1 Corintios 10

Ïdulukunata mana adorayänanpaq yachatsinqan

1Wawqikuna y panikuna, musyayankim unë markäkuq mayintsikkunata ima pasashqantapis. Pëkunaqa pukutë rurinllapam ëwayarqan#Éxo. 13.21-22. y Puka Lamarpam pasayarqan.#Éxo. 14.22-29. 2Moiséswan pukutë rurinpa ëwashqa karmi y lamarpa pasashqa karmi llapanpis bautizakushqanö rikakuyarqan. 3Teyta Dios churashqan mikïkunatapis llapanmi mikuyarqan.#Éxo. 16.35. 4Teyta Dios qaqapita yarqatsimushqan yakutapis llapanmi upuyarqan.#Éxo. 17.6; Núm. 20.11. Tsë qaqaqa Jesucristum karqan. Israel nunakuna ëwayashqanpam Jesucristupis ëwarqan. 5Tsënö kaptinpis Teyta Diosta atskaqmi cäsukuyarqantsu. Tsëmi pëkunaqa chusyaq jirkachö wanushqa jitarëkar quedayarqan.#Núm. 14.29-30. 6Llapan tsëkuna pasarqan noqantsik käyikur pëkunanö jutsata mana ruranantsikpaqmi.

7Tsënö këkaptinqa ïdulukunata ama adorashuntsu. Israel nunakuna ïdulukunata adorayashqanpaqmi Teyta Diospa palabranchöpis kënö qellqarëkan:

<<Llapankunam tëkur mikuyarqan y machayarqan.

Kushikurmi jukninpis jukninpis jutsata rurar kakuyarqan>>.#Éxo. 32.6.

8Tsënölla fornicación jutsata ama rurashuntsu. Israel nunakuna tsënö kawayashqanpitam Teyta Dios juk junaqllachö ishkë chunka kima waranqa (23,000) nunakunata ushakätsirqan.#Núm. 25.1-18.

9Tsënölla Señornintsik Jesucristuta kikintsik munashqantsikta rurananta ama munashuntsu. Wakin Israel nunakuna Diosta tsënö ruratsita munayaptinmi culebrawan kanitsir Teyta Dios ushakätsirqan.#Núm. 21.5-6.

10Tsënölla Diospaqqa ama imatapis mana allita rimayëtsu. Israel nunakuna tsënö mana allita rimayaptinmi wanutsikuq ángel pëkunata ushakäratsirqan.#Núm. 16.41-49.

11Unë Israel nunakunata tsënö pasashqankunam Teyta Diospa palabranchö qellqarëkan ushanan junaqkunachö noqantsik kawaqkuna käyikunantsikpaq. 12Tsënö këkaptinqa paqtam Teyta Dios munashqannö alli kawëkäyashqëkita yarpar jutsata rurayankiman. 13Llapan pruëbakuna pasayäshushqëkim wakin nunakunatapis pasan. Pruëbaman churayäshurnikipis Teyta Dios manam jaqiyäshunkitsu. Tsëmi pruëbakunata awantar jutsaman mana ishkiyänëkipaq imëpis yanapayäshunki.#Mat. 6.13.

14Kuyë wawqikuna y panikuna, tsënö këkaptinqa ïdulukunata ama adorayëtsu. 15Käyikuq nunakuna këkarqa nishqä rasunpa kashqanta käyikuyë. 16Santa Cënapaq noqantsik ëllukar bendición cöpapita#10.16 Pascua mikïchö chusku cöpatam Israel nunakuna upuyan. Punta kaq cöpapa shutinmi këkan santificación cöpa. Ishkë kaq cöpapa shutinmi këkan liberación cöpa. Kima kaq cöpapa shutinnam këkan bendición cöpa. Tsë cöpata upuyan mikïta usharirmi. Chusku kaq cöpapa shutinmi këkan restauración cöpa. Pascua mikïchö kima kaq cöpata tsararkurmi Jesucristo willarqan wanuptin Teyta Dios mushuq pactuta cumplinanpaq kashqanta (Mat. 26.27-28; Mar. 14.23-24; Luc. 22.20). Tsëmi kë textuchö bendición cöpapaq parlarqa Santa Cënachö upushqantsik vïnupaq parlëkan. upur ¿manaku yarpantsik Jesucristo noqantsik rëkur yawarninta jichanqanta? Jina tantata pakinakur ¿manaku yarpantsik Teyta Dios salvamänantsikpaq Jesucristo cruzchö wanunqanta?#Mat. 26.26-28; Mar. 14.22-24; Luc. 22.19-20. 17Santa Cënachö juk tantallata mikur atskaq karpis juk cuerpullam këkantsik. 18Israel nunakunapa sacerdötinkunapis Teyta Diosta adorayänan altarchö pishtayashqan ëtsata mikur ¿manaku Teyta Dioswan jukllëllanö këkäyan?

