1 Corintios 14

Mana käyiyanqan idiömapaq käyitsinqan

1Tsënö këkaptinqa shumaq kuyanakuyë. Espíritu Santu yachëta qoyäshunëkipaq#Rom. 12.6-8; 1Cor. 12.7-11. Teyta Diosta mañakuyë. Imëkanöpis tïrayë willakïninta willakuyänëkipaq.

2Espíritu Santu parlatsiyäshushqëki idiömapa parlarqa manam nunakunatatsu parlapëkäyanki, sinöqa Teyta Diostam. Espíritu Santu parlatsiyäshuptikipis manam pipis käyiyäshunkitsu. 3Tsënö kaptinpis nunakuna käyiyashqan idiömapa willakuyaptikiqa llapan niyashqëkitapis käyirmi Teyta Dios munashqannö kawakuyanqa, kallpatsanakuyanqa y yanapanakuyanqa. 4Nunakuna mana käyiyashqan idiömapa willakuq kaqqa kikinllam kushikun. Nunakuna käyiyashqan idiömapa willakuq kaqnam Teyta Diosman markäkuqkunata shumaq yachatsiyan.

5Noqapitaqa allim kanman Espíritu Santu parlatsishqan idiömachö llapëki parlayaptikipis. Tsënö kaptinpis mas allim kanman nunakuna käyiyashqan idiömachö Teyta Diospa willakïninta willakuyaptiki. Mana käyiyashqan idiömachö willakuyaptikiqa pillapis kanmanmi käyitsinanpaq. Tsënö käyitsiq kaptinqa allim kanman juk idiömachö willakuyaptikipis.

6Wawqikuna y panikuna, shumaq käyikuyë. Watukakuq shamur mana käyiyashqëki idiömachö yachatsikuptï ¿yachakuyankimantsuraq? Tsënö kaptinpis käyiyashqëki idiömachö yachatsikuptïqa revelación kaptinpis o yachatsikï kaptinpis llapanta käyirmi shumaq yachakuyanki.

7Pinkullutapis arpatapis llutalla tocaptinqa manam käyintsiktsu imata toquëkäyashqantapis. 8Tsënöllam cornëtata llutalla tocayaptinqa soldädukunapis guërraman ëwayänanpaq alistakuyantsu. 9Tsënöllam kanqa mana käyiyashqan idiömachö willakuyaptiki. Imata niyashqëkitapis mana käyirmi imatapis yachakuyanqatsu. Tsënö willakurqa manakaqllapaqmi willakïkäyanki.

10Musyashqantsiknöpis kë patsachöqa atskam idiömakuna këkan. Nunakuna käyiyashqan idiömachö parlapashqaqa pipis käyinmi. 11Tsënö kaptinpis mana käyishqä idiömachö parlapämaq nunaqa juk lädu nación nunanömi noqapaq kanqa y noqapis juk lädu nación nunanömi pëpaq kashaq. 12Tsënöllam qamkunapaqpis willakuyaptiki këkan. Tsëmi Espíritu Santu yachëta qoyäshunëkita munarqa wawqikunata y panikunata käyiyashqan idiömachö shumaq yachatsiyänëkipaq pëta mañakuyänëki. 13Tsënölla mana käyiyashqan idiömachö willakurqa Teyta Diosta mañakuyë willakuyashqëkita käyitsiyänanpaq.

14Espíritu Santu parlatsimaptin mana käyishqä idiömachö Teyta Diosta mañakur kushikurpis manam käyïtsu imata nikashqätapis. 15Tsënö kaptinqa manam Espíritu Santu parlatsimashqan idiömallachötsu mañakushaq, sinöqa käyishqä idiömachöpis mañakushaqmi. Manam Espíritu Santu parlatsimashqan idiömallachötsu Teyta Diosta alabashaq, sinöqa käyishqä idiömachöpis alabashaqmi. 16Qamkunapis nuna mana käyishqan idiömallachö Teyta Diosta alabayaptikiqa wakin nunakuna mana käyir qamkunawan manam alabëta puëdiyanqatsu. 17Llapan shonqïkikunawan kushishqa alabayaptikipis upällallam rikaräyäshunki.

18Nuna mana käyishqan idiömachö parlanäpaq qamkunapita masraq Espíritu Santu yanapamaptinmi Teyta Diosta payllä nikü. 19Tsënö kaptinpis wawqikuna y panikuna ëllukäyashqanchö chunka waranqa (10,000) mana käyiyashqan palabrakunata parlashqäpita mas allim kanqa pitsqa palabrallatapis käyiyashqan idiömachö parlaptï.

