1 Corintios 15
15
Jesucristo kawarimunqan
1Wawqikuna y panikuna, Jesucristupa willakïninta willakushqäta yarpäyë. Willakushqäta chaskikurmi Teyta Diosman markäkïkäyanki. 2Tsë willakushqänö kawarqa salvakuyankim. Tsënö mana kawarqa manakaqllapaqmi creyikuyankipis.
3Yachakushqällatam mas puntatapis qamkunata yachatsiyarqaq. Tsë yachatsikushqäqa kënömi nikan: Teyta Diospa palabranchö qellqarëkashqannöllam#Isa. 53.5-12. jutsantsikpita perdonamänantsikpaq Jesucristo wanurqan. 4Y qellqarëkashqannöllam#Sal. 16.8-10; Mat. 12.40; Hech. 2.24-32. Jesucristo wanur pamparashqanpita kima junaqta kawarimurqan. 5Kawarirkamurnam Cefasta#15.5 Cefasqa Simón Pedrupa juk kaq shutinmi këkan.#Luc. 24.34. yuripurqan. Tsëpitanam chunka ishkë apostolninkunata yuripurqan.#Mat. 28.16-17; Mar. 16.14; Luc. 24.36; Juan 20.19. 6Tsëpitanam pitsqa pachak (500) wawqikuna y panikuna ëllukashqa këkäyaqtapis yuripurqan. Tsënö yuripushqanta rikaq wawqikuna y panikuna juk ishkë wanukuyashqana kayaptinpis wakinqa kawëkäyanran. 7Santiaguta yuripïkurnam wakin apostolninkunatapis yuripurqan. 8Tsëpitaran imëka shullu cuenta mana sirwiq këkaptï noqatapis yuripïkamarqan.#Hech. 9.3-6.
9Manaraq yuripumaptinqa Teyta Diosman markäkuqkunata qatikacharmi karqä.#Hech. 8.3. Tsënö rurashqa karmi wakin apostolkunamanqa ichikllapis iwalätsu. Apóstol kanäpaqpis manam sirwïtsu. 10Tsënö këkarpis Teyta Dios ankupämaptinmi apóstol kä. Wakin apostolkunapitapis masraq Jesucristupa willakïninta willakurmi käyikü Teyta Dios allipaq ankupämashqanta. Imanö kaptinpis Teyta Dios yanapamaptinmi willakïkä. 11Mëqäkuna willakurpis Jesucristupa willakïnintam willakïkäyä. Willakuyashqäta wiyarmi qamkunapis Jesucristuman creyikuyarqunki.
Wanuqkuna kawariyämunanpaq kanqanta yachatsinqan
12Jesucristo kawarimushqanta willakïkäyaptïqa ¿imanirtaq wakinniki nikäyanki wanushqakuna mana kawariyämunanpaq kashqanta? 13Wanushqakuna mana kawariyämunanpaq kaptinqa Jesucristupis manam kawarimunmantsu karqan. 14Mana kawarimushqa kaptinqa manakaqllapaqmi willakïnintapis willaküman. Tsënö kaptinqa Jesucristuman manakaqllapaqmi creyikuyankiman karqan. 15Wanushqakuna mana kawariyämunanpaq kaptinqa Jesucristuta Teyta Dios kawaritsishqanta willakurpis ulikurchi puriyäman.
16Wanushqakuna mana kawariyämunanpaq kaptinqa Jesucristupis manam kawarimunmantsu karqan. 17Y Jesucristo mana kawarimushqa kaptinqa pëman creyikuyashqëkipis manakaqllapaqmi kanman. Jutsata rurayashqëkipitapis manam perdonashqatsu këkäyankiman. 18Tsënö kaptinqa Jesucristuman creyikïkar wanuqkunapis wanuyashqanllachömi ushakäyanman. 19Jesucristo kë vïdallachö yanapamänantsikpaq kashqanta creyirqa llapan nunapitapis mas ankupëpaqmi këkantsik.
