Mateo 16

Milagrutaraq rikëta munayanqan

Marcos 8.11-13; Lucas 12.54-56

1Jukpunmi Jesústa ishkitsita munar fariseukuna y saduceukuna ëwëkur niyarqan: <<Tëtë, Dios rasunpa kachamushushqëkita musyayänäpaq ima milagrullatapis ruraramï>>.#Mat. 12.38; Luc. 11.16.

2Jesúsnam nirqan: <<Inti jeqarkuptin pukayäriptinmi niyanki: <Warëqa usyanqam>. 3Tsënöllam ciëlu pukutëyuq warämuptin niyanki: <Kananqa tamyanqam>. [¡Alli tukuq nunakuna!] Tsëkunataqa allim musyayanki. Tsëkunata musyarqa ¿imanirtaq rurashqäkunata rikëkarpis Teyta Dios kachamashqantaqa käyiyankitsu? 4¡Mana wiyakuq jutsasapa nunakuna! Milagruta ruranäta munayaptikipis#Mat. 12.39; Mar. 8.12; Luc. 11.29. manam ima milagruta rurashaqtsu. Tsëpa rantinqa profëta Jonásta salvar milagruta rurashqannömi Teyta Dios juk milagruta ruranqa>>.

Tsënö nirirmi Jesús ewkurqan.

Fariseukunapa yachatsikïninta levadüraman Jesús iwalatsinqan

Marcos 8.14-21

5Qochata tsimparirnam Jesúspa discïpulunkuna tanta apëta qonqakïkuyashqanta yarpäriyarqan. 6Tsëmi Jesús kënö nirqan: <<Fariseukunapa y saduceukunapa levadüranta paqtam chaskiyankiman>>.#Luc. 12.1.

7Tsënö niptinnam discïpulunkuna kikinkunapura kënö ninakuyarqan: <<Tantata mana apamunqantsikpitam tsënö nikämantsik>>.

8Tsënö parlëkäyashqanta käyirmi Jesús kënö nirqan: <<¡Ichiklla markäkïyuq nunakuna! ¿Imanirtaq parlëkäyanki tantata mana apayämushqëkipita? 9¿Imanirtaq käyiyankitsu imapaq parlëkashqätapis? ¿Manaku yarpäyanki pitsqa tantallapita pitsqa waranqa (5,000) nunakuna mikuyänanpaq milagruta rurashqäta? ¿Manaku yarpäyanki katu tantakunata ëka canastata ëlluyashqëkitapis?#Mat. 14.17-21. 10Jina ¿manaku yarpäyanki qanchis tantallapita chusku waranqa (4,000) nunakuna mikuyänanpaq milagruta rurashqäta y katu tantakunata ëka canastata ëlluyashqëkita?#Mat. 15.34-38. 11¿Imanirtaq käyiyankitsu tantapaq mana parlashqäta? Tsëpa rantinqa nikäyaq fariseukunapa y saduceukunapa levadüranta mana chaskipäyänëkipaqmi>>.

12Tsënö niptinran käyiriyarqan levadürapita mana parlashqanta, sinöqa fariseukunapa y saduceukunapa yachatsikïninta mana chaskipäyänanpaq nishqanta.

Jesús Cristo kanqanta Pedro ninqan

Marcos 8.27-30; Lucas 9.18-21

13Cesarea de Filipos kinrëman chärirmi discïpulunkunata Jesús kënö tapurqan: <<Nunapa Tsurinpaq ¿pï kashqantataq nunakuna niyan?>>

14Discïpulunkunanam niyarqan: <<Wakinmi niyan Bautizakuq Juan kashqëkita. Wakinnam niyan profëta Elías kashqëkita. Wakinnam niyan profëta Jeremías o mëqan profëtapis kashqëkita>>.#Mat. 14.1-2; Mar. 6.14-15; Luc. 9.7-8.

15Jesúsnam tapurqan: <<Qamkunaqa ¿pï kashqätataq yarpäyanki?>>

16Tsënam Simón Pedro nirqan: <<Qamqa wiñëpa kawaq Teyta Diospa Tsurinmi kanki. Pë kachamushqan Cristum kanki>>.#Juan 6.68-69.