20Wawqikuna y panikuna, wamrakuna mana käyikur yarpäyashqannö ama yarpäyëtsu. Tsëpa rantin poqushqa nunakunanö shumaq käyïkur yarpakachäyë. 21Teyta Diospa leyninchömi kënö qellqarëkan:

<<Kë nunakunata castigarmi mana käyiyashqan idiömapa parlapäshaq.

Tsënö castigaptïpis manam cäsuyämanqatsu.

Noqa Teyta Diosmi tsënö nï>>.#Isa. 28.11-12.

22Tsë nishqannöllam nunakuna mana käyiyashqan idiömachö willakushqa Jesucristuman mana markäkuqkuna Teyta Diospa willakïninta chaskiyanqatsu. Käyiyashqan idiömachö willakushqaqa Jesucristuta chaskikuyanqam. 23Ëllukäyashqëkichö mana käyiyashqan idiömachö llapëki parlayaptiki imanir tsënö parlayashqëkita mana musyaq nuna o mana creyikuq nunakuna yëkur löcuyashqa këkäyashqëkitam yarpäyanqa. 24Tsëpa rantinqa käyiyashqan idiömachö Diospa willakïninta willakuyaptikiqa jutsayuq kayashqantam käyikuyanqa. 25Tsëmi willakuyashqëki shonqunkunaman chaptin Teyta Dios qamkunawan këkashqanta käyir qonqurikur Teyta Diosta adorayanqa.

Ëllukäyanqanchö imanöpis kayänanpaq ninqan

26Tsënö kaptinqa wawqikuna y panikuna, ëllukäyashqëkichö salmukunata qotsurpis, Jesucristupa willakïninta yachatsirpis, Teyta Dios käyitsiyäshushqëkikunata willakurpis, nunakuna mana käyiyashqan idiömachö parlarpis y tsë parlashqanta käyitsirpis llapanta rurayë markäkuq mayikikuna Teyta Dios munashqannö kawayänanpaq. 27Mana käyiyashqan idiömakunachö parlarqa juk ishkëlla trocanakïpa parlayätsun. Tsë parlayashqanta juk wawqina käyitsitsun. 28Pillapis käyitsinanpaq mana kaptinqa upälläkuyätsun. Parlananpa rantinqa shonqunllachöna Teyta Diosta mañakuyätsun.

29Tsënölla ëllukäyashqëkichö Diospa willakïninta juk ishkëlla willakuyätsun. Wiyaqkuna käyikuyätsun llutanta willakuyashqanta o rasun kaqta willakuyashqanta. 30Imatapis willakunanpaq juk wawqita Teyta Dios käyitsiptinqa parlëkaq wawqi upälläkutsun juk kaq wawqina parlananpaq. 31Tsënöpam llapëkipis shuyänakïpa willakuyanki llapanpis yachakuyänanpaq. 32Willakuqkuna imë parlayänanpaqpis y imë upälläkuyänanpaqpis käyiyanmi. 33Salvashqan nunakuna ëllukäyashqanchöqa Teyta Dios manam desordin kananta munantsu, sinöqa llapanpis shumaq ordenädu kanantam munan.

34Ëllukäyashqëkichö warmikuna upällalla kakuyätsun. Ama parlakuyätsuntsu.#14.34 1 Corintios 11.5-chö nikan wawqikuna y panikuna ëllukäyashqanchö warmikuna mañakuyashqanta y willakuyashqantam. Tsëmi kë textuchö upälläkuyänanpaq nirqa warmikuna desordinta mana rurayänanpaq nikan. Moisés qellqashqan leykunachö nishqannö qowanpa munëninchö kayätsun. 35Imatapis musyëta munarqa wayinkunaman kutïkur qowankunata tapuyätsun. Manam allitsu ëllukäyashqëkichö warmikuna parlayaptinqa.

36¿Imanirtaq yarpäyanki qamkuna kaqchö Teyta Diospa palabran qallashqanta y qamkunallata willayäshushqëkita? 37Teyta Diospa willakuqninkuna y Espíritu Santu käyitsishqan nunakuna kayashqëkita yarparqa käyikuyankimanmi kë cartachö nishqäkuna Jesucristupa mandamientunkuna kashqanta. 38Kë cartachö nishqäkunata mana chaskiq kaqtaqa Teyta Dios manam chaskinqatsu.

39Tsënö këkaptinqa Teyta Diospa willakïninta nunakuna käyiyashqan idiömachö willakuyë. Mana käyiyashqan idiömachö parlayaptinpis ama michäyëtsu. 40Ëllukäyashqëkichö Teyta Dios munashqannölla llapantapis ordenädu rurayë.

Currently Selected:

1 Corintios 14: qwhB

Highlight

Copy

Compare