Mateo 8

Leprawan qeshyëkaqta Jesús kachakätsinqan

Marcos 1.40-45; Lucas 5.12-16

1Jirkachö yachatsikushqanpita Jesús urämuptinnam atskaq nunakuna qatiyarqan. 2Tsëchömi leprawan qeshyëkaq nuna Jesúspa nöpanman qonqurikur nirqan: <<Tëtë, munarninqa kachakëkatsillämë>>.

3Tsënö rowakuptinnam Jesús yatëkur nirqan: <<Munämi kachakashqa kanëkita>>.

Tsënö niptinmi tsë höra kachakärirqan. 4Tsëpitanam Jesús nirqan: <<Kachakätsishqaqta ama pitapis willankitsu. Tsëpa rantinqa sacerdötiman ëwë kachakashqëkita rikäshunëkipaq. Kachakashqëkita musyayänanpaq Moisés qellqashqanchö nishqannölla ofrendëkita templuman apë>>.#Lev. 14.1-32.

Capitanpa sirwiqninta Jesús kachakätsinqan

Lucas 7.1-10; Juan 4.43-54

5Capernaúm markaman Jesús chäriptinnam Roma soldädukunapa capitannin rowar 6kënö nirqan: <<Tëtë, sirwimaqnïmi wayïchö lástima jitarëkan. Alläpa antsa karmi ni kuyunnapistsu>>.

7Jesúsnam nirqan: <<Kachakätsinäpaq ëwashun>>.

8Capitannam nirqan: <<Tëtë, mana Israel nuna këkaptïqa manachi wayïman yëkunkimantsu. Tsëpa rantinqa sirwimaqnï kachakärinanpaq këllapita nïkullë. 9Noqapis mandamaqnïpa munëninchömi këkä. Tsënöllam soldädükunapis munënïchö këkäyan. Mëqantapis <tsëpa ëwë> niptïmi ëwan, <shamï> niptïmi shamun y wätënïta <këta rurë> niptïpis ruranmi>>.

10Tsënö ninqanta wiyëkurnam Jesús kushikur qatiraqninkunata kënö nirqan: <<Rasunpam niyaq: Pënö markäkamuq nunataqa manam Israel nunakunachö tarirqütsu. 11Tsëmi niyaq: Jinantin nacionkunapitapis ëllukëkurmi Teyta Diospa mandakïninchö Abrahamwan, Isaacwan y Jacobwan tëkur mikuyanqa.#Luc. 13.29. 12Tsënö kaptinpis wakin nunakunaqa Teyta Diospa mandakïninchö kawayänanpaq kashqanta yarparpis mantsëpaq tutapëman jitëkushqam kayanqa. Tsëchömi alläpa waqar kirunkunatapis uchuyanqa>>.#Mat. 22.13; 25.30; Luc. 13.28.

13Capitantanam Jesús kënö nirqan: <<Wayikiman kutikï. Markäkamushqëkinömi sirwishuqniki kachakashqana këkan>>.

Tsë höram capitanpa sirwiqnin kachakärirqan.

Pedrupa suegranta Jesús kachakätsinqan

Marcos 1.29-34; Lucas 4.38-41

14Tsëpitanam Pedrupa wayinman ëwar Jesús tarirqan Pedrupa suegran fiebriwan lástima qeshyëkaqta. 15Tsënam Jesúsqa qeshyaqpa makinta yatëkurqan, y tsë höram fiebripita kachakärirqan. Tsënam sharkur pëkunata sirwirqan.

Atskaq qeshyaqkunata Jesús kachakätsinqan

Marcos 1.32-34; Lucas 4.40-41

16Patsa tutapëkaptinnam Jesúsman apayarqan supëkuna jipatsishqan atskaq nunakunata. Tsë nunakunapitam supëkunata Jesús juk shimillachö piñapar qarqurqan. Tsënöllam tukïläya qeshyawan qeshyaqkunatapis kachakätsirqan. 17Tsënö kachakätsiptinmi profëta Isaías kënö qellqashqan cumplikarqan:

<<Pëmi qeshyantsikkunata apakushqa.

