1 Corintios 16

Ofrendata ëlluyänanpaq ninqan

1Jerusalénchö kaq wawqikunapaq y panikunapaq ofrendata ëllurqa#Rom. 15.25-26; 2Cor. 8—9. Galacia provinciachö wawqikunata y panikunata käyitsishqänölla qamkunapis ëlluyë. 2Semänachö uryar ganayashqëkipita cada domingu jukniki jukniki ëkallatapis churayanki. Ama noqa chämuptïraqqa ëllïkäyankitsu. 3Ëlluyashqëki ofrendata Jerusalénman apayänanpaq wawqikunata akrayë. Chëkamurnam pëkunapaq cartata rurashaq Jerusalénman apayaptin wawqikuna y panikuna chaskiyänanpaq. 4Noqapis ëwëta puëdirqa pëkunawanmi ëwashaq.

Mëpapis ëwananpaq kaqta Pablo willanqan

5Qamkuna kaqman kutimur Macedonia provinciaparan tumamushaq.#Hech. 19.21. 6Chëkamurqa capaz tamya killa pasashqanyaq qamkunawan quedashaq. Tsëpitanam wakin markakunamanpis ëwanäpaq yanapayämanki. 7Manam pasädallaqa qamkunata watukëta munätsu. Teyta Dios munaptinqa qamkuna kaqchö quedashaqran.

8Tsënö kaptinpis Éfesuchöqa Pentecostés fiesta chämushqanyaqmi täräshaq. 9Atska nunakuna conträ shäriyaptinpis Teyta Dios yanapëkämanmi kë markakunachö alli willakïninta willakunäpaq. Tsënö willakuptïmi Jesucristuta chaskikïkäyan.#Hech. 19.8-10.

10Wawqintsik Timoteo qamkunaman chämuptin kushishqa chaskiyë. Pëpis noqanömi Jesucristupa willakïninta willakur purikan.#1Cor. 4.17. 11Pëta manakaqman ama churayëtsu. Kushishqa kutimunanpaq yanapëkulläyë. Noqakunapis këchö kaq wawqikunawan y panikunawan pëta shuyarëkäyämi.

12Qamkuna kaqman wakin wawqikuna shayämuptinmi Apolustapis rowakurqä qamkunaman shamunanpaq. Tsënö rowakïkaptïpis manam shamïta puëdintsu. Tsëpitaraqchi shamunqa.

Cartapa ushanan

13Imapitapis mäkuq mäkuqlla kayë. Imanö jiparpis Teyta Diosman markäkuyë. Imatapis mana mantsakushpa Teyta Dios munashqannö kawakuyë. 14Pïmëwanpis kuyanakur shumaq kawakuyë.

15Wawqikuna y panikuna, musyayankim Acaya provinciachö wawqintsik Estéfanas castankunawan#1Cor. 1.16. Jesucristuta puntata chaskikuyashqanta. Pëkunam wawqikunata y panikunata imachöpis yanapëkäyan. 16Tsëmi qamkunata rowayaq pëkunata cäsukuyänëkipaq. Tsënölla llapantapis pëkunanö yanapayäshuqnikikunata y yachatsiyäshuqnikikunata cäsukuyë.

17Estéfanas, Fortunato y Acaico qamkuna kaqpita watukamaq chärayämuptinmi llapëkita rikaqnöraq kushikurqü. 18Qamkunata kallpatsayäshushqëkinöllam noqakunatapis kallpatsayämashqa. Pëkunata y pëkunanö kaqkunata shumaq respetayanki.

19Asia provinciachö këkaq wawqikuna y panikunapis qamkunapaqmi salüdusta apatsikayämun. Tsënöllam Aquila y Priscila#Hech. 18.2. y wayinchö ëllukaq wawqikuna y panikunapis qamkunapaq salüdusta apatsikayämun. 20Llapan wawqikuna y panikunam salüdusta apatsikayämun. Jukniki juknikipis qaqllëkikunachö mutsanakur napanakuyë.

21Noqa Pablo kikïmi kë salüdustaqa qellqëkämü.

22Pitapis Jesucristuta mana kuyaq kaqtaqa Teyta Dios castiganqam. ¡Señor Jesucristo, kutikallämï!

23Imëpis alli kawayänëkipaq Señor Jesucristo yanapëkulläyäshï. 24Jesucristuman markäkuq mayï kayaptikim llapëkikunata kuyayaq. [Amén.]

Currently Selected:

1 Corintios 16: qwhB

Highlight

Copy

Compare