20Jesucristuqa rasunpam wanushqanpita kawarimushqa. Pë puntata kawarimushqa kaptinmi musyantsik noqantsikpis kawarimunantsikpaq kashqanta. 21Juk nunalla#15.21a Tsë nunaqa Adánmi karqan. jutsata rurashqanpita llapantsik wanunantsikpaq kashqantsiknöllam juk nunalla#15.21b Tsë nunaqa Jesucristum këkan. kawarimushqanpita llapantsikpis kawarimunantsikpaq këkantsik. 22Jutsata Adán rurashqanpitam llapantsik ushakäshun. Tsënö kaptinpis Jesucristo kawarimushqanpitaqa llapantsikmi kawarimushun.#Rom. 5.12-18.
23Kawarimurqa Teyta Dios permitishqannömi kawarimushun. Puntatam Jesucristuta Teyta Dios kawaritsimushqa. Jesucristo kutimuptinran pëta chaskikuqkunata kawaritsimunqa. 24Tsëpitanam juiciu junaq kanqa. Tsëchönam Satanásta y llapan supëkunata Jesucristo ushakätsinqa. Tsëpitanam Teyta Diospa munëninman llapanta churanqa. 25Contrankunata vencishqanyaqmi llapantapis makinchö Jesucristo tsararanqa. 26Vencirirnam wanïtapis vencinqa.
27Teyta Diospa palabranchömi Jesucristupaq kënö nikan: <<Pëpa munëninmanmi llapantapis Teyta Dios churashqa>>.#Sal. 8.6.
Pëpa munëninman llapanta churashqanta nirpis manam kikin Teyta Dios munëninchö kashqantatsu nikan. Tsëpa rantinmi Teyta Dios Jesucristupa munëninman llapanta churashqa. 28Pëpa munëninman llapantapis churashqana kaptinmi Teyta Diospa munëninman llapanta kutitsinqa. Tsënöpam Teyta Dios llapan imëkatapis makinchö tsararanqa.
29Wawqikuna y panikuna, ¿imanirtaq yarpäyanki wanushqakuna mana kawariyämunanpaq kashqanta? Wanushqakunata Teyta Dios mana kawaritsimunanpaq kaptinqa ¿imapaqtaq wanushqakunapa shutinchö wakinniki bautizakuyanki?
30Jina wanushqakuna mana kawariyämunanpaq kaptinqa ¿imapaqtan wanur kawarpis willakur puriyäman? 31Wawqikuna y panikuna, waran waranmi wanutsiyämëta munayan. Tsënö kaptinpis Señor Jesucristuman creyikuyashqëkipita kushikümi. 32Éfeso markachöpis chikiyämar chucaru animalnömi wanutsiyämëta munayarqan. Wanushqakuna mana kawariyämunanpaq kaptinqa ¿imapaqtan tsënö chikishqapis purïman? Tsëpa rantinqa: <<Kawashqantsikyaq mikushun upushun. Wanukurqa pachantsiktam apakushun>>#Isa. 22.13. nïmanchi.
33Llutanta ama yarpäyëtsu: mana alli yanasakunaqa alli nunakunatapis mana alli rurëkunamanmi inkitayan. 34Shumaq käyikur jutsëkikunata jaqiriyëna. Wakinnikiqa Teyta Diospa willakïninta manam shumaqtsu käyikäyanki. Tsënö kayashqëki penqakïpaqmi këkan.
Kawarimur cuerpuntsik imanö kananpaq kanqan
35Wanushqakuna kawariyämunanpaq kashqanta mana creyirmi wakinniki kënö nikäyanki: <<¿Imanöpanash wanushqakuna kawariyämunman? Kawariyämuptin ¿imanöraq cuerpunkuna kanqa?>>
36Tsënö yarparqa ¡upanömi këkäyanki! Imallatapis murur mana pampashqaqa manam jeqamuntsu. 37Tsënöllam yurantatsu muruntsik, sinöqa trïgu kaptinpis o mëqan tsaki mikï kaptinpis murutam muruntsik. 38Mururiyaptinqa Teyta Diosmi winatsimun. Tukïläya murupitam Teyta Dios munashqannölla winatsimun.
39Nunapis, animalpis, päriqpis#15.39 Wakin nunakunaqa bolaqpis niyanmi. y pescädupis tukïläyam kayan. 40Ciëluchö kaqkunapis manam kë patsachö kaqkunanötsu këkäyan. 41Tsënöllam intipis, killapis y qoyllurkunapis jukläya jukläya atsikyäyan.
42Tsënöllam nuna wanushqanpita kawarimuptin cuerpun mushuqna kanqa.
