Mateo 17

Jesús chipapëkaq tikrakurinqan

Marcos 9.2-13; Lucas 9.28-36

1Tsëpita joqta junaqtanam Pedruta, Santiaguta y Santiagupa wawqin Juanta pusharkur Jesús ëwarqan jatun kaq jirkaman. 2Tsëchömi rikarëkäyaptin Jesús jukläyaman tikrakurirqan. Tsëmi qaqllanpis intinöraq chipapäkurqan y ratashninkunapis pasëpa yulaq rikakurmi chipaparqanraq. 3Tsëchömi rikäyarqan Moiséswan Elías yurirkur Jesúswan parlëkäyaqta.

4Pedrunam Jesústa nirqan: <<Teyta, allim këchö këkäyä. Munaptikiqa kima tsukllata rurayämushaq: jukta qampaq, jukta Moiséspaq y juktana Elíaspaq>>.

5Pedro tsënö nikashqan höram chipapëkaq pukutë pëkunata tsapärirqan. Pukutëpitanam Teyta Dios kënö nimurqan: <<Pëmi kuyë Tsurï. Pëpitam alläpa kushikü.#Sal. 2.7; Isa. 42.1; Mat. 3.17; 12.18; Mar. 1.11; Luc. 3.22. Pë niyäshushqëkita cäsukuyë>>.#Deut. 18.15; 2Ped. 1.17-18.

6Tsënö nimuqta wiyëkurmi discïpulunkuna alläpa mantsakar patsaman lätakïkuyarqan. 7Tsënö lätarëkäyaptinnam pëkunata yatëkur Jesús kënö nirqan: <<Ama mantsakäyëtsu. Shäriyë>>.

8Tsënö niptin rikarkuyänanpaq Jesúsllana këkänaq.

9Jirkapita urëkäyämushqanchönam Jesús kënö nirqan: <<Jirkachö rikäyashqëkita pitapis ama willakuyankiraqtsu. Nunapa Tsurin wanushqanpita kawarimuptinran willakuyanki>>.

10Discïpulunkunanam Jesústa kënö tapuyarqan: <<Nunapa Tsurin wanunanpaq këkaptinqa ¿imanirtaq ley yachatsikuqkuna niyan puntata Elíasraq shamunanpaq kashqanta?>>#Mal. 4.5.

11Jesúsnam nirqan: <<Rasunpam Elías puntata shamunqa llapanta alistananpaq. 12Tsënö kaptinpis noqam niyaq: Elíasqa shamushqanam.#Mat. 11.14. Pëtaqa pï kashqanta mana reqirmi wanutsiyarqan. Tsënöllam nunapa Tsurintapis wanutsiyanqa>>.

13Jesús tsënö niptinnam discïpulunkuna käyiriyarqan Elíaspaq parlar Bautizakuq Juanpaq parlëkashqanta.

Juk jövinta Jesús kachakätsinqan

Marcos 9.14-29; Lucas 9.37-43a

14Nunakuna juntarëkäyashqanman Jesús chäriptinnam nöpanman qonqurikur juk nuna rowakur nirqan: 15<<Tëtë, tsurïta ankupëkullë. Atäqui tsariptinmi alläpa jipan. Atska kutim ninamanpis yakumanpis jeqan. 16Discïpulïkikunaman apamuptïpis manam kachakätsita puëdiyashqatsu>>.

17Jesúsnam nirqan: <<¡Mana markäkuq jutsasapa nunakuna! ¡Imëyaqraq qamkunawan këkäshaq! ¡Imëyaqraq qamkunata awantayashqëki! Mä tsë jövinta apayämï>>.

18Nöpanman chäratsiyaptinnam jövinta jipatsiq supëta Jesús piñaparqan. Tsëmi supëqa tsë höra jövinpita yarqurir ewkurqan. Tsë hörapitam jövin kachakärirqan.

19Tsëpitanam japallankuna këkar discïpulunkuna Jesústa kënö tapuyarqan: <<Noqakunaqa ¿imanirtaq tsë supëta qarqïta puëdiyarqütsu?>>

20Jesúsnam nirqan: <<Ichiklla markäkurmi qarqïta puëdiyarqunkitsu. Rasunpam niyaq: Mostäzapa murunnö ichikllapis markäkïnikikuna kaptinqa taqë jirkata witikunanpaq niyaptikipis witikurinmanmi.#Mat. 21.21; Mar. 11.23; 1Cor. 13.2. Manam imapis alläpa sasatsu qamkunapaq kanman. 21[Tsënö kaptinpis kënö supëkunataqa qarquyanki ayunarmi y Teyta Diosta mañakurmi]>>.

Wanutsiyänanpaq kanqanta Jesús yapë willakunqan

Marcos 9.30-32; Lucas 9.43b-45

22Galileachö purikarmi discïpulunkunata Jesús kënö nirqan: <<Nunapa Tsurinqa chikiqninkunapa makinman entregashqam kanqa. 23Wanuratsiyaptinpis kima junaqtam kawarimunqa>>.

Tsënö niptinmi discïpulunkuna alläpa llakikuyarqan.

Templupaq impuestuta Pedro paganqan

24Tsëpitanam Capernaúmman discïpulunkunawan Jesús chäriyarqan. Tsëchömi templupaq impuestu cobraqkuna#Éxo. 30.13; 38.26. Pedruta tapur niyarqan: <<Maestrïkiqa ¿manaku templupaq impuestuta pagan?>>

25Pedrunam nirqan: <<Awmi, paganmi>>.

Pedro wayiman yëkurir imatapis manaraq niptinmi Jesús kënö tapurqan: <<Simón, ¿ima ninkitaq? Mandakuq reykuna ¿pitataq impuestuta cobrayan? ¿Marka mayinkunatapisku o forastërukunataku?>>

26Pedrunam nirqan: <<Forastëru nunakunatam, tëtë>>.

Jesúsnam nirqan: <<Rasuntam ninki. Tsurinkunaqa manam pagayantsu. 27Tsënö kaptinpis cobraqkuna mana piñakuyänanpaq qochaman ëwar anzuëluwan pescäduta tsarimï. Punta kaq pescäduta tsarimushqëkipa shiminchömi qellë këkanqa. Tsë qellëwan ishkantsikpita impuestuta pagamï>>.

Currently Selected:

Mateo 17: qwhB

Highlight

Copy

Compare