1 Corintios 8

Ïdulukunapaq pishtayanqan ëtsapaq yachatsinqan

1Ïdulukunapaq pishtayashqan ëtsakunapita tapuyämashqëkita kanan willayashqëki.#8.1 Tsë tiempuqa ïdulukunapa shutinchömi mikuyänanpaq wätata pishtayaq. Jesucristuman wakin markäkuqkuna yarpäyarqan tsë ëtsata mikur jutsata rurayashqantam. Wakinnam yarpäyarqan mana jutsata rurayashqanta. Tsënö kayashqanpitam apóstol Pabluta tapuyarqan. Musyämi <<llapäkunam yachëyuq kayä>> niyashqëkita. Tsënö niyaptikipis wakin yachëyuqkunaqa yachaq tukuqmi tikrayan. Kuyakuq kaqkunanam nuna mayinta alli yanapayan. 2Yachëyuq kayashqëkita yarparpis manam rasunpa yachëyuqtsu këkäyanki. 3Rasunpa yachëyuq nunaqa Teyta Diostam kuyan. Tsënö nunataqa Teyta Diospis reqinmi.

4Ïdulukunapaq pishtayashqan wätakunata mikunantsikpaq o mana mikunantsikpaq kashqantam kanan käyitsiyashqëki. Musyantsikmi ïdulukuna mana kawayashqanta ni mandakuq mana kayashqanta. Tsënöllam musyantsik Teyta Dios jukllëlla kashqanta. 5Tsënö kaptinpis wakin nunakuna yarpäyan ciëluchöpis y kë patsachöpis atska dioskuna kayashqantam. 6Tsënö yarpäyaptinpis noqantsikpaqqa jukllëllam Dios këkan. Pëqa Teyta Diosmi këkan. Pëmi llapantapis kamashqa. Noqantsikpis pëta sirwinantsikpaqmi kawantsik. Señor Jesucristupis jukllëllam këkan. Pëwanmi Teyta Dios llapantapis kamarqan. Pëmi kawëtapis qomantsik.#Juan 1.3; Rom. 11.36; Efe. 4.6; Col. 1.16.

7Tsënö kaptinpis manam llapan wawqikuna y panikunatsu tsëkunata käyiyan. Wakinkunaqa ïdulukunata nöpata adorashqa karmi ïdulukunapaq pishtayashqan ëtsata mikïta munayannatsu. Tsë ëtsata mikurqa jutsata rurayashqantam yarpäyan.

8Manam ëtsata mikushqantsikpitatsu Teyta Dios mas kuyamantsik ni ëtsata mana mikushqantsikpitatsu mënus kuyamantsik, sinöqa mikushqapis mana mikushqapis iwalllam kuyamantsik. 9Ïdulupaq pishtayashqan ëtsata mikuyänëkipaq libri këkarpis paqtaraq mikur manaraq alli käyiq wawqikunata y panikunata jutsata ruratsiyankiman.

10Yachëyuq kayashqëkita yarparmi wakinnikiqa ïdulukunapa templunchö ëtsata mikïkäyanki. Tsë ëtsata mikïkaqta rikäyäshurniki ¿manatsuraq manaraq alli käyiq wawqikuna y panikunapis tsë ëtsata mikïta munayanqa? 11Tsënöpam yachëyuq kayashqëkita yarparpis tsë wawqikunata y panikunata jutsata rurëkatsiyanki. Tsënö jutsatam rurëkätsiyanki pëkuna rëkur Jesucristo wanushqa këkaptin. 12Mana käyiq wawqikunata y panikunata tsënö jutsata ruratsirqa Jesucristupa contranmi rurëkäyanki.#Mat. 25.45. 13Ëtsata mikushqantsikpita markäkuq mayintsik ïduluta yapë adoraptinqa ëtsata imëpis ama mikushunnatsu.

Currently Selected:

1 Corintios 8: qwhB

Highlight

Copy

Compare