Marcos 7

Nunakuna llutankunata yarpar impüru tikrayanqan

Mateo 15.1-20

1Juk kutim fariseukuna y ley yachatsikuqkuna Jesús kaqman Jerusalénpita ëwayarqan. 2Tsëchömi rikäyarqan Jesúspa discïpulunkuna makinkunata mana paqakushpa mikïkäyaqta. 3Fariseukunawan Israel mayinkunaqa unë castankunapa costumbrinkunata cumplirmi mikuyänanpaq makinkunata imëpis paqakuyan. Mana paqakurqa manam mikuyantsu.#7.3 Manam makinkuna limpiu kayänanpaqtsu paqayaq, sinöqa costumbrinta cumplir püru kayänanpaqmi. Püru kayänanpaqqa ichiklla yakutam makinman winariyaq. Tsëpita masta musyanëkipaq leyinki Lev. 11.32; 15.4-12; Núm. 19.18. 4Tsë costumbrikunata cumplirmi täzakunatapis, järrakunatapis, mankakunatapis [y catrikunatapis] paqayan. Tsënömi rantipakuyashqanpita kutirpis mikuyänanpaq paqakuyan. Tsënöllam mas wakin costumbrinkunatapis cumpliyan. 5Tsëmi fariseukuna y ley yachatsikuq nunakuna Jesústa tapur niyarqan: <<¿Imanirtaq discïpulïkikuna unë castantsikkunapa costumbrinkunata mana cäsushpa impüru makinkunawan mikuyan?>>

6Jesúsnam nirqan: <<¡Alli tukuq nunakuna! Rasuntachi Isaías qamkunapaq kënö qellqarqan:

<< <Kë nunakunaqa shiminkunallawanmi respetamaq tukuyan.

Shonqunkunachöqa manam yarpäyämanpistsu.

7Nishqäta yachatsiyänanpa rantinmi nunakuna niyashqanllata yachatsikuyan.

Tsëmi adorayämanqanpis sirwintsu>.#Isa. 29.13.

8<<Isaías nishqannöllam Teyta Diospa mandamientunkunata cäsuyänëkipa rantin kikikikunapa costumbrikikunallata cumplikäyanki. [Tsëmi järrakunatapis täzakunatapis püru kayänanpaq paqayankiraq. Tsënöllam wakin costumbrikikunatapis rurëkäyanki]>>.

9Jesús jina kënömi nirqan: <<¡Achyä, costumbrikikunata cumplir Teyta Diospa mandamientunkunatachi cumplikäyanki! 10Moisésmi kënö nirqan: <Tëtëkita y mamëkita alli rikanki>.#Éxo. 20.12; Deut. 5.16. Tsënöllam nirqan: <Pipis tëtanta o mamanta mana respetaq kaqqa wanutsishqa katsun>.#Éxo. 21.17; Lev. 20.9.

11<<Qamkunanam yachatsikuyanki <Papä, mamä, yanapënikita manam puëdïtsu. Këkäpamanpis Diosllapaqmi> nishpa niyänanpaq. 12Tsënö yachatsirmi mäñëkätsiyanki mamäninta papäninta mana yanapayänanpaq. 13Costumbrikikunata tsënö yachatsikurqa Teyta Diospa palabranta manakaqpaqmi churëkäyanki. Tsënöllam wakin costumbrikikunatapis yachëkätsiyanki>>.

14Nunakunata qayarirnam Jesús kënö nirqan: <<Kë niyashqaqkunata llapëki shumaq käyikuyë. 15Manam imatapis mikushqanpitatsu pipis impüru këkan, sinöqa shonqunchö mana allita yarpashqanpitam. 16[Rinriyuq kaqkunaqa nishqäkunata wiyakuyë]>>.

17Tsëpitanam tsëchö nunakunata jaqirïkur Jesúsqa juk wayiman yëkurirqan. Tsëchönam discïpulunkuna rowayarqan tsë yachatsikushqankunata shumaq käyïkatsinanpaq. 18Jesúsnam nirqan: <<¿Qamkunapis manaku käyiyankiraq nuna imata mikurpis impüru mana kanqanta? 19Mikushqantsikkunaqa manam shonquntsikmantsu yëkun, sinöqa pachantsikmanmi. Tsëpitanam pasakun>>.

