Daniel 2

Mandakuq Nabucodonosor suëñunqan

1Ishkë watana Nabucodonosor rey këkarmi yapëkuryan tsëllata suëñukïkurqan. Tsëmi alläpa llakikur punïtapis tarirqantsu. 2Suëñushqan imapaq kashqantapis willayänanpaqmi rey qayatsimurqan adivïnukunata, brüjukunata, suerti qatiqkunata y qoyllur estudiaqkunata. Llapan qayatsishqankuna nöpanman ëllukäriyaptinnam 3rey kënö nirqan: <<Suëñushqä imapaq kashqantapis mana musyarmi alläpa llakishqa këkä>>.

4Tsëmi tsë yachaq nunakuna arameo idiömachö kënö niyarqan: <<¡Qamlla imëyaqpis rey këkullë! Suëñushqëkita willayämë imapaq kashqantapis willayänaqpaq>>.

5Tsënö niyaptinmi rey Nabucodonosor pëkunata kënö nirqan: <<Manam willayashqëkitsu. Imata suëñushqäta y imapaq tsë suëñu kashqanta mana willayämaptikiqa pedäzu pedäzu roquyäshunëkipaq y wayikikunatapis juchutsir ushayänanpaqmi mandashaq. 6Mëqëkipis imata suëñushqäta y imapaq tsë suëñu kashqantapis willarayämaptikiqa llapan nunakuna respetayäshunëkipaqmi churayashqëki y imëkatapis qarayashqëkim. Kanan jinallachö willayämë ima suëñushqäta y suëñushqä imapaq kashqantapis>>.

7Tsënö niptinmi yapë kënö niyarqan: <<Tëta rey, imata suëñushqëkitapis willarayämaptikiqa willayashqëkim suëñushqëki imapaq kashqantapis>>.

8Tsëmi rey Nabucodonosor kënö nirqan: <<Imata suëñushqätapis manam willayashqëkitsu. Qamkunaqa nishllapam tiemputa pasëkäyanki. 9Suëñushqäta mana willayämaptikiqa llapëkitam ushakätsiyashqëki. Qamkunaqa willanakuyarqunki ulipämar engañayämänëkipaqmi. Tsënö nishllapam ushakätsiyänaqpaq kaqta qonqarinäta munëkäyanki. Kanan jinallachö willayämë imata suëñushqätapis. Tsënöpam musyashaq suëñushqä imapaq kashqantapis asertayanqëkita>>.

10Tsënam yachaq nunakuna reyta kënö niyarqan: <<Pipis manam kë patsachö kantsu imata suëñushqëkita willashunëkipaq. Alläpa puëdiq karpis manam mëqan reypis adivïnukunata, brüjukunata o qoyllur estudiaqkunata mañakayämashqëkinö mañakushqatsu. 11Tëta rey, mañakayämashqëkiqa alläpa sasam këkan. Nunaqa tsëta manam musyantsu, sinöqa dioskunallam. Pëkunaqa manam noqantsikwantsu këkäyan>>.

12Tsënö niyaptinmi rey alläpa piñakur ordenarqan Babiloniachö llapan yachaq nunakunata chipyëpa ushakätsiyänanpaq. 13Ordinta rurarkatsirmi jinantin nacionpa apatsirqan llapan yachaq nunakunata wanutsiyänanpaq. Tsëmi Danielta y yanaqinkunatapis ashitsirqan wanutsiyänanpaq.

14Tsë ordinwanmi reyta cuidaq soldädukunapa capitannin ëwarqan Babiloniachö këkaq yachaq nunakunata wanutsinanpaq. Tsë nunapa shutinmi karqan Arioc. Daniel kaqman chäriptinmi Danielqa shumaq yarpakachärir 15nirqan: <<¿Imataq kashqa rey tsënö raslla ordenakunanpaq?>>

Tsëmi Danielta Arioc willarqan imanir wanutsita munashqanta. 16Tsënö willaptinmi Danielqa rey Nabucodonosorman ëwëkur mañakurqan: <<Ichiklla shuyëkallämë tsë suëñukunqëki imapaq kashqantapis willanaqpaq>>.

17Tsëpitanam wayinman Daniel kutikur Ananíasta, Misaelta y Azaríasta willarqan rey imanir yachaq nunakunata wanutsita munashqanta. 18Tsëpitanam pëkunata kënö nirqan: <<Ciëluchö këkaq Teyta Diosta mañakïkulläyë rey imata suëñushqantapis käyïkatsimänanpaq. Mana käyitsimaptinqa Babilonia nacionchö yachaq nunakunatapis y noqantsiktapis wanutsimäshunmi>>.

