Marcos 6

Nazaret markachö Jesús willakunqan

Mateo 13.53-58; Lucas 4.16-30

1Tsëpitanam Nazaret markanman discïpulunkunawan Jesús ëwayarqan. 2Jamakï junaq kaptinmi sinagögachö yachatsirqan. Tsëchö yachatsiptinmi nunakuna mantsakashqa kënö niyarqan: <<Tsënö yachatsikunanpaq ¿mëchöraq yachakamushqa? ¿Imanöparaq milagrukunata ruran? 3¿Manaku pëqa carpintëru? Mamäninpis ¿manaku María? Wawqinkunapis ¿manaku Santiago, José, Judas y Simón? Paninkunapis ¿manaku kë markachö täräyan?>>

Tsënö nirmi Jesús yachatsikushqankunata chaskiyarqantsu.

4Jesúsnam nirqan: <<Wakin markakunachö profëtata chaskiyaptinpis castankunaqa y marka mayinkunaqa manam chaskiyantsu>>.#Juan 4.44.

5Tsënö mana chaskiyaptinmi ima milagrutapis tsë markachö rurarqantsu, sinöqa juk ishkë qeshyaqkunallatam yatëkur kachakätsirqan. 6Marka mayinkuna pëman mana markäkuyaptinmi Jesús alläpa llakirqan.

Willapäkuyänanpaq apostolninkunata Jesús kachanqan

Mateo 10.1, 5-15; Lucas 9.1-6

Tsëpitanam markakunapapis estanciankunapapis nunakunata yachatsir Jesús purirqan. 7Tsënö purirmi chunka ishkë discïpulunkunata qayëkur poderninta qorqan nunakunapita supëkunata qarquyänanpaq. Tsëpitanam alli willakïninta willakuq ëwayänanpaq ishkaqtayan kacharqan. 8Tsëmi nirqan: <<Tukrullata#6.8 Wakin nunakunaqa shukshullata niyanmi. apayanki. Qepita, mirkapata ni qellëtapis ama apayankitsu.#Luc. 10.4-11. 9Yakaräyashqëki llanqillawan ëwayanki. Trocakuyänëkipaq ratashtapis ama apayankitsu.

10<<Pipa wayinman posadakurpis juk markaman pasayashqëkiyaq tsëllachö quedakuyanki. 11Willakuyashqëkita mana chaskiyäshuptikiqa chakikikunachö këkaq polvuta tapsikurir ewkuyanki. Tsënö rurayanki Teyta Dios pëkunata castigananpaq kashqanta musyayänanpaq.#Hech. 13.51. [Rasunpam niyaq: Juiciu junaqchöqa Sodomachö y Gomorrachö täraq nunakunata castigashqanpitapis mas peormi tsë nunakunata Teyta Dios castiganqa]>>.

12Tsënö niptinmi discïpulunkuna ëwar willapäkuyarqan jutsankunata jaqirir Teyta Dios munashqannöna kawayänanpaq. 13Tsënöllam supëkunatapis nunakunapita qarquyarqan. Qeshyaqkunatapis aceitiwan llushir#Stg. 5.14. atskaqtam kachakätsiyarqan.

Bautizakuq Juanta Herodes wanutsinqan

Mateo 14.1-12; Lucas 9.7-9

14Jesús rurashqankunata jinantinchö parlayaptinmi rey Herodespis musyarqan. Wakin nunakunam Jesúspaq kënö niyarqan: <<Tsë nunaqa Bautizakuq Juanmi kawarimushqa kanqa. Tsëmi milagrukunata rurananpaq puëdiq këkan>>.

15Wakinmi profëta Elías kashqanta niyarqan. Wakinnam niyarqan unë profëtakunanö profëta kashqanta.#Mat. 16.14; Mar. 8.28; Luc. 9.19. 16Tsënö parlayashqanta wiyarmi rey Herodes kënö nirqan: <<Peqanta roqutsishqä Juanmi kawarimushqa kanqa>>.