Tsënö nirmi Jesús käyitsirqan llapan mikïkunapis mikunantsikpaq alli kashqanta.

20Jina nirqan: <<Shonqunchö mana alli yarpashqankunam nunataqa impüruyätsin. 21Nunakunaqa shonqunchö mana allikunata yarparmi fornicación jutsata rurayan, suwakuyan, wanutsinakuyan, 22casakushqa këkar jukwanraq kakuyan, ambiciösu kayan, ulikuyan, ërayashqa kar penqakïpaq jutsata rurayan, envidianakuyan, manakaqta tumpanakuyan, yachaq tukuyan y llutankunata rurayan. 23Tsë llapan mana alli rurëkunam shonqunkunapita yarqamur nunataqa impüruyätsin>>.

Mana Israel warmi këkar Jesúsman markäkunqan

Mateo 15.21-28

24Tsëpitanam Jesús ëwarqan Tiro [y Sidón] markakuna lädupa. Tsëman chashqanta nunakuna musyayänanta mana munarmi pakëllapa juk wayiman posadakurqan. Tsënö ratakuptinpis nunakuna musyariyarqanmi tsëchö këkashqanta.

25Tsë markachömi juk warmipa warmi wawanta supë alläpa jipëkätsirqan. Jesús tsëman chashqanta musyarmi tsë warmi nöpanman qonqurikur 26rowakurqan wawanpita supëta qarqunanpaq. Tsë warmi manam Israel warmitsu karqan, sinöqa jinan Sirofeniciapitam karqan. 27Jesúsnam nirqan: <<Puntataqa yanapashaq Israel mayïkunataran. Qamta yanaparqa wamrakunapa tantanta qochirir allqukunata qaraqnömi käman>>.

28Warminam nirqan: <<Awmi, tëtë. Tsënö kaptinpis wamrakuna mësapita shikwapakuyashqanllatapis allqukuna mikuyanmi>>.

29Jesúsnam nirqan: <<Allitam nirqunki. Wawëkita jipatsiq supë yarqushqanam këkan. Kananqa wayikipa kutikï>>.

30Wayinman kutirnam wawanta tarirqan kachakashqana qopinchö këkaqta. Tsënö kachakarqan supë yarkushqana kaptinmi.

Mana wiyaq y mana parlaq nunata Jesús kachakätsinqan

31Tiro markapita ewkurnam Sidón marka kaq lädupa ëwarnin Jesús chärirqan Decápolis provinciaman. Tsëpitanam chärirqan Galilea qocha kuchunman. 32Tsëchö këkaptinmi pëman pushayarqan mana wiyaq ni mana parlaq nunata. Chëkatsirnam Jesústa rowayarqan yatëkur kachakätsinanpaq. 33Tsëmi japallanta juk läduman pushëkur tsë nunapa mana wiyaq rinrinman dëdunta Jesús yakarqan. Toqaninman dëdunta ushmarkatsirmi qalluntapis yatëkurqan. 34Tsënö rurarirmi llakikurnin ciëluta rikärir: <<¡Efata!>> nirqan. (Efata ninanqa kichakë ninanmi.) 35Tsënö niptinmi tsë höra rinrin wiyarqan y parlar qallëkurqan.

36Tsënö kachakäratsirmi tsëchö këkaq nunakunata Jesús nirqan kachakätsishqanta pitapis mana willakuyänanpaq. Yapëkuryan tsënö nikaptinpis pïmëtam willayarqan. 37Kachakätsinqanta rikarmi nunakuna alläpa kushikur niyarqan: <<¡Llapantapis allitam ruran! ¡Kachakätsiptinmi mana wiyaqkunapis wiyayan y mana parlaqkunapis parlayan!>>

Currently Selected:

Marcos 7: qwhB

Highlight

Copy

Compare