Mateo 15

Nunakuna llutankunata yarpar impüru tikrayanqan

Marcos 7.1-23

1Tsëpitanam fariseukuna y ley yachatsikuqkuna Jerusalénpita chärir Jesústa tapur niyarqan: 2<<¿Imanirtaq discïpulïkikuna unë castantsikkunapa costumbrinkunata mana cäsushpa mikuyänanpaq makinkunata paqakuyantsu?>>

3Jesúsnam nirqan: <<Qamkunapis ¿imanirtaq Teyta Diospa mandamientunta cumpliyänëkipa rantin costumbrikikunata mas cumplikäyanki? 4Teyta Diospa mandamientun kënömi nikan: <Tëtëkita y mamëkita alli rikanki>.#Éxo. 20.12; Deut. 5.16. Tsënöllam nikan: <Pipis tëtanta o mamanta mana respetaq kaqqa wanutsishqa katsun>.#Éxo. 21.17; Lev. 20.9.

5<<Tsënö niptinpis qamkunaqa kënö nirmi yachëkätsiyanki: <Imëkikunapis Teyta Diosllapaq kashqanta nikarqa mananam tsëkunata yatayankimannatsu tëtëkita ni mamänikita yanapayänëkipaq>. 6Tëtanta y mamäninta manana yanapayänanpaq yachatsirqa Teyta Diospa palabranta manakaqpaqmi churëkäyanki. 7¡Alli tukuq nunakuna! Rasuntachi Isaías qamkunapaq kënö qellqarqan:

8<< <Kë nunakunaqa shiminkunallawanmi respetamaq tukuyan.

Shonqunkunachöqa manam yarpäyämanpistsu.

9Nishqäta yachatsiyänanpa rantinmi nunakuna niyashqanllata yachatsikuyan.

Tsëmi adorayämanqanpis sirwintsu> >>.#Isa. 29.13.

10Nunakunata qayarirnam Jesús kënö nirqan: <<Kë niyashqaqkunata shumaq käyikuyë. 11Manam imatapis mikushqanpitatsu pipis impüru këkan, sinöqa llutankunata parlashqanpitam>>.

12Discïpulunkunanam Jesústa niyarqan: <<¿Käyinkiku tsënö nïkuptiki fariseukuna piñakurkuyanqanta?>>

13Jesúsnam nirqan: <<Ciëluchö këkaq Teytä mana plantashqan qora karmi pëkunaqa chakrapita llupirishqa kayanqa. 14Ama pëkunata cäsuyëtsu. Pëkunaqa wiskupura pushanakuqnömi kayan. Wiskupura pushanakurmi ishkanpis pözuman jeqakurkuyanqa>>.#Luc. 6.39.

15Tsënö niptinnam Pedro kënö nirqan: <<Teyta, mikïman iwalatsikïpa yachatsishqëkita käyïkatsilläyämë>>.#Mat. 15.11.

16Jesúsnam nirqan: <<¿Qamkunapis manaku käyiyankiraq? 17Nunaqa manam mikïta mikushqanpitatsu impüru tikran. Mikunqanqa pachanpita pasakunmi. 18Tsënö kaptinpis shonqunchö mana allita yarpashqanta parlarqa impürum tikran.#Mat. 12.34. 19Nunakunaqa shonqunchö mana allikunata yarparmi nuna mayinta wanutsiyan, casakushqa këkar jukwanraq kakuyan y fornicación jutsata rurayan. Tsënöllam suwakuyan, ulikuyan y nuna mayinta ashayan. 20Tsëkunata rurarmi nunaqa impüru tikran. Manam makinta mana paqakushpa mikurtsu impüru tikran, sinöqa shonqunchö mana allikunata yarparmi>>.