19Tsë paqasmi Danielta Teyta Dios revelarqan Nabucodonosor imata suëñushqanta y imapaq tsë suëñu kashqantapis. Tsëmi Danielqa ciëluchö këkaq Teyta Diosta alabarnin 20nirqan:

<<Teyta Dios, imëpis alabashqa këkullë.

Qampitam yachëpis y poderpis shamun.

21Qam munaptikim imëkapis pasakun.

Qammi tiempukunatapis patsakätsinki.

Reykunatapis churanki y trocanki.

Yachaqkunatapis yachëta qonki.

Käyikuqkunatapis käyitsinki.

22Pipis mana käyishqantam qam musyatsinki.

Qampaqqa llapanpis aktsichönömi këkan.

23Unë castäkuna adorayashqan Teyta Dios, qamtam payllä nikur alabëkuq.

Mañakullashqaqta wiyamarmi yachëta qomar shumaq musyatsimarqunki rey Nabucodonosor imata suëñushqantapis>>.

24Tsëpitanam Daniel ëwarqan Ariocwan parlananpaq. Arioctam rey ordenashqa karqan yachaq nunakunata wanutsinanpaq. Tsëmi pëta Daniel kënö nirqan: <<Tëtë, Babiloniachö këkaq yachaq nunakunata ama wanïkatsitsu. Tsëpa rantinqa reypa nöpanman pushëkamë. Suëñushqan imapaq kashqantapis noqam willashaq>>.

25Tsënö niptinnam Arioc tsë höra Danielta pusharqan rey kaqman. Chëkatsirnam nirqan: <<Tëta rey, Judápita prësu shamuqkunachömi tarirqü alli yachëyuq jövinta. Pëmi willashunki suëñushqëki imapaq kashqantapis>>.

26Tsënö nïkuptinmi Beltsasar shutiyuq Danielta Nabucodonosor kënö tapurqan: <<¿Rasunpaku qam willamanki imata suëñushqätapis y imapaq tsë suëñunqä kashqantapis?>>

27Tsënö tapuptinmi Daniel kënö nirqan: <<Tëta rey, suëñushqëkita ¿piraq käyitsishunkiman? Manam yachëyuqkunapis, brüjukunapis, adivïnukunapis ni suerti qatiqkunapis puëdiyanqatsu. 28Tsënö këkaptinpis ciëluchö këkaq Teyta Diosmi nuna mana käyishqan kaqta revelan. Pëmi suëñïnikichö musyatsishurqunki shamuq watakuna imanö kananpaq kashqanta. Kanan willashqëki suëñïnikichö imata rikashqëkitapis.

29<<Tëta rey, cämëkichö jitarëkarmi warë warätin ima pasananpaq kaqtapis yarpakachëkarqëki. Tsëmi punïkaptiki imapis pasananpaq kaqkunata Teyta Dios revelashurqunki. 30Manam wakin nunakunapita mas yachaq kaptïtsu tsë suëñushqëkita musyatsimashqa, sinöqa imapaq kashqantapis musyanëkipaqmi.

31<<Tëta rey, suëñïnikichömi rikëkurqunki jatun nuna niraqta. Tsë nuna niraqmi mantsanëpaq chipapëkar lädïkichö shäkïkashqa. 32Peqanmi kashqa qori pürupita. Pëchun y rikrankunam kashqa qellëpita. Pachan y titaq chankankunanam kashqa broncipita. 33Qonqunpita utsuputunyaqmi fiërrupita kashqa. Chakinkunanam kuwashqa mituwan y fiërruwan takushqa kashqa.

34<<Rikarëkaptikim juk rumi tsë nuna niraq këkanqanman qochpakämushqa. Tsë rumi tsënö qochpakämushqa pipis mana kumëkämuptinmi. Fiërrupita y mitupita rurashqa chakinman ratëkurmi tsë nuna niraqta shallurishqa. 35Tsëmi mitupita, fiërrupita, broncipita, qellëpita y qoripita nuna niraqta allpayäratsishqa. Imëka usya tiempu ërachö trïguta jalutsiyaptin polvu tikrashqannömi tsë nuna niraq polvu tikrarishqa. Tsë polvuta vientu apakuptinmi imapis quedashqanatsu. Nuna niraqta shallushqa rumiqa jatun jirka tikrarirmi jinantin patsaman juntarishqa.

36<<Tsëtam suëñurqunki, tëta rey. Imapaq kashqantapis kananmi käyitsishqëki. 37Ciëluchö këkaq Teyta Diosmi churashurqunki llapan reykunapitapis mas puëdiq y pïmëpitapis alli reqishqa kanëkipaq. 38Tsënöllam qampa podernikiman churamushqa mëtsëchö täraq nunakunata, llapan animalkunata y llapan päriqkunatapis#2.38 Wakin nunakunaqa bolaqkunatapis niyanmi.. Teyta Diosmi churashurqunki pëkunapa mandakuqnin kanëkipaq. Tsëmi suëñïnikichö rikanqëki nuna niraqpa qori peqan qam këkanki.

39<<Qam mandakushqëki nacionkunataqa juk nacionmi vencir munëninchö tsararanqa. Imanö kaptinpis tsë nacionqa qam mandashqëki nacionpita manam mas puëdiqtsu kanqa. Tsëpitam juk nación shamunqa llapan nacionkunata mandananpaq. Tsë nacionqa broncinö fuerti karmi kë jinantin patsata munëninchö tsaranqa. 40Tsëpitanam juk nacionna llapan nacionkunata vencir mandanqa. Tsë nacionmi fiërrunö fuerti kanqa. Fiërru imatapis pakir ushakätsinqannöllam tsë nacionpis wakin nacionkunata polvuman tikraratsinqa.

41<<Tëta rey, nuna niraqpa chakinkuna fiërrupita y kuwashqa mitupita kashqantam rikëkurqunki. Tsëqa këkan tsë ultimu kaq nación nunakuna juk yarpëwan juk yarpëwan kayänanpaq kashqanmi. Tsënö këkarpis fiërrunö fuertim kanqa. 42Chaki dëdunkuna fiërrupita y mitupita kashqannömi tsë nacionpis fiërrunö fuerti kanqa y mitunö débil kanqa. 43Fiërruwan y mituwan chakinkuna takushqa kayashqanta rikashqëkinömi tsë nacionpa reyninkunapis poderninchö këkaq reykunawan pactuta rurayanqa yanapanakuyänanpaq. Tsënö rurarpis imëka fiërrutawan mituta takukätsita mana puëdishqantsiknömi tsë nación nunakunapis munëninchö këkaq nación nunakunawan takukëta puëdiyanqatsu.

44<<Tsë reykuna mandakïkäyänan witsan ciëluchö këkaq kikin Teyta Diosmi mandakur qallëkunqa. Pëpa mandakïninqa manam imëpis ushakanqatsu ni pëtaqa manam pipis vencinqatsu. Tsëmi pë imëyaqpis mandakuq kar wakin mandakuqkunata wanutsir ushakätsinqa. 45Tsënö kananpaqmi suëñïnikichö rikëkurqunki jirkapita qochpakämuq rumita. Tsë rumiqa pipis mana kumëkämuptin qochpakämurmi fiërrupita, broncipita, qellëpita, mitupita y qoripita nuna niraqman char shallushqa. Tëta rey, tsënö kananpaqmi Teyta Dios revelashurqunki. Tsënö pasanqa tiempun chämuptinmi. Tsë suëñushqëkiqa rasunpam pasakunqa. Imapaq kashqanta willashqaqpis rasunpam këkan>>.

46Tsënö nïkuptinmi rey Nabucodonosorqa urkunpis patsaman chashqanyaq Danielpa nöpanman qonqurikïkurqan. Tsëpitanam ordenarqan tsaki mikï ofrendakunata pëta qoykuyänanpaq y inciensuwan sawmayänanpaq. 47Nabucodonosornam Danielta kënö nirqan: <<Sirwishqëki Diosqa llapan dioskunapa Diosninmi y llapan reykunapapis reyninmi këkan. Llapan ima pasananpaq kaqtapis revelaq karmi revelashurqunki imapaq suëñushqätapis willamänëkipaq>>.

48Tsëpitanam jinantin Babilonia provinciachö gobernador kananpaq Danielta rey churarqan y imëkatapis qararqan. Tsënöllam yachaq nunakunapa mandakuqnin kananpaq churarqan. 49Tsënam reyta Daniel mañakurqan Sadracta, Mesacta, Abed-neguta Babilonia provinciakunachö alli puestukunaman churëkunanpaq. Kikin Danielnam quedarirqan reypa palaciunchö.

Currently Selected:

Daniel 2: qwhB

Highlight

Copy

Compare