17Mas puntatam Juanta rey Herodes cadenarkatsir carcelman llawikatsishqa karqan. Tsënöqa rurëkurqan Herodías shutiyuq warmi mañakuptinmi. Herodíasqa karqan Herodespa wawqin Felipipa warminmi. Herodíasta Herodes warmintanö wätakuptinmi 18Juan kënö nirqan: <<Wawqikipa warminwan kakurmi alläpa jutsata rurëkanki>>.#Luc. 3.19-20.

19Tsënö nishqanpitam Herodías chikir Juanta wanutsita munarqan. Wanutsita munarpis Juanta Herodes respetaptinmi puëdirqantsu. 20Juanta tsënö respetarqan Dios munashqannö kawar santu nuna kashqanta musyarmi. Diospa willakïninta Juan willapaptinmi kushishqa wiyarpis imanö këtapis puëdirqantsu.

21Tsëpitanam Herodespa santunchö fiestata rurar qayatsirqan autoridäkunata, soldädukunapa mas mandakuqninkunata y Galileachö täraq reqishqa nunakunatapis. 22Tsëchö këkäyaptinmi Herodíaspa shipash wawan yëkurir tushurqan. Tsëta rikarmi Herodes y invitanqan nunakunapis alläpa kushikuyarqan. Tsëmi shipashta rey Herodes kënö nirqan: <<Mañamë imatapis. Nimashqëkitam qoykushqëki>>.

23Tsëpitanam jurar nirqan: <<Mandakunqä nacionpa pullanninta rakinaqpaq nimaptikipis rakïkushqëkim>>.

24Tsëmi mamänin kaqman tsë shipash ëwar tapurqan: <<¿Imatataq mañëküman, mama?>> nir.

Mamannam nirqan: <<Bautizakuq Juanpa peqanta qoshunëkipaq nïkï>>.

25Mamänin tsënö käyiratsiptinmi rey kaqman kutïkur nirqan: <<Noqa munä jina höra Bautizakuq Juanpa peqanta plätuchö qomänëkitam>>.

26Tsëta mañëkuptinnam rey Herodes alläpa llakikurqan. Tsënö llakirpis invitashqankunapa nöpanchö jurashqa karmi neguëta puëdirqantsu. 27Tsëmi tsë höra wardiata kacharqan Juanpa peqanta apamunanpaq. Nishqannöllam carcelman ëwar Juanpa peqanta roqurir 28shipashta juk plätuchö qoykurqan. Chaskirirnam shipashqa mamäninta qoykurqan. 29Tsënö rurayashqanta musyarirnam Juanpa discïpulunkuna ayanta ëllurkur pampëkuyarqan.

Pitsqa waranqa nunakuna mikuyänanpaq milagruta Jesús ruranqan

Mateo 14.13-21; Lucas 9.10-17; Juan 6.1-14

30Willapäkuyashqanpita apostolkuna kutirirmi llapan rurayashqanta y yachatsiyashqanta Jesústa willayarqan. 31Tsëchö atskaq nunakuna kayaptinmi mikuyänanpaqpis tiempun karqantsu. Tsëmi apostolninkunata Jesús kënö nirqan: <<Aku ëwashun chusyaqman tsëchö jamakurinantsikpaq>>.

32Tsënö nirmi barcuman lloqarkur apostolninkunawan chusyaqman ewkuyarqan. 33Mëpa ëwayashqantapis nunakuna rikarmi markakunapita juklla ëwar Jesúspita mas puntata chäyarqan. 34Barcupita yarpurirnam Jesús tarirqan atskaq nunakuna shuyëkäyaqta. Mitsiqninnaq üshakunanö këkaqta rikarmi ankuparnin tukïnöpa yachatsirqan.#Núm. 27.17; 1Rey. 22.17; 2Crón. 18.16; Jer. 50.6-7; Eze. 34.5; Zac. 10.2; Mat. 9.36.

