Mateo 20

Uryaqkunaman iwalatsikïpa Jesús yachatsinqan

1<<Kananmi Teyta Diospa mandakïnin imanö kashqantapis käyitsiyashqëki. Juk nunash üvas chakranchö uryatsinanpaq qoya qoyalla uryaqkunata ashiq ëwanaq. 2Uryaqta taririrshi juk jornalta pagananpaq parlarir üvas chakranman uryaq kachanaq.

3<<Tsëpita las nuëvinönash pläzapa yapë ëwar nunakunata täkïkaqta tarinaq. 4Pëkunatash kënö ninaq: <Qamkunapis üvas chakräman uryaq ëwayë. Uryayashqëpitaqa pagayashqëkim>. Tsënö niptinshi pëkunapis ëwayänaq.

5<<Pullan junaqpis y tardi las trespis yapëshi peón ashiq ëwanaq. Tsënö tarirninshi wakinkunatanölla chakranman kachanaq.

6<<Uryaqkuna witsikuyänanpaq juk höranöllana pishikaptinnash yapë ëwar nunakuna uryëninnaq këkäyaqta tarinaq. Pëkunatash kënö ninaq: <¿Imanirtaq imatapis mana rurashpa këchö qanyäriyanki?>

7<<Pëkunanash niyänaq: <Tëtë, manam pipis minkalläyämashqatsu>.

<<Tsëshi kënö ninaq: <Qamkunapis chakräman uryaq ëwayë>.

8<<Patsa tutapëkaptinnash mayuralninta kënö ninaq: <Uryaqkunata qayëkur llapantapis juk jornalta paguë.#Lev. 19.13; Deut. 24.15. Tardiraq yëkuqkunata puntata paganki y qoyapita uryaqkunataqa ultimutaraq paganki>. 9Nishqannöllash tardiraq yëkuqkunata juk jornal complëtuta paganaq. 10Tsëta rikarshi qoyapita uryaqkunaqa shayämunaq mas atskata chaskiyänanpaq kashqanta yarpar. Tsënö yarparpis juk jornalllatash pëkunapis chaskiyänaq. 11Tsëshi chakrayuqta reclamar 12niyänaq: <Tardiraq yëkamuqkuna juk hörallana uryëkäyaptinqa ¿imanirtaq pëkunatanölla paguëkäyämanki? Noqakunaqa alläpa achachëchötaq uryayarqü>.

13<<Chakrayuqnash kënö ninaq: <Tëtë, parlashqantsiknömi paguëkäyaq. Manam engañëkäyaqtsu. 14Päguïkikunata chaskirkur upälla ewkuyë. Kikï munarmi tardi yëkamuqkunatapis qamkunatanölla paguëkä. 15¿Imataq qokuyäshunki ëkata pagakuptïpis? ¿Alli nuna kashqäpitaku piñakuyanki?> >>

16Tsëpitanam Jesús kënö nirqan: <<Tsënöllam qepa kaqkuna puntachö kayanqa. Punta kaqkunanam qepachö kayanqa.#20.16 Tsë nishqanqa kënömi nikan: Tsë uryapukuq punta yëkuqwan qepa yëkuqpis iwal päguta chaskishqannömi Diospa willakïninta puntata chaskikuqkuna y qepataraq chaskikuqkunapis ciëluman chäyanqa. [Atskaqta qayarpis wallkaqllatam Teyta Dios akranqa]>>.#Mat. 19.30; Mar. 10.31; Luc. 13.30.

Wanutsiyänanpaq kanqanta Jesús yapë willakunqan

Marcos 10.32-34; Lucas 18.31-34

17Jerusalénman ëwëkarmi chunka ishkë discïpulunkunata juk läduman qayarir Jesús kënö nirqan: 18<<Musyayankim Jerusalénman ëwëkashqantsikta. Tsëchömi Nunapa Tsurinta prësu tsarïkur mandakuq sacerdötikunaman y ley yachatsikuqkunaman apayanqa. Pëkunam wanutsiyänanpaq condenayanqa. 19Mana Israel autoridäkunaman entreguëkuyaptinmi asipäyanqa, astayanqa y crucificäyanqa. Tsëpita kima junaqllatam kawarimunqa>>.