Pampayashqan cuerpuqa ushakaqllam.
Kawarimuq kaqqa manam ushakanqanatsu.
43Pampayashqan kaqqa ismunqam.
Kawarimuq kaqqa kuyëllapaqmi kanqa.
Pampayashqan kaqqa ushakanqam.
Kawarimuq kaqqa manam ushakanqatsu.
44Yurikushqantsik cuerpuqa kë patsachö kawanantsikllapaqmi këkan.
Kawarimuq cuerpuqa mushuq patsachö kawanantsikpaqmi kanqa.
Kë patsachö kawanantsikpaq kaq cuerpupis kanmi y mushuq patsachö kawanantsikpaq kaq cuerpupis kanqam.
45Teyta Diospa palabranchöpis kënömi qellqarëkan: <<Punta kaq Adántam kawaq nuna kananpaq kamarqan>>.#Gén. 2.7.
Peru qepa kaq Adántam#15.45 Qepa kaq Adánqa Jesucristum këkan. sï kawatsikuq espíritu kananpaq kawaritsimushqa. 46Manam mushuq patsachö kawanantsikpaq kaq cuerputatsu puntata chaskintsik, sinöqa kë patsachö kawanantsikpaq kaq cuerputam. Tsëpitaran mushuq patsachö kawanantsikpaq kaq cuerputaqa chaskintsik. 47Punta kaq nunaqa allpapitam karqan. Peru qepa kaq nuna [Señor Jesucristum] sï ciëlupita këkan. 48Kë patsachö kawanantsikpaq kaq cuerpuntsikqa allpapita rurashqa Adánpa cuerpunnöllam këkan. Peru mushuq patsachö kawanantsikpaq kaq cuerpuntsikmi sï ciëluchö tëkaq Jesucristupa cuerpunnö kanqa. 49Kananqa allpapita rurashqa Adán niraqllam këkantsik. Tsëpitanam ciëluchö tëkaq Jesucristunöna kashun. 50Wawqikuna y panikuna, shumaq käyikuyë. Ëtsantin tulluntinqa manam pipis Teyta Diospa mandakïninman chanqatsu. Ushakaq cuerpuntsikqa manam mushuq patsachö kawanantsikpaqtsu këkan, sinöqa kë patsachö kawanantsikllapaqmi.
51Teyta Dios pitapis mana musyatsishqanta musyayänëkitam munä: Manam llapantsikraqtsu wanushun. Tsënö kaptinpis llapantsiktam mushuq cuerputa Teyta Dios qomäshun. 52Mushuq cuerpuyuqqa juklla tikrarishun ultimu kaq cornëtata tocaramuptinmi. Tsë junaqmi mana ushakaq mushuq cuerpuyuqna wanushqakuna kawariyämunqa. Tsënöllam noqantsik kawëkaqkunapis mushuq cuerpuyuqna tikrashun.#1Tes. 4.15-17. 53Ushakaqlla kashqantsikpitam mana ushakaqna tikrashun. Wanukuqlla kashqantsikpitam mana wanukuqna tikrashun.
54Ushakaqlla cuerpuntsik mana ushakaqmanna tikraptinmi y wanukuqlla kashqantsikpita manana wanunantsikpaqna tikrarishqam Teyta Diospa palabran kënö nishqan cumplikanqa:
<<¡Wanïqa vencishqanam këkan!#Isa. 25.8.
55Wanï, ¡mëchötaq poderniki!
Sepultüra, ¡mëchötaq mikukuq këniki!>>#Ose. 13.14.
56Jutsata rurashqam wanï ushakätsimantsik. Jutsapis Teyta Diospa leyninkunapitaran ishkitsimänantsikpaq munëninta chaskin.#Rom. 7.7-25. 57Tsënö kaptinpis Señor Jesucristuta kawaritsimurmi Teyta Dios wanïpita salvamantsik. Tsëpita imëpis pëta payllä nishun.
58Tsënö këkaptinqa, kuyë wawqikuna y panikuna, mana qelanëpa y mana ajayëpa Señor Jesucristuta imëpis sirwiyë. Musyayashqëkinöpis pëta sirwiyashqëkiqa manam manakaqllapaqtsu këkan.
Currently Selected:
1 Corintios 15: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
