Daniel 3

Qoripita rurashqa nuna niraqta adorayanqan

1Tsëpitanam rey Nabucodonosor qoripita ruratsirqan juk nuna niraqta. Tsë nuna niraqtam ruratsirqan kima chunka (30) metru altuta y kima metru anchuta. Tsë nuna niraqtam shäritsirqan Babilonia provinciachö këkaq Dura niyashqan pampachö. 2Tsëpitanam qayatsimurqan nacionta mandakur yanapaqninkunata, prefectukunata, gobernadorkunata, käyitsiqkunata, tesorërukunata, juezkunata, markachö autoridäkunata y provinciakunachö këkaq wakin autoridäkunatapis. Pëkunata qayatsimurqan nuna niraqta sharkatsishqanpita kushikur fiestata rurayänanpaqmi. 3Tsënö qayatsiptinmi nacionta mandakur yanapaqninkuna, prefectukuna, gobernadorkuna, käyitsiqkuna, tesorërukuna, juezkuna, marka autoridäkuna y provinciakunachö këkaq wakin autoridäkunapis nuna niraqta sharkatsishqan kaqman llapan ëllukäyarqan.

4Tsëchömi willakuq nuna qaparipa qayakur nirqan: <<Jinantin markakunapita y nacionkunapita shamuqkuna, tukïläya idiömata parlaq karpis, shumaq wiyayämë. 5Imë hörapis cornëta, këna, taksha arpa, guitärra, jatun arpa, zampöña y mas wakin instrumentukuna waqamushqanta wiyëkur juk yarpëlla llapëki rey Nabucodonosor shäritsishqan nuna niraqta adorayänëkipaq qonqurikuyë. 6Mëqëkipis tsë nuna niraqta qonqurikur mana adorayaptikiqa tsë höram alläpa achachashqa jornuman jitashqa kayanki>>.

7Órden mantsaripaq kaptinmi instrumentukunata tocayämushqanta wiyëkur llapan markakunapita y nacionkunapita shamuq nunakuna ima idiömata parlaq karpis qonqurikur rey Nabucodonosor sharkatsishqan qoripita nuna niraqta adorayarqan.

8Tsëpitanam juk ishkë Babilonia#3.8 Hebreo idiömachöqa Caldea ninmi. Caldeaqa Babiloniapa juk kaq shutinmi këkan. nunakuna ëwayarqan rey kaqman. Chärirmi Israel nunakunapa contran 9Nabucodonosorta kënö niyarqan: <<¡Qamlla imëyaqpis rey këkullë! 10Qammi ordenarqunki cornëtata, kënata, taksha arpata, guitärrata, arpata, zampöñata y mas wakin instrumentukunatapis waqamuqta wiyëkurnin qoripita ruratsishqëki nuna niraqpa nöpanman qonqurikur llapanpis adorayänanpaq. 11Tsënöllam ordenarqunki qonqurikur nuna niraqta mana adoraq kaqtaqa achachashqa jornuman jitatsinëkipaq. 12Tsënö ordinëkaptikipis kayanmi Babilonia provinciaman yanapayäshunëkipaq churashqëki juk ishkë Israel nunakuna nishqëkita mana cäsukuq. Tëta rey, qam adorashqëki dioskunata pëkunaqa manam adorayantsu. Tsë nunakunaqa ruratsishqëki qori nuna niraqta adorayänanpaq ordinëkaptikipis manam adorëkäyantsu. Tsë nunakunaqa Sadrac, Mesac y Abed-negum kayan>>.

13Tsënö niyaptinmi Nabucodonosorqa alläpa piñashqa qayatsimurqan Sadracta, Mesacta y Abed-neguta. Tsë jövinkuna reypa nöpanman chäriyaptinmi 14Nabucodonosor kënö nirqan: <<¿Rasunpaku qamkunaqa diosnïkunatapis y qoripita ruratsishqä nuna niraqtapis adorayankitsu? 15Kanan cornëtata, kënata, taksha arpata, guitärrata, arpata, zampöñata y wakin instrumentukunatapis waqamuqta wiyëkur juklla qonqurikur ruratsishqä nuna niraqta adorayë. Mana adorayaptikiqa alläpa achachashqa jornumanmi jitatsiyashqëki. Tsënö rurayaptiq ¿ima diosraq makïpita salvayäshunki?>>

