Mateo 9

Purita mana puëdiq nunata Jesús kachakätsinqan

Marcos 2.1-12; Lucas 5.17-26

1Tsëpitanam barcuwan tsimparir tärashqan Capernaúm markaman Jesús kutïkurqan. 2Tsëchömi purita mana puëdiq nunata kirmawan Jesús kaqman apayarqan. Apaqkuna pëman markäkuyashqanta musyarirnam tsë qeshyaqta Jesús kënö nirqan: <<Kallpata tsari. Llapan jutsëkitam perdonëkuq>>.

3Tsënam ley yachatsikuqkuna kënö nir yarpakachäyarqan: <<¡Tsënö nirqa Dios tukïkanmi!>>

4Tsënö yarpäyashqanta musyarmi Jesús kënö nirqan: <<¿Imanirtaq llutanta yarpëkäyanki? 5¿Mëqantaq mas sasa këkan? ¿Nunapa jutsankunata perdonëku? ¿O qeshyaqta kachakätsiku? 6Nunapa Tsurinqa kë patsachö nunakunata perdonananpaq puëdiqmi këkan. Tsëtam kanan musyayanki>>.

Tsëpitanam purita mana puëdiq nunata kënö nirqan: <<¡Sharkï! Kirmëkita aparkur wayikiman ewkï>>.

7Tsënö niptinmi tsë höra kachakashqana sharkur wayinman ewkurqan. 8Tsëta rikëkurnam nunakuna pasëpa espantashqa Teyta Diosta kënö alabayarqan: <<¡Kë nunataqa Teyta Diosmi podernin qoykushqa këkunata rurananpaq!>>

Discïpulun kananpaq Mateuta Jesús qayanqan

Marcos 2.13-17; Lucas 5.27-32

9Tsëpita ewkurmi Jesús rikarqan Mateo shutiyuq nuna impuestuta cobrar tëkaqta. Pëtam kënö nirqan: <<Qatimë>>. Tsënö niptinnam Jesústa qatir Mateo ewkurqan.

10Tsëpitanam wayinchö mikuyänanpaq Jesústa Mateo qayatsirqan. Tsëchömi impuestu cobraq nunakuna y jutsasapa nunakunapis Jesúswan y discïpulunkunawan juntu mikïkäyarqan. 11Tsëta rikëkurnam fariseukuna Jesúspa discïpulunkunata kënö niyarqan: <<¿Imanirtaq impuestu cobraqkunawan y jutsasapa nunakunawanpis Señornikikuna mikïkan?>>#Luc. 15.1-2.

12Tsënö niyashqanta wiyëkurnam Jesús kënö nirqan: <<Sänu kaqkunaqa manam mëdicuta wanayantsu, sinöqa qeshyaqkunallam. 13Teyta Diospa palabranchö ima nishqantapis yachakuyë. Tsëchöqa kënömi nikan: <Sacrificiuta kayayashqëkipitapis masqa munä ankupäkuq kayänëkitam>.#Ose. 6.6; Mat. 12.7. Noqaqa manam jutsannaq nunakunamantsu shamurqü, sinöqa jutsasapa nunakunamanmi [jutsankunata jaqiriyänanpaq]>>.

Ayünupaq y mushuq yachakïpaq Jesús käyitsinqan

Marcos 2.18-22; Lucas 5.33-39

14Jukpinmi Juanpa discïpulunkuna Jesústa tapuyarqan: <<Noqakunapis y fariseukunapis imëpis ayunayä. Qampa discïpulïkikunaqa ¿imanirtaq ayunayantsu?>>

15Jesúsnam nirqan: <<Casakuq jövin këkaptinqa casakï fiestaman invitashqakuna ¿llakikuyanmantsuraq? Tsënö kaptinpis casakuq jövinta wanuratsiyaptinqa ayunayanqam.

16<<Manam pipis makwa ratashta mushuq ratashwan remendantsu. Mushuq ratashqa qentikarmi makwa ratashta mas rachitsin. 17Tsënölla manam pipis tsëraq rurashqa vïnuta makwa kuntuman winantsu. Winaptinqa vïnu poqurmi ushakäratsinqa. Tsënö kaptinqa vïnupis y kuntupis ushakanqam. Tsëmi tsëraq rurashqa vïnutaqa mushuq kuntuman winantsik. Tsënö rurashqaqa vïnupis y kuntupis manam ushakanqatsu>>.#9.17 Makwa ratashta y makwa kuntutam unë costumbrinkunaman Jesucristo iwalatsirqan. Mushuq ratashta y tsëraq rurashqa vïnutanam kikinpa yachatsikïninman iwalatsirqan. Tsënö iwalatsirmi Jesucristo nirqan pëpa yachatsikïnin mushuq kar unë costumbrinkunaman mana tinkushqanta.