17Jesúsnam nirqan: <<Jonáspa tsurin Simón, allitam nirqunki. Tsënö ninëkipaq manam nunatsu käyitsishurqunki, sinöqa ciëluchö këkaq Teytämi. 18Qamtam niq Pedro#16.18 Pedro nishqanqa rumi ninanmi. kashqëkita. Kë rumi jananchömi iglesiäta sharkatsishaq. Tsë iglesiataqa Satanáspis manam vencinqatsu. 19Qamtam qoykushqëki Teyta Diospa mandakïninman yëkuna llävinkunata. Tsëmi kë patsachö watashqëkiqa ciëluchöpis watashqa kanqa. Kë patsachö paskashqëkiqa ciëluchöpis paskashqam kanqa>>.#16.19 Tsënöpam Jesucristo nirqan pëpa shutinchö yachatsinanpaq apóstol Pedro poderyuq kashqanta.#Mat. 18.18; Juan 20.23.

20Tsënö nirirmi discïpulunkunata nirqan: <<Teyta Dios kachamushqan Cristo kashqäta pitapis ama willayankitsu>>.#16.20 Tsë witsan Israel nunakuna yarpäyarqan Cristuta Teyta Dios kachamuptin Roma nunakunata guërrachö vencinanpaq kashqantam. Tsënö yarpäyaptinpis Jesucristo manam guërrata rurananpaqtsu shamushqa, sinöqa noqantsik rëkur cruzchö wanunanpaqmi. Tsëmi discïpulunkunata nirqan Cristo kashqanta pitapis mana willapäyänanpaq. Wanushqanpita kawarirkamurqa pïmëtapis willapäyänanpaqnam nirqan (Mat. 17.9; 28.19).

Wanunanpaq kanqanta Jesús willakunqan

Marcos 8.31—9.1; Lucas 9.22-27

21Tsëpitanam discïpulunkunata Jesús willapar nirqan: <<Jerusalénmanmi ëwanä. Tsëchömi precisaq Israel nunakuna, mandakuq sacerdötikuna y ley yachatsikuqkuna alläpa jipatsimar wanutsiyämanqa. Tsëpita kima junaqtam kawarimushaq>>.

22Tsënö niptinmi juk läduman qayëkur Pedro piñapar nirqan: <<Teyta, tsëtaqa Teyta Dios ama munëkullätsuntsu. ¡Tsënöqa ama këkullätsuntsu!>>

23Tsënam Pedruman tumëkur Jesús nirqan: <<¡Nöpäpita witikï, Satanás! ¡Ama atäjuta churamïtsu! Qam manam munankitsu Teyta Dios munashqanta ruranäta, sinöqa nuna munashqanta ruranätam munëkanki>>.

24Tsëpitanam discïpulunkunata Jesús nirqan: <<Pipis discïpulü këta munarqa kikin munashqannö ama kawatsuntsu, sinöqa cruzninta apaqnö noqata qatimätsun.#16.24 Jesucristo kawashqan witsanqa pipis cruzninta aparqan wanutsishqa kananpaqmi. Tsëmi cruzninta apaqnö noqata qatimätsun nirqa jutsa rurëpaq wanushqanö kar Jesucristuta qatiränanpaq kashqanta nikan.#Mat. 10.38; Mar. 8.34; Luc. 9.23; 14.27; Juan 12.25. 25Kawëninta salvëta munaq nunaqa kawëninta oqranqam. Kawëninta noqa rëkur oqraq nunanam kawëninta salvanqa.#16.25 Tsënö nirqa Jesucristo kënömi nirqan: <<Kikin munashqannö lluta kawakuqkunaqa manam salvakuyanqatsu. Noqa munanqänö kawaqkunam sï salvakuyanqa>>.#Mat. 10.39; Luc. 17.33; Juan 12.25. 26Infiernuman jitëkushqa kananpaq kaptinqa ¿imapaqtaq sirwin jinantin mundupa duëñun kashqanpis? Alläpa rïcu karpis manam rïcu kashqanwan salvacionta rantinqatsu.

27<<Nunapa Tsurin angelninkunawan y Tëtanpa poderninwan shamurmi#Mat. 25.31. imanöpis kawashqanmannö pitapis juzganqa.#Sal. 62.11-12; Prov. 24.12; Jer. 17.10; Eze. 18.30; 33.20; Rom. 2.6. 28Rasunpam niyaq: Manaraqpis wanurmi wakinniki rikäyanki Nunapa Tsurin mandakuq puëdiq këninwan shamïkaqta>>.

Currently Selected:

Mateo 16: qwhB

Highlight

Copy

Compare