16Tsënam Sadrac, Mesac y Abed-nego Nabucodonosorta kënö niyarqan: <<Tëtë rey, tsëpitaqa manam imatapis niyäshaqtsu. 17Achachashqa jornuman jitëkayämaptikipis sirwiyashqä Teyta Diosnïmi tsë jornupita y makikipitapis salvayämanqa. 18Jina mana salvayämaptinpis noqakunaqa manam diosnikikunata sirwiyäshaqtsu ni tsë ruratsishqëki nuna niraqtapis manam adorayäshaqtsu>>.

Achachashqa jornupita Teyta Dios salvanqan

19Sadrac, Mesac y Abed-nego tsënö niyaptinmi Nabucodonosor pukayëparaq piñarkurnin jornu achachätsiqkunata ordenarqan qanchis kuti mas achachätsiyänanpaq. 20Tsëpitanam puëdiq kaq soldädukunata mandarqan Sadracta, Mesacta y Abed-neguta pankarkur achachashqa jornuman jitëkuyänanpaq. 21Tsënömi tsë jornuman jitëkuyarqan cäpantawan, llanqintawan, peqan wankukuyänantawan y llapan yakarashqan ratashnintawan. 22Raslla jitëkuyänanpaq rey ordenaptinmi jornu alläpa achachashqa kar jitaq soldädukunata ruparirqan. Tsëmi Sadracta, Mesacta y Abed-neguta jitaq soldädukuna juklla wanuriyarqan. 23Jitëkuyaptinmi tsë jövinkunaqa makin chakin pankashqa jornu rurinchöna mäkayämurqan.

24Tsë höram tëkashqanpita sharkur Nabucodonosor alläpa espantashqa käyitsiqninkunata kënö nirqan: <<¿Manaku pankarkur kiman jövinkunata jornuman jitatsiyarqunki?>>

Tsënö niptinmi pëkuna kënö niyarqan: <<Awmi, tëta rey>>.

25Reynam kënö nirqan: <<¡Jornu rurinchö chuskuq nunakuna kachëlla y yamëlla purikaqtam rikëkä! ¡Pëkunawan këkaq nunaqa juk dios niraqmi këkan!>>

26Nirirnam Nabucodonosor jornu kaqman ëwëkur qayakurqan: <<¡Puëdiq Diosta adoraq Sadrac, Mesac y Abed-nego! ¡Yarqamur shayämï!>>

Tsënam kiman jövinkuna jornupita yarqayämurqan. 27Yarqarayämuptinmi pëkuna kaqman mandakur yanapaq nunakuna, prefectukuna, gobernadorkuna y willapäkuqkuna rikäyänanpaq ëllukäyarqan. Tsëchömi rikäyarqan tsë jövinkunata ichikllapis nina mana rupanqanta. Ni aqtsankunallapis ni ratashninkunapis manam rupashqatsu karqan. Manam ni rupashqanöllapis asyäyarqantsu.

28Tsëmi Nabucodonosor kënö nirqan: <<Sadrac, Mesac y Abed-nego adorayashqan Dios alabashqa këkullätsun. Pëmi angelninta kachamushqa salvananpaq. Diosninman markäkurmi noqa ordenashqätapis cäsuyashqatsu. Pëkunaqa juk dioskunata adorayänanpa rantin wanuriyänanpaqpis listum kayashqa. 29Manam ima Diospis tsënöqa salvantsu. Pï nunatapis Sadrac, Mesac y Abed-nego adorayashqan Diospa contran parlaq kaqtaqa ichik ichikllaman roquyätsun. Wayinkunatapis kayayätsun. Tsënö katsun më nacionpita kaptinpis y ima idiömata parlaptinpis>>.

30Tsëpitanam Sadracta, Mesacta y Abed-neguta Nabucodonosor churarqan Babilonia provinciachö mandakuq autoridä kayänanpaq.

Currently Selected:

Daniel 3: qwhB

Highlight

Copy

Compare