Warmita kachakätsinqan y wamrata kawaritsinqan

Marcos 5.21-43; Lucas 8.40-56

18Tsënö parlëkaptinmi sinagögachö mandakuq nuna chärir Jesúspa nöpanman qonqurikur nirqan: <<Tëtë, warmi tsurïmi wanurishqa. Ëwëkulläshun. Makikita jananman churaptikiqa kawarimunqam>>.

19Tsënö rowakuptinmi discïpulunkunawan Jesús ëwayarqan. 20Ëwëkäyaptinmi chunka ishkë watana yawar ëwëwan qeshyëkaq warmi qepanllapa yëkurir Jesúspa mantunpa kuchunta yatëkurqan. 21Tsënö rurarqan <<Jesúspa mantunta yatëkurllam kachakärishaq>> nirmi. 22Yatëkuptinmi tumëkur Jesús pëta rikärir nirqan: <<Ama llakitsu, mamë. Markäkamushqëkipitam kachakärirqunki>>.

Tsë nishqan hörallam yawar ëwëwan warmi kachakärirqan.

23Tsëpitanam autoridäpa wayinman Jesús chëkur tarirqan ayata pampayänanpaq música tocaqkunata y nunakunapis alläpa waqëkäyaqta. 24Pëkunatam Jesús kënö nirqan: <<Waqtapa yarquyë. Wamraqa manam wanushqatsu, sinöqa punïkanllam>>.

Tsënö niptinmi asipäyarqan. 25Waqtapa yarquriyaptinnam wamra sutarëkashqanman Jesús yëkurir makipita sutarkuptin wamra kawarimur sharkamurqan. 26Tsënö kawaritsishqantam tsë markachö y wakin markakunachöpis musyariyarqan.

Ishkë wiskukunata Jesús kachakätsinqan

27Tsëpita Jesús ewkuptinmi ishkë wiskukuna pëpa qepanpa ëwar niyarqan: <<¡Davidpa Tsurin Jesús, ankupëkalläyämë!>>

28Wayiman Jesús yëkuptinpis tsë wiskukuna qepantam qatiyarqan. Tsëmi Jesús kënö tapurqan: <<¿Qamkuna creyiyankiku nawikikunata kachakätsinäpaq kashqanta?>>

Pëkunanam: <<Awmi tëtë, creyilläyämi>> niyarqan.

29Tsënö niyaptinmi pëkunapa nawinkunata yatëkur Jesús kënö nirqan: <<Markäkayämushqëkipitam nawikikuna rikäyanqana>>.

30Tsënö niptinmi pëkunapa nawinkuna rikachakurirqan. Tsëmi Jesús kënö nirqan: <<Kachakätsiyashqaqta pitapis ama willayankitsu>>.

31Tsënö niptinpis yarqurir höram Jesús kachakätsishqanta pïmëtapis willayarqan.

Müduta Jesús kachakätsinqan

32Tsë kachakätsishqan wiskukuna yarquriyaptinnam Jesús kaqman juk müduta pushayarqan. Tsë nunataqa supëmi müduyätsishqa karqan. 33Tsëmi supëta Jesús qarquriptin tsë nuna parlar qallëkurqan. Tsëta rikëkurmi nunakuna kushikur kënö niyarqan: <<¡Manam mëchöpis kënö kachakätsikuqtaqa rikarquntsiktsu!>>

34 Fariseukunanam kënö niyarqan: <<Kë nunaqa supëkunapa mandakuqninpa poderninwanmi supëkunata qarqun>>.#Mat. 10.25; 12.24; Mar. 3.22; Luc. 11.15.

Nunakunata Jesús ankupanqan

35Llapan markakunapa y jirkakunapa Jesús purirmi Teyta Diospa mandakïninpa alli willakïninta sinagögakunachö yachatsikurqan y tukïläya qeshyawan qeshyaqkunata kachakätsirqan.#Mat. 4.23; Mar. 1.39; Luc. 4.44. 36Tsëmi atskaq nunakuna Jesús kaqman ëllukäyarqan. Mitsiqninnaq y oqrakashqa üshakunanö këkaqta rikarmi Jesús ankuparqan.#Núm. 27.17; 1Rey. 22.17; 2Crón. 18.16; Jer. 50.6-7; Eze. 34.5; Zac. 10.2; Mar. 6.34. 37Tsëmi discïpulunkunata kënö nirqan: <<Cosëcha ëllïpaq kashqannömi atska nunakuna Teyta Diospa willakïninta chaskikuyänanpaq këkäyan. Tsënö këkaptinpis wallkaqllam willakuqkuna kayan. 38Tsëmi Teyta Diosta mañakuyë willakuqkunata kachamunanpaq>>.#Luc. 10.2.

Currently Selected:

Mateo 9: qwhB

Highlight

Copy

Compare