Pëmi nanënintsikkunatapis jorqushqa>>.#Isa. 53.4.

Qatirëta munaq nunakunata Jesús käyitsinqan

Lucas 9.57-62

18Atska nunakuna ëllukäriyaptinmi discïpulunkunata Jesús kënö nirqan: <<Wak tsimpaman pasashun>>.

19 Barcuman yëkuyänanpaqna këkaptinnam ley yachatsikuq nuna Jesústa kënö nirqan: <<Rabí, mëpa ëwaptikipis qatishqëkim>>.

20Jesúsnam nirqan: <<Atuqkunapaqa machëninkuna kanmi. Pishqukunapapis qeshunkuna kanmi. Nunapa Tsurinpaqa manam ni mëchö punurinanllapaqpis kantsu>>.

21Juk discïpulunnam nirqan: <<Tëtë, ewkunapaq tëtätaraq puntata pamparamushaq>>.

22Jesúsnam nirqan: <<Wanushqakunataqa wanushqa mayinkuna pampakuyätsun. Qamqa juklla qatimë>>.

Vientuta y yakuta Jesús päratsinqan

Marcos 4.35-41; Lucas 8.22-25

23Tsëpitanam barcuman Jesús lloqaptin discïpulunkunapis qepanta lloqayarqan. 24Qochata tsimpëkäyaptinnam Jesús punukärirqan. Tsëyaqmi alläpa vientuwan yaku laqchiqsar barcuta hundikätsinanpaqna këkarqan. 25Tsëmi discïpulunkuna Jesústa riyatsir niyarqan: <<¡Tëtë, hundikëkantsiknam! ¡Salvëkalläyämë!>>

26Jesúsnam nirqan: <<Ichiklla markäkïyuq nunakuna, ¿imanirtaq mantsakashqa këkäyanki?>>

Tsënö nirmi sharkur vientuta y yakuta piñaparqan. Piñapaptinmi vientupis yakupis pärarirqan. 27Tsëta rikarmi discïpulunkuna mantsakashqa niyarqan: <<¡Pitaq kë nunaqa yakupis vientupis tsënö cäsunanpaqqa!>>

Juk nunapita supëkunata Jesús qarqunqan

Marcos 5.1-20; Lucas 8.26-39

28Qochata tsimparirnam Gadara niyashqan partiman chäriyarqan. Tsëchömi supëkuna löcuyätsiyashqan ishkaq nunakuna panteonpita yarqayämurqan. Pëkuna alläpa mantsëpaq kayaptinmi tsëpaqa pipis puriyaqtsu. 29Jesústa rikëkurnam qayaripa qaparir niyarqan: <<¡Diospa Tsurin Jesús! ¡Imatataq noqakunawan munanki! ¿Manaraq höräkuna chämuptinku jipatsiyämänëkipaq shamurqunki?>>

30Pëkunapita mas washa lädunchömi atska kuchikunata mitsikäyarqan. 31Tsëmi supëkuna Jesústa rowakur niyarqan: <<Kë nunakunapita qarqayämarqa taqë kuchikunallaman yëkuyänäpaq kachëkalläyämë>>.

32Rowakuyanqanta Jesús äniriptinmi supëkuna ishkan nunakunapita yarqurir tsë kuchikunaman yëkukïkuyarqan. Tsëmi kuchikuna löcuyar ladërapa ëqir qochaman jeqakurkuyarqan. Tsëchömi shenqakëpa wanuyarqan.

33Tsëta rikëkurmi kuchi mitsiqkuna raslla markaman willakuq ëwayarqan. Chëkurnam willakuyarqan löcuyashqa nunakunapita supëkunata Jesús qarqushqanta y kuchikuna qochaman jeqar shenqakëpa wanuyashqanta. 34Tsënam llapan nunakuna markankunapita Jesús kaqman ëwar rowayarqan tsëpita ewkunanpaq.

Currently Selected:

Mateo 8: qwhB

Highlight

Copy

Compare