1 Samuel 8
8
Israelita aina Saúlan apu atii tusa anaikamu
1Samuel uuntach jasu asa nina uchiri ainan, atum chicham iwarin ataarma tusa anaikauwaiti. 2Uchiri yama nagkamchaku iwairigka Joel, tura chikich uchiri ekeuka Abías nu aina nuka yaakat Beersebanam apu jas inamin ajakaruiti. 3Turasha nita apari takajakmaunka turusag takatsuk, nitaka kuitan ima senchi wakeruina asar, israelita aina tunaun takasarmataisha, tunau takat inaisatarma tusar jintintsuk, kuit surustarma tutai suimkan surusai tusar aki jaku ainawai.
4Tumaina asarmatai chikich Israel shuar ainan apuri aina ashi iruuntraru, tumawar Samueljai Raamánam pujau asamtai chichasartasa wearuiti. 5Tuma jeawar Samuelan chicharainak: Chicham iwarin ataarma tusam, amina uchiram aina apu arti tusam anairauwaitam nuka ame pegker takajakuitam imatiksagka takainatsui. Tumaina asarmatai chikich nugkanam apurtin aina tumasrik ina apuri atincha chikich anaikata, ameka uuntach jasume, tusar tiaruiti. 6Tuinakai Samuel nuna antuk, kuntuts enentaimar nuna pachis Yuusan aujsauwaiti. 7Takai Yuus Samuelan chicharuk: Israelita aina tuina nunaka amina nakitramainak tuinatsui, antsu nunaka ashi wii nita apuriyaitaj nuna nakitruinak tuinawai. 8Yamai amina nakitramaina antsag, wii nita uuntri ainan Egiptonam matsatun jiiruitaj nuisha, tura yamai matsata nusha tumasag nakitruinawai. Tumaina asar wina nekaspapita tamaunka inaituinak chikich yuusrimtai ainan emematainawai. 9Tumaina asarmatai, nita amina seatmaina nuka metek umirkarta. Turasha nita apuri atata nu nitajaisha uruk takakmastin nu ujakarta, tusa tinaiti.
10Atum chichakrum ina apuri atin anaikata tusa timarum nuna pachis, Yuus turamrume tusa Samuel ashi israelita ainan ujakuiti. 11Turak nitan chicharuk: Ina apuri atin anaikata tusarum timarum nu inamkugka juna turattawai: Atumi uchiri aina carretenam yujas maaniatin ainan, caballonam entsamak maaniatin ainan, tura nina kuitamkatin ainancha yaruak akantrattawai. 12Turak mil suntar aina apuri artinan, tura cincuenta suntar aina apuri artinnasha anairattawai. Turasha chikich ainanka ajanam arakan arawar juu arti tusa anairattawai. Tura chikich ainaka nu apu yuatnun arakan juu artinaiti. Antsu chikich ainaka maanitai ainan najanin artinaiti. 13Atumin nawantri ainancha nina inatairi amajsatnaiti. Turak perfumen najanin, yutain inarin, tura pankan najanin arti tusa yaruaktinaiti.
14Atumi nugkeen uva aina, olivo aina arakmauncha nugka pegker árak aramsha tsapau asamtai nina nugke amajsatnaiti. Turak nijai atuka takatairi ainan sura inaisattawai. 15Atum árak diez chagkinnum jukmau ainan, tura uva diez chagkinnum juukmau aina nuiyan chikichik chagkinan akanak juki nina atutairi ainan, tura suntara apuri ainancha tinamtinaiti. 16Tura nuiyasha atumi inatairi aishmag natsa ainan tura nuwa ainan, vaca pegker ainan, burro pegker ainan ninu amajas takamtiksatnaiti. 17Nuiyasha atumi tagkuriyan diez cabra ainan, tura diez oveja aina nuiyancha chiki chikichik akanak yarutramkattarme. Tura atumsha nina inatairi atatrume. 18Atum apu etegkattarum nu waitkarmakai chichakrumincha Yuuska yainmakchattarme, tusa ujakuiti.
19Timatai Samuel israelita ainan Yuus timaun ashi ujakuiti. Nu turamsha nekaspapita tutsuk chichainak: Ika nuka puyattratsji, ika apurtin atasar wakeraji. 20Tumaina asar Samuelan chicharainak: Chikich nugkanmaya shuar aina apurtin aina tumasrik, isha apurtin atasar wakeraji. Tura maaniamu akaisha ina yainmaktina nu apu atii tusar wakeraji, tusar tiaruiti. 21Tuinakai antuk Samuel ataksha Yuusan aujsauwaiti. 22Tutai Yuus Samuelan chicharuk: Israelita aina apurtin atasa seatmaina nuka apurtin arti tusam anaitukarta, tusa tinaiti. Tutai Samuel israelita ainan chicharuk: Chiki chikichik atumin yaaktarin shiaktarma, tusa ishiakuiti.
Currently Selected:
1 Samuel 8: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
