1 Samuel 7
7
1Turawarmatai Quiriat-jearimnumia shuar aina weriar Yuusa arcarin jukiar itawar Abinadabpan jeen apujsar shir kuitamkaruiti. Turawar nuna kuitamkatnun Abinadabpan uchiri Eleazaran etegkawar Yuusa arcari ame kuitamkata, tusar tiaruiti.
Samuel israelita ainan apuri jasmau
2Arcan yaakat Quiriat-jearim tutainam veinte uwí apujsarua nui nagkamas, ina shuari ainanam agkanmamtikramatji tusar Israel shuar aina útainak Yuusan tuke aujujakaruiti. 3Tumaina asarmatai Samuel nitan chicharuk: Atum ima Yuusa nuke umirkattsarum wakerakrumka chikich shuar aina, nitak najanawar yuusrimainak ememataina nuka ememattsuk Astarté nakumka najanamu aina nujaimak utsagtarma. Tumakrumnaka filisteo aina atumin apuriya numamtuk waitkarmaina nunaka Yuus agkanmamtikramattarme, tusa tinaiti. 4Tutai Baal najanamun, tura Astarté najanamuncha ashi utsagkaruiti. Turawar ima Yuusa nunak eme anentas ii jakaruiti. 5Tumaina asarmatai Samuel nitan ashi untsuk irumar chicharuk: Wii atumin pachisan Yuusan aujsatjai. Yaakat Mizpánam iruuntratarma, tusa tinaiti.
6Timau asar israelita aina ashi shiakar yaakat Mizpánam iruuntrar yurumkan yutsuk matsamsar, Yuusan aminu atii tusan suaji tusar entsan shikikar ukararuiti. Turawar ina tunaurin Yuus tsagkurtamratji tusar etsertumaina. Tura nu tsawanta nuig Samuel israelita ainan apuri jasuiti. 7Tura israelita aina yaakat Mizpánam iruuntrarai tamaun filisteo aina antukaruiti. Tuma apu aina nita suntaari ainan yaruak weriaruiti. Tura israelita aina nuna nekawar ashamkaruiti. 8Samuelan chicharainak: Filisteo aina ina mantamawaraij Yuus inaitsuk aujsata, tusar tiaruiti. 9-10Tuinakai Samuel oveja ainan maa epeak Yuusan aujuk pujai, filisteo aina, Israel shuar ainajai maaniawartasa kaunkaruiti. Turasha Yuus Samuel chichamun anturkauwaiti. Tura asa nina senchirijai ipamtan akuptuk filisteo ainan awakak kakaarchamnau amajsarmatai, israelita aina filisteo ainan patatukaruiti. 11Turuina asar israelita aina yaakat Mizpánam maatsatu jiinturar filisteo ainan patatuk amaigkar, mai mainakua yaakat Bet-car tutainam nugkani ejéniaruiti.
12Turawarmatai Samuel kayan juki yaakat Mizpá Sen tutainam ajapeen apujsauwaiti. Tura “Eben-ezer” anaikauwaiti. Nunaka Yuus yamaisha yainmakji taku tinaiti. 13Turamu asar filisteo ainaka, israelita ainan nugkenka atak awenagka wayacharuiti. Tura Samuel iwáku pujujakua nuigka, filisteo aina nitajai maaniati tusagka Yuus tsagkamkachuiti. 14Filisteo aina, israelita ainan nepetak Ecrónnum nagkama Gat tutai ajakua imanai nugken jurukiaruiti. Turasha nunaka israelita aina, filisteo ainan nepetak ataksha nita nugke amajsaruiti. Tuma nuiyagka israelita aina, amorreo shuar ainajaigka maanitsuk agkan matsamajakaruiti.
15Tura Samuel Israel shuar ainan apuri jas nukap uwí pujusuiti. Tuma pujau jakauwaiti. 16Ni apu pujujakua nuigka chiki chikichik yaaktanam uwí nukapek Israel shuar ainan iturchatrin iwartak yaakat Betel, Guilgal, tura Mizpánmasha wekajakuiti. 17Tuma umik ni pujutairin yaakat Ramánam waketujakuiti. Nui pujus Israel shuar ainan yayájakuiti. Tura nuiyasha nu yaaktanam Yuus eme anentsa iiyakur tagku aina maa patasa epetaincha najanawaiti.
Currently Selected:
1 Samuel 7: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