Mana Israel warmi këkar Jesúsman markäkunqan

Marcos 7.24-30

21Tsëpitanam Jesús ëwarqan Tiro y Sidón markakuna lädupa. 22Tsë markakunachömi cananeo niyashqan mana Israel nunakuna täräyan. Tsëmi juk cananea warmi Jesús kaqman ëwar kënö rowakur nirqan: <<¡Davidpa Tsurin Jesús, ankupëkallämë! Warmi wawätam supë löcayätsir alläpa jipatsin>>.

23Tsënö niptin Jesús manam yaskirqantsu. Tsënam discïpulunkuna Jesúsman witïkur kënö rowayarqan: <<Teyta, qaparir qayarirmi taqë warmi qatimantsik. Ewkunanpaq nïkï>>.

24Tsënam tsë warmita Jesús kënö nirqan: <<Oqrakashqa üshanö këkaq Israel nunakunallamanmi Teyta Dios kachamashqa>>.

25Tsënö niptinnam tsë warmi Jesúspa nöpanman qonqurikur nirqan: <<¡Yanapëkallämë teyta!>>

26Jesúsnam nirqan: <<Qamta yanaparqa wamrakunapa tantanta qochirir allqukunata qaraqnömi käman>>.

27Warminam nirqan: <<Awmi, tëtë. Tsënö kaptinpis mësapita shikwaqtaqa allqukunapis mikurilläyanmi>>.

28Jesúsnam nirqan: <<Qam rasunpa markäkamashqëki rëkurmi rowakamashqëkinö kanqa>>.

Tsë höram tsë warmipa wawan kachakärirqan.

Qeshyëkaqkunata Jesús kachakätsinqan

29Tsëpita ewkurnam Jesús Galilea qocha kuchunpa pasarqan. Tsëpitanam juk jirkaman witsarkur tsëchö täkurirqan. 30Tsëmanmi atskaq nunakuna chätsiyarqan weqrukunata, wiskukunata, makllukunata, müdukunata y tukïläya qeshyawan qeshyaqkunatapis. Tsëchömi llapan qeshyaqkunata Jesús kachakätsirqan. 31Tsëmi nunakuna alläpa kushikuyarqan müdukuna parlëkäyaqta wiyar, makllukuna kachakaqtana rikar, weqrukuna purikäyaqta rikar y wiskukuna rikaqta rikar. Tsënö kushikurmi Teyta Diosta alabayarqan.

Chusku waranqa nunakuna mikuyänanpaq milagruta Jesús ruranqan

Marcos 8.1-10

32Tsëpitanam discïpulunkunata qayarir Jesús nirqan: <<Kë nunakunatam alläpa ankupä. Kima junaqnam mikïtapis mana llamishpa noqantsikwan këkäyan. Mallaqta qarquriptïqa wayinkunamanpis manaraq charmi ishkiriyanqa>>.

33Discïpulunkunanam niyarqan: <<Kë chusyaq jirkachöqa ¿mëchöraq mikïta tarishun këtsikaq nunakunapaq?>>

34Jesúsnam tapurqan: <<¿Ëkallataq tantëkikuna këkan?>>

Pëkunanam niyarqan: <<Qanchis tantawan juk ishkë pescädullam, tëtë>>.

35Tsënö niyaptinmi Jesús nunakuna täkuriyänanpaq nirqan. 36Täkuriyaptinnam pescäduta y qanchis tantata tsarirkur Teyta Diosman mañakur payllä nikurqan. Tsëpitanam tantata pakirir discïpulunkunata makyarqan nunakunata rakiyänanpaq. 37Tsënam pacha junta llapan mikuyarqan. Katunkunatanam qanchis canasta juntata discïpulunkuna ëlluriyarqan. 38Tsëchö mikuqkunaqa chusku waranqanömi (4,000) ollqukunalla kayarqan. Warmikuna y wamrakunatanäqa manam yupayaqtsu.

39Nunakunata despidirirnam barcuman lloqarkur discïpulunkunawan Magdala partiman Jesús ewkuyarqan.

Currently Selected:

Mateo 15: qwhB

Highlight

Copy

Compare