Santiagupa y Juanpa mamänin rowakunqan

Marcos 10.35-45

20Tsëpitanam Zebedeupa warmin wawankunata pusharkur Jesús kaqman ëwarqan. Chärirnam Jesúspa nöpanman qonqurikur kënö nirqan: <<Teyta, rowakullashqëki>>.

21Jesúsnam nirqan: <<¿Imallataraq munëkanki?>>

Warminam nirqan: <<Mandakïnikichö këkar kë ishkan wawäkunata churëkullanki yanapayäshunëkipaq. Jukta tëkatsinki allawkëkiman y juknin kaqtana itsuqnikiman>>.

22Jesúsnam nirqan: <<Manam musyayankitsu imata mañakayämanqëkitapis. ¿Noqa upunäpaq kaq cöpata#20.22a Cöpapaq parlarqa Teyta Dios piñakur jutsa ruraqkunata castigananpaq kashqantam parlarqan. Tsëpita masta musyanëkipaq leyinki Sal. 75.8; Isa. 51.17; Jer. 25.15-29; Hab. 2.16. upuyankimantsuraq? [¿Awantayankimantsuraq bautizayämänanpaq kashqannö bautizayäshuptiki?]>>#20.22b Bautizayämänanpaq kashqannö bautizayäshuptiki nirqa wanutsiyämänanpaq kashqannö wanutsiyäshuptiki nirqanmi.

Pëkunanam niyarqan: <<Awmi, puëdiyämi>>.

23Jesúsnam nirqan: <<Rasunpam noqa upunäpaq kaq cöpata upuyanki [y bautizayämänanpaq kashqannömi bautizayäshunki]. Tsënö kaptinpis allawka kaq lädüman y itsuq kaq lädüman täkuyänëkipaqqa manam noqapitatsu këkan. Tsëmanqa täkuyanqa Teytä dispunishqan kaqkunallam>>.

24Rowakuyashqanta wiyëkurmi wakin kaq discïpulunkuna Juanta Santiaguta mana alli nawinkunawan rikäyarqan. 25Tsëmi discïpulunkunata qayëkur Jesús kënö nirqan: <<Musyayashqëkinöpis nación mandakuq nunakunaqa nunakunata munayashqantam ruratsiyan. 26Qamkunachöqa manam tsënö kanmantsu.#Luc. 22.25-26. Mëqëkipis mandakuq këta munarqa sirwikuqnölla nuna mayikikunata yanapayë. 27Alli rikashqa këta munarqa esclävunölla nuna mayikikunata yanapayë.#Mat. 23.11; Mar. 9.35; Luc. 22.26. 28Nunapa Tsurinpis manam sirwishqa kananpaqtsu shamushqa, sinöqa sirwinanpaqmi y nunakuna rëkur wanur atskaqta salvananpaqmi>>.#Luc. 22.27; Juan 13.12-15.

Ishkë wiskukunata Jesús kachakätsinqan

Marcos 10.46-52; Lucas 18.35-43

29Jericó markapita discïpulunkunawan Jesús ewkuptinnam atskaq nunakuna qepanta ëwayarqan. 30Tsë nänichömi ishkë wiskukuna tëkäyarqan. Pëkunam Jesús pasëkaqta mäkïkur qayakur kënö niyarqan: <<¡Davidpa Tsurin Teyta Jesús, ankupëkalläyämë!>>

31Nunakunanam upälla kayänanpaq piñapäyarqan. Tsënö kaptinpis wiskukunaqa masran qaparir niyarqan: <<¡Davidpa Tsurin Jesús, ankupëkalläyämë!>>

32Jesúsnam tsë wiskukunata qayëkur tapurqan: <<¿Imachö yanapayänaqtataq munayanki?>>

33Wiskukunanam niyarqan: <<Nawïkuna rikänantam munalläyä, tëtë>>.

34Tsëmi ankupar nawinkunata yatëkuptin tsë höra rikachakuriyarqan y Jesústa qatirkurmi ewkuyarqan.

Currently Selected:

Mateo 20: qwhB

Highlight

Copy

Compare