1 Samuel 6
6
Filisteo aina israelita ainan arcan awagtukmau
1Filisteo aina: Yuusa arcarin jukiaru aina nuka nita nugken siete nantu apujsaruiti. 2Tuma asamtai sacerdote ainan, tura nekamin ainan iniasartasa untsuk chicharainak: ¿Ujakratkatarma, Yuusa arcari israelita aina awagtakrisha uruk awagtumainkit? tusar tuina.
3Tutai nita aimainak: Israel shuar aina chicham umiktin Yuusa arcarin egketa nu, pegke nagkamsarmeka awaketsuk, Yuus ina kajertamkau akusha tsagkurtamratji tusarum warí akuptuktarma. Nu turamka tsagkurtamrattarme. Turamtai nui Yuuscha atumnasha warinmak kajertamkauwaitrum nu nekattarme. 4Tutai nita aimainak: Turasha ¿ina waittan amasaij tusa takursha wari sumainaita? tusar cinco filisteo apuri ainan tuina. Tuinakai sacerdote aina chichainak: Atumi apurijaimak jinuina asarum, cinco apu asamtai, cinco tumor nakumka orojai najanatarma. Nuiyasha cinco katip nakumka orojai najanarum susatarma. 5Ina nugken tumor, tura katipjai waittan ama asamtai nu aina nakumka najanarum akupkatarma. Nu turamunam ina waittan Yuus suramaj nuna tsagkurtamar ina yuusrimtairi aina nuna, tura ina nugkeen waitamu a nuna agkan inaitamsatji, tusar tuina.
6Atum ainatiram egiptonmaya aina tura apu enentaimkachu asa israelita ainan jiitan nakitakai, Yuus waitat susam jiir ishiakua numamtuk amajeamka amaitsurme. 7Tuma asamtai carreta yamaram najanarum, tura vaca pegkesha takamtikchatai jimar jukirum, ni weak japiki jukiti tusarum jigkaatarma. 8Turarum chicham umiktin egkeamu Yuusa arcari jukirum carro yantamen egkeatarma. Turarum nuna yantamen Yuus tsagkurturti tusarum ni anajmatarum orojai najanamu aina egkeatarma. Turawakrumin vaca weenak carretan japiki umartatui. 9Turasha nekattsarum, vaca aina iturak wearat Israel shuar aina matsamtainam yaakat Bet-semes ina nugke nagkatkamunam a nunimpash weti iiyaku ataarma. Tura nunii chicham umiktin ajakua nui weakaigka Israelan Yuusrimpa waittan amasjia tusar nekattaji. Tumar jatapi jutikramajia, tusar titatji.
10Timau asar turusag umikaruiti. Turawar jimar vacan jukiar carretenam apatak jigkawaruiti. 11Tura umikar, tumor orojai najanamun, katip orojai najanamun, tura Yuusa arcarincha carretenam egkeawaruiti. 12Turawar yaja wechartimpash tusar iisartasa patatukar ikag nemaras weriaruiti. Vaca aina yajagka wetsuk carretan japisar israelita aina matsatmaunmani yaakat Bet-semes wearuiti. Tumainai cinco apu filisteo nitasha ukunam patatusar we wenakua yaakat Bet-semes nagkatkamunam jeawaruiti.
13Tumawar nugka Bet-semes tutainam jeawar wenan, israelita aina trigon juwainak yujaina iimsatajkama carretenam arca egketun wainkar, shir aneasaruiti. 14Josué yaakat Bet-semes puju jakua nuna ajariin jeawar iruntsaruiti. Tumawarmatai carretan nakarar kaya shir uun pujamunam patarar vacan mai maawar epenak Yuusan eme anentas iisaru ainawai. 15Carretan eke nakainatsu aig, tura vacancha maa epenatsu aig, Leví weantu aina carretenam Yuusa arcari egketun, tura chikich warí orojai najanamu ainancha jukiaruiti. Turawar kaya uunnum ekeniaruiti. Nu tsawanta nuig shuar Bet-semes matsamin aina Yuusan eme anentas iiyainak vacan maa epeawaruiti. Tura tagku chikich ainancha epeawaruiti. 16Nuna turawarmatai ikag iisar cinco apu filisteo aina nu tsawantinig yaakat Ecrónnum waketkiaruiti.
17Filisteo aina ii pegkerchau takasmaunam Yuus tsagkurtamratji tusar nita yaaktarin anajmasar cinco tumoran oron najana aina nuka ju ainawai: Asdod, Gaza, Ascalón, Gat, tura Ecrón aina nuwaiti. 18Tura katipin nakumak orojai najana aina nunasha nita yaaktari aina shir takasmau, tura nutikachmau ainajai irumram cinco ajakarua turusag najanawaruiti. Tura Yuusa arcarin kaya uun pujamunam ekentsaru aina nuka yamaikisha Josué ajariin yaakat Bet-semes ajakua nui awai.
19Yuus turatarma tichamu aig, Yuusa arcarin urakar israelita aina iisaru asarmatai setenta shuar yaakat Bet-semes matsamin ainan Yuus ijinawaiti. Yuus tura asamtai, nita patai aina shir senchi útiaruiti. 20Tuman wainkaru asar chichainak: ¡Yuus Pegkera nuna emtin ayamrumamainka chikichkiksha atsawai! ¿Yuusa arcari nagkamas takarin Yuus ijitmawaij takursha yáki kuitamkati tusarsha sumainaita? tusar tiaruiti. 21Tuina asar Yuusa arcarin, filisteo aina ataksha awaigkiar itaawara juna tawar jukiarti, tusar Quiriat-jearim yaaktanam shuar matsata nu ujaktarma, tusar chichaman etserin ainan akupkaruiti. Turam chichaman etserin aina jeawar etserkaruiti.
Currently Selected:
1 Samuel 6: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