19Shumaq käyikushun. Ïdulukunaqa manam kawantsu. Ïdulukunapaq altarman churayashqan ëtsapis kashqan ëtsallam. 20Tsënö kaptinpis ïdulukunapaq churayashqan ëtsaqa manam Teyta Diospaqtsu këkan, sinöqa supëkunapaqmi. Noqaqa manam munätsu supëkunapaq kaqkunata mikuyänëkita.#Deut. 32.17. 21Qamkunaqa Santa Cënachö vïnuta upïkar supëkunapaq jichayashqan vïnutapis manam upuyankimantsu. Jina Santa Cënachö tantata mikïkar supëkunapaq churayashqan mikïtapis manam mikuyankimantsu.#2Cor. 6.15-16. 22¿Teyta Diosta piñatsitaku munëkäyanki? ¿Noqantsik pëpita mas puëdiqku këkantsik?#Éxo. 20.5; Deut. 32.21.

Teyta Dios alabashqa kananpaq imatapis ruranantsikpaq ninqan

23Munayashqëkita rurayänëkipaq librina këkäyashqëkita nirpis manam llapantatsu rurayankiman. Jina manam llapan rurayashqëkikunatsu wawqikuna y panikuna alli kawayänanpaq yanapan.#1Cor. 6.12. 24Kikintsiklla alli kawanantsikpaqqa ama yarpakachäshuntsu, sinöqa wakinkunapis alli kawayänanpaq yarpakachäshun.

25Mercäduchö ëtsata rantirqa ïdulukunapaq pishtayashqanta o mana pishtayashqantapis mana tapukushllapa rantiyë. Rantirpis ama yarpakachäyëtsu. 26Teyta Diospa palabranmi nin: <<Teyta Diospam kë patsapis y kë patsachö kaqkunapis>>.#Sal. 24.1; 50.12; 89.11.

27Tsënölla Teyta Diosman mana markäkuq nuna mikuyänëkipaq qayatsiyäshuptiki mana tapukushllapa llapan qarayäshushqëkita mikuyë. 28Tsëpa rantinqa pipis <<tsë ëtsata ïdulupaqmi churashqa>> nishuptikiqa tsë willashuqniki nunata respetar ama mikuyëtsu. 29Manam kikikikuna rëkurtsu mana mikuyänëkipaq nikä, sinöqa willashuqniki nuna mana allita mana yarpänanpaqmi.#1Cor. 8.7-12.

Tsënö niptï capaz wakinniki kënö niyankiman: <<Nunakuna mana allita yarpäyaptinllaqa ¿imanirtaq ëtsata mana mikümantsu? 30Teyta Diosta payllä nikurir mikuptïqa manam pipis penqapäyämanmantsu>>.

31Tsënö niyaptikipis noqam niyaq: Mikurpis, upurpis y imata rurarpis Teyta Dios alabashqa kananpaq rurayanki. 32Tsënö këkaptinqa Israel nuna o mana Israel nuna kaptinpis o Diosman markäkuq mayiki kaptinpis rurayashqëkita rikar Diosman markäkuyashqanta jaqiriyänan kaptinqa tsë rurayashqëkita amana rurayankinatsu. 33Noqapis manam kikïllapaqtsu alli kawëta munä, sinöqa llapanchöpis nuna mayïkuna alli kawayänantam munä tsënöpa atskaq salvakuyänanpaq.

Currently Selected:

1 Corintios 10: qwhB

Highlight

Copy

Compare