35Tardiyakïkuptinnam discïpulunkuna Jesúsman ëwëkur kënö niyarqan: <<Chusyaqchömi këkantsik. Tardiyëkannam. 36Nunakunata nïkï markakunapa ëwar mikïninkuna rantiyämunanpaq. [Këchöqa manam mikuyänanpaq imapis kantsu]>>.

37Jesúsnam nirqan: <<Qamkuna pachan qarayë>>.

Tsënö niptinnam niyarqan: <<¿Noqakuna tanta rantimuq ëwayänätaku munëkanki? Këtsikaqpaqqa ishkë pachak (200) jornalpa chanin imaraqchi tinkunman>>.

38Jesúsnam nirqan: <<¿Ëka tantataq kayäpushunki? Mä rikäyämï>>.

Rikärirmi niyarqan: <<Këkan pitsqa tantawan ishkë pescädullam>>.

39Tsëpitam discïpulunkunata Jesús nirqan nunakunata purwa purwa pampaman tätsiyänanpaq. 40Tsënö niptinmi pachakpayan (100) pitsqa chunkapayan (50) tätsiyarqan. 41Tsëpitanam pitsqa tantatawan ishkë pescäduta tsarirkur ciëluman rikarkur Teyta Diosta Jesús payllä nirqan. Tantata pakirirnam discïpulunkunata makyarqan nunakunata qarayänanpaq. Tsënöllam llapan mikuyänanpaq ishkë pescädutapis makyarqan. 42Pacha junta mikuriyaptinnam 43katu tantakunata y pescädukunata chunka ishkë canasta juntata ëlluriyarqan. 44Tsëchö mikuqkuna kayarqan pitsqa waranqa (5,000) nunakunam.

Yaku jananpa Jesús ëwanqan

Mateo 14.22-33; Juan 6.15-21

45Tsëpitanam discïpulunkunata Jesús nirqan barcuman lloqarkur Betsaida markaman nöpäyänanpaq. Ewkuyaptinnam tsëchö këkaq nunakunata despidïkur 46jirkaman witsarqan Teyta Diosta mañakunanpaq.

47Patsa tutaparkuptinnam discïpulunkuna barcuwan karutana ëwëkäyarqan. Tsëyaqqa jirkallachöran Jesús japallan këkarqan. 48Tsëpitam rikarqan vientu kutitsimuptin barcuwan discïpulunkuna jipëkäyaqta. Patsa warëkaptinnam discïpulunkuna kaqman yaku jananpa Jesús yëkurëkarqan. Barcu nöpanpa pasëkaqtanö 49rikarmi discïpulunkuna alma kashqanta yarpar alläpa mantsakar qapariyarqan. 50Tsëmi Jesús nirqan: <<¡Kallpata tsariyë! ¡Noqam kä! ¡Ama mantsakäyëtsu!>>

51Tsënö nir barcuman lloqarkuptinmi vientupis juklla pärarirqan. Tsëkunata rikarmi discïpulunkuna alläpa mantsakashqa yarpakachäyarqan. 52Atskaq nunakunata qarananpaq milagru rurashqanta rikarpis shonqunkuna chukruyashqa kaptinmi käyikuyarqantsu Jesús puëdiq kashqanta.

Genesaretchö qeshyaqkunata Jesús kachakätsinqan

Mateo 14.34-36

53Qochata tsimparirnam Genesaret pampaman chärir barcuta watäriyarqan. 54Barcupita bäjariptinnam nunakuna Jesústa reqirir 55mëtsëpapis cörrillapa ëwar wakinkunatapis willayarqan Jesús tsëchö këkashqanta. Tsëta musyarirnam mëtsëpitapis qeshyaqkunata kirmawan apayämurqan. 56Tsëpita markakunapa y jirkakunapapis Jesús puriptinmi nänimanpis qeshyaqkunata apayarqan. Tsëpa pasaptinmi rowayarqan mantunpa kuchunllatapis qeshyaqninkuna yatëkunanpaq. Tsëchömi llapan yataq kaqqa kachakäyarqan.

Currently Selected:

Marcos 6: qwhB

Highlight

Copy

Compare