Afocarifisi 5
5
Quiricha laenanohineein nenaa aina carenero narejeen
1Nii janate nii rori caohacha choae lauheconaa coaracaaunne jana biji raotono nichajai que leinjiin Quiricha siichaain lauheque. Nii quirichate retutonohineein, jeranu laenanohineein ne, caainsineei fuera que caohatiin funojoineein. 2Nii jana coaracaaunne janate ecu ne leinjiin anjera jataain itolere ichana nainihane que nelateein. Nii anjerate jataain tonijiaain: “Chana jataain nelate que nelateein, caa quiricha fuera beuhin joracanaa naaine”, naain bajae.
3Nete dedeeu, chauratane tinonocoritiin, chauratane asaae, naojoain niha natiin nene chunei nii quiricha joaracaain coaana nainera. 4Nitohaneein neniha chunei nii coina nelateein nii quiricha joracaain coaraain ereretanaa nainera cachana jaunne jataain chanaaun. 5Nii janate: “Coa jataain chanaa. Niha leinjiin nii coina nenaa nainera. Acate Joda lauri caje nenaa Leeon cana curuaanaa inoaensi Rabiri nefoerate ne. Niite nitohanei ichana nainihane coina itolere amuritiin nihane jaun, nii caainsineein nenaa rai fuera soaain joaracareein”, nae canu rai leinjiin acaauru bichauhena.
6Nii janate, nii nelauriananaja rori caohacha trono aina nii jenaain rai nichao que ichaohin nenacaauru, nii coroata choonca jenai ichauhenaauru, naaonjoainuri cataaun niha Carenero Narejeen ne jana coaraaun. Nii Carenero Narejeen coaracaaunne janate ecu chujuheque, cairichaain atinanojoinihalune saijieein, Cana Coaunera Calaohi Jesosoneein. Nii Carenero Narejeente, caainsiniha rai jichone jana caainsine rai nota. Niichurute Cana Coaunera suujueneein satiin chauratane que letononeein neeure. 7Nii Carenero Narejeente cutiin, nii rori caohacha choae raotono nichajai que quiricha siichaain lauheconaa caje quiricha raaori. 8Nitohaneein nii quiricha raaoriha nii Carenero Narejeenne rijieeoritiinte, neseeonriaaure nii Carenero Narejeen acatiha, nii jenaain ichaohin nenacaauru aina, nii coroata choonca jenaain nenacaauru ichauhenaauru. Satiin acaaurute, nenainetiin quitara rijijieein nenaa arafa sirichure. Chaaen techu, nenainetiin oro caje nenaa acau cooruhane jaan curu nainecojoain enuha sacari jujuaain nenaa sirichure- nii coroata choonca jenai ichauhenaauru. Nii enuha sacari juujuite Cana Coaunera bajaauruha Cana Coaunera cachaneein nenacaaurune jaan neein ne. 9Nitohaneein neeinte ena nenaa nenatena que nenateein:
“Iite nii quiricha fuera soaain joracanaa naineei.
Ii sohin jaooruhane janate,
ii coichana que acaauru coreteein,
acaauru ranaa nainiha Cana Coaunerane coina.
Nitohaneeinte,
satiin caa chauratane tinonocoritiin lauri lauri neein nenacaauru cachaauru,
lauri lauri nere que ereein,
naaonjoainuri caje raain,
cachaauru coreteein
acaauru ranaa nainiha Cana Coaunerane coina.
Nitohaneein ichaaine jaunte,
quiricha fuera soaain joracanaa naineei.
10Nitohaneeinte acaauru cocoainaain,
saseredote neein, curuaanaa neein,
naaonjoaineein neeuruhane coina.
Nii jaunte, satiin chauratane sacutaain curuaanaa neein neeure”,
naain nenatecure nii coroata choonca jenai ichauhenaauru.
11Nii baiha coaracaaunne janate, ecu ereerecure arajiin nii rori trono caohacha rohan nenacaauru anjeraauru. Nii baiha nii jenai ichaohin nenacaauru, nii coroatachooncai jenai ichauhenaauru naaonjoainuri. Nii janate ecu neeure jataain arajiin oaraanca milloonneein amurijiriin. 12Acaaurute jataain tonijiaain:
“Jataainte nelate
nii sohin jaonojoineein nenaalu Carenero Narejeen.
Nii jaunte,
itolere ichana nainihane jaanu,
itolere nerausiajeein nihane jaanu,
itolere coitucuhin nihanu jaanu,
itolere que laraajiin nihanu jaanu,
coasitanojoinihane jaanu,
necaohacha que necaohachaane jaanu,
coroaenojoineein nihane jaanu,
naaonjoaain raeraneein ne”,
naaure nii araai oaraanca milloonneein nenacaauru anjeraauru.
13Nii rijieeoritiinne, ereereecuruha satiin Cana Coauneraacha coaunanohine jana aonaaun. Satiin dede que teein niicha coaaunai, atane que teein niicha coaaunai, nii baiha satiin cana temura cucuana cuhane nenacaauru, atane cuhