1 Corintios 9

Mañakunanpaq derëchun kaptinpis Pablo mana mañakunqan

1¿Manaku libri këkä? ¿Manaku apostolpis këkä? ¿Manaku Señor Jesucristutapis rikarqü?#Hech. 9.3-6; 1Cor. 15.8. ¿Manaku qamkunapis willapäyaptiqraq Jesucristuta chaskikuyarqunki? 2Wakinkuna apóstol kashqäta mana käyiyaptinpis qamkunaqa käyiyankim. Tsëmi willapashqäta creyir Jesucristuman markäkïkäyanki. 3Apóstol kashqäta manakaqpaq churamaqkuna käyikuyänanpaqmi tsënö niyaq.

4Apóstol këkarqa noqakunapis willakuyashqäpita mikuyänäpaq y upuyänäpaq derëchükuna kanmi. 5Noqakunapis wakin apostolkunanö, Señor Jesucristupa wawqinkunanö y Cefasnö#9.5 Cefasqa Simón Pedrupa juk kaq shutinmi karqan. juknï juknïmi warmïkunawan puriyänäpaq derëchükuna kan. 6¿Imanirtaq yarpäyanki Bernabéta y noqallata mana yanapayämänëkipaq kashqanta? 7¿Mëqan soldädutaq kikinpa gastunwan soldädu këman yëkun? ¿Pï nunataq plantashqan üvaspa wayïninta mikuntsu? Tsënölla ¿pï nunataq mitsishqan chiwanpa o wäkanpa lichinta upuntsu?#9.7 Pablo tsënö nirqan willakushqanpita chaskinanpaq derëchun kashqanta käyitsinanpaqmi.

8Tsëtaqa manam kikïpa yarpënïllapitatsu niyaq. Moisés qellqashqan leykunachöpis tsëpaqqa qellqarëkanmi. 9Tsëchömi kënö qellqarëkan: <<Ërachö trïguta jalutsir töruman ama bozalnin churayankitsu>>.#Deut. 25.4; 1Tim. 5.18.

Teyta Dios tsënö nirqan ¿törukunapaqku 10o noqantsikpaqku? Tsënö qellqarëkan noqantsikpaqmi. Yapyapakuqpis trïgu wilupakuqpis pëllëta chaskiyänan rëkurmi uryapukuyan. 11Noqakunapis Jesucristupa willakïninta qamkunata willapar muruta muruq cuentam kayarqü. Tsëmi cosëchachö pëllëta chaskiqnö qamkunapita imallatapis chaskiyäman. 12Wakintapis yanapëkarqa noqakunata masmi yanapayämankiman.

Yanapayämänëki këkaptinpis manam mañakuyashqaqtsu. Tsëpa rantinmi Jesucristupa willakïninta chaskikuyänëkipaq ima tsapapis mana kananta munar jiparpis upälla kakuyarqü. 13¿Manaku musyayanki templuchö y altarchö uryaqkunaqa templuman apayashqan mikïkunapita mikuyashqanta?#Deut. 18.1. 14Tsënöllam Jesucristupa willakïninta willakuqkunapis willakuyashqanpita chaskiyanman. Tsënö kananpaqmi Señor Jesucristupis nirqan.#Mat. 10.10; Luc. 10.7.

15Tsënö chaskinäpaq derëchü kaptinpis manam imëpis mañakuyarquqtsu ni kananpis manam mañakuyaqtsu. Noqapa käyikïnïpitaqa mañakuyänaqpa rantin mejor wanukümanpis. Mana mañakuyashqaqpita manam llakikütsu, sinöqa kushikümi.

16Jesucristupa alli willakïninta imëkanöpapis willakunä kaptinmi willakushqäpita alabakütsu. Mana willakuptïqa ¡Teyta Dios castigamätsun!#Jer. 20.9; Amós 3.8. 17Kikïpa yarpënïllapita willakurqa yanapayämänëkipaq mañakuyaqmanmi karqan. Tsënö kaptinpis Teyta Dios willakunäpaq churamashqa kaptinmi mana mañakushllapa willakïkä.

18[Jesucristupa] alli willakïninta willakushqäpita qellëta mana chaskiptïpis jukmi pägü këkan. Tsë pägüqa këkan willakushqäpita mañakunäpaq derëchü këkaptinpis mana mañakïllapa willakushqämi.

19Noqa libri karpis nunakuna käyikur salvakuyänanpaqmi llapan nunakunapa esclävun cuenta këkä. 20Tsëmi Israel nunakunawan ëllukarqa pëkuna kawayashqannö noqapis kawëkä. Moisés qellqashqan leykunata pëkuna cumpliyashqannömi noqapis cumplikä. Tsë leykunapa munëninchö mana karpis tsënö kawä Israel nunakuna käyikur Jesucristuta chaskikuyänan rëkurmi.

21Tsënöllam Moisés qellqashqan leykunata mana cäsukuq nunakunawan ëllukarpis pëkuna kawayashqannö kawëkä. Tsënö kawëkä pëkunapis Jesucristuta chaskikuyänan rëkurmi. Pëkunawan ëllukar Moisés qellqashqan leykunata mana cumplirpis jutsata mana rurashpam Jesucristo munashqannölla kawëkä.

22Tsënöllam mana käyiqkunawan ëllukarpis pëkuna kawayashqannö noqapis kawä.#1Cor. 8.13. Tsënö kawä Jesucristuman markäkuyänan rëkurmi. Tsënöpam nuna imanö kaptinpis tsë nunanö kawä. Tsënö kawä wakinllapis salvakuyänanpaqmi. 23Llapantapis rurä Jesucristupa alli willakïninta nunakuna chaskikuyänan rëkurmi. Tsënöpam Jesucristuta chaskikur kushikuyashqannö noqapis kushikushaq.

24Qamkuna musyayankim atskaq ëqirpis alli ëqiq kaqlla premiuta chaskishqanta. Qamkunapis Teyta Diospita premiuta chaskiyänëkipaq shumaq kawakuyë. 25Ëqiqkuna shumaq alistakuyashqanta käyikuyë. Pëkuna tsënö alistakuyan ganar ushakaq corönata chaskiyänanllapaqmi. Noqantsikmi sï alistakïkantsik mana ushakaq corönata chaskinantsikpaq. 26Tsëmi llallinakïchö pantar juk lädupa ëqiq nunanötsu ni pelyachö vientullata kutaq nunanötsu kawä. 27Tsëpa rantinqa ëqinanpaq alistakuq nuna imanö jiparpis alistakuyashqannömi noqapis Teyta Dios munashqannö imanö jiparpis kawëkä. Mana tsënö karqa wakinta shumaq yachatsirpis Diospa nöpanman manachi kikïpis chämantsu.

Currently Selected:

1 Corintios 9: qwhB

Highlight

Copy

Compare