mat. 10.39; Luc. 17.33; Juan 12.25.

36<<Infiernuman jitëkushqa kananpaq kaptinqa ¿imapaqtaq sirwin jinantin mundupa duëñun kashqanpis? 37Alläpa rïcu karpis manam rïcu kashqanwan salvacionta rantinqatsu. 38Jutsasapa nunakunapa nöpanchö pipis noqapita y willakïnïpita penqakuptinqa Nunapa Tsurinpis Teyta Diospa poderninwan y santu angelninkunawan shamurmi pëpita penqakunqa>>.

Currently Selected:

Marcos 8: qwhB

Highlight

Copy

Compare