Mateo 19

Warminpita mana rakikäyänanpaq Jesús yachatsikunqan

Marcos 10.1-12

1Tsënö yachatsikurirnam Galileapita Judeaman chänanpaq Jordán mayupa tsimparir Jesús tumamurqan. 2Pëpa qepantanam atskaq nunakuna ëwayarqan. Tsëchömi qeshyaqkunatapis kachakätsirqan.

3 Fariseukunapis tsëman ëwarmi llutanta parlatsiyänan rëkur Jesústa tapuyarqan: <<¿Ima achäqui rëkurllapis warminpita nuna rakikanmanku o manaku?>>

4Jesúsnam nirqan: <<¿Manaku leyiyarqunki Teyta Diospa palabranta? Tsëchömi nikan ollqutapis warmitapis Teyta Dios kamashqanta.#Gén. 1.27; 5.2. 5Tsënö kamarirmi Teyta Dios kënö nirqan: <Mamäninpita tëtanpita ollqu yarqukun warminwan mana rakikëpa täkuyänanpaqmi. Tsënö täkurmi ishkanpis jukllëllanö kayanqa>.#Gén. 2.24. 6Tsënö nikaptinqa mananam ishkaqnatsu kayan, sinöqa jukllëllanönam. Tsëmi Teyta Dios juntashqantaqa pipis rakinmantsu>>.

7Fariseukunanam tapuyarqan: <<Tsëpinqa ¿imanirtaq Moisés qellqashqanchö nikan warminpita rakikar divorciu papelta firmapëkur qarqurinanpaq?>>#Deut. 24.1-4; Mat. 5.31.

8Jesúsnam nirqan: <<Nunakuna warminpita rakikäyänanpaq Moisés permitirqan chukru shonqu kayaptinmi. Tsënö kaptinpis manam tsënö kananpaqtsu Teyta Diosqa kamarqan. 9Tsëmi niyaq: Mëqan nunapis warmin jukwan mana këkaptin juk warmiwan tärarqa adulteriu jutsatam rurëkan. [Tsënöllam qowanpita rakikashqa warmiwan täraq nunapis adulteriu jutsata rurëkan]>>.#Mat. 5.32; 1Cor. 7.10-11.

10Discïpulunkunanam kënö niyarqan: <<Tsënö kaptinqa mas allim kanman mana warmïkur täkushqa>>.

11Jesúsnam nirqan: <<Manam llapantsu warminnaq kawëta puëdiyan, sinöqa Teyta Dios permitishqan kaqllam. 12Wakin nunakunaqa warmita mana munayänanpaqmi yurikuyan. Wakinnam capashqa kar warminnaq täkuyan. Y wakinnam Teyta Diospa mandakïnin rëkur warmipaq yarpäyantsu. Tsëmi pipis warminnaq täkïta munarqa japallan täkunan>>.

Wamrakunapaq Teyta Diosta Jesús mañakunqan

Marcos 10.13-16; Lucas 18.15-17

13Tsëpitanam wamrakunata Jesús kaqman apayarqan peqankunaman makinta churëkur Teyta Diosta mañakunanpaq. Wamrakunata apëkäyaqta rikarnam discïpulunkuna michäyarqan. 14Jesúsnam discïpulunkunata nirqan: <<Wamrakunata apayämunanta ama michäyëtsu. Wamranö kaqkunapaqmi Teyta Diospa mandakïninqa këkan>>.

15Tsënö nirirmi wamrakunapa jananman makinta churar Teyta Diosta mañakurqan. Tsëpitanam ewkurqan.

Rïcu nuna sasataraq salvakunanpaq kanqan

Marcos 10.17-31; Lucas 18.18-30

16Juk kutim Jesúsman chärir juk jövin nirqan: <<Rabí, [alli nunam kanki]. ¿Ima allitataq ruräman wiñë kawëta tarinäpaq?>>

17Jesúsnam nirqan: <<¿Imanirtaq alli rurëpaq tapumanki? Jukllëllam alli ruraqqa.#19.17 Wakin qepa kaq griego copiakunachömi nin: ¿Imanirtaq alli nuna kashqäta nimanki? Teyta Diosllam alliqa këkan. Tsënöllam nin Mar. 10.18 y Luc. 18.19 versïculukunachöpis. Wiñë kawëta tarinëkipaqqa pëpa mandamientunkunatam cäsunëki>>.

18Tsë jövinnam yapë tapurqan: <<¿Mëqan mandamientukunatataq cumplïman?>>

Jesúsnam nirqan: <<Ama nuna mayikita wanutsinkitsu.#Éxo. 20.13; Deut. 5.17. Ama casakushqa këkar jukwan kakunkitsu.#Éxo. 20.14; Deut. 5.18. Ama suwakunkitsu.#Éxo. 20.15; Deut. 5.19. Ama manakaqkunata pitapis tumpankitsu.#Éxo. 20.16; Deut. 5.20. 19Tëtëkita y mamëkita alli rikanki.#Éxo. 20.12; Deut. 5.16. Tsënölla kikiki kuyakushqëkinö nuna mayikita kuyanki>>.#Lev. 19.18.

20Jövinnam nirqan: <<Tsëkunataqa [wamra kashqäpitam] llapanta cumplirqü. ¿Imataq mas pishin cumplinäpaq?>>

21Jesúsnam nirqan: <<Teyta Dios munashqannö kawëta munarqa llapan imëkëkikunatapis rantikïkur tsë qellëta waktsakunata qoykï. Tsënö ruraptikiqa ciëluchömi riquëzëki kanqa. Tsëpitana qatimë>>.

22Tsënö nïkuptinmi alläpa rïcu kar llakishqa ewkurqan. 23Tsëpitanam discïpulunkunata Jesús kënö nirqan: <<Rasunpam niyaq: ¡Alläpa sasam rïcu nunakuna Teyta Diospa mandakïninman yëkuyänanpaq! 24Yapëmi niyaq: Rïcu nuna Teyta Diospa mandakïninman yëkunqanpitaqa mas alërum juk camëllupis agüjapa uchkunpa pasarinman>>.

25Tsënö niptinnam discïpulunkuna alläpa mantsakar kënö niyarqan: <<Tsënö kaptinqa ¿piraq salvakunqa?>>

26Pëkunata rikärirnam Jesús nirqan: <<Nunakuna salvakunanpaqqa alläpa sasam këkan. Tsënö kaptinpis Teyta Diospaqqa imapis manam sasatsu>>.

27Pedrunam nirqan: <<Teyta, noqakunaqa llapan imëkäkunatapis jaqirirmi qamta qatirëkäyaq. Tsënö këkäyaptïqa noqakunapaqqa ¿imataq kanqa?>>

28Jesúsnam nirqan: <<Rasunpam niyaq: Mushuq patsachö Nunapa Tsurin chipapëkaq trönunman tëkuptinmi#Mat. 25.31. qamkunapis qatiyämashqëkipita chunka ishkë trönukunaman tëkur chunka ishkë trïbu Israel nunakunata juzgayanki.#Luc. 22.30.

29<<Pipis noqa rëkur wayinta, wawqinkunata, paninkunata, mamäninta, tëtanta, [warminta,] tsurinkunata y chakrankunatapis jaqiriq kaqqa juk pachak (100) kuti mastam chaskinqa. Wanukurpis wiñë kawëtam tarinqa. 30Atskaqmi precisaq kaqkuna manakaqpaq churashqa kayanqa. Manakaqpaq churashqa kaqkunanam precisaq kayanqa>>.#Mat. 20.16; Luc. 13.30.

Currently Selected:

Mateo 19: qwhB

Highlight

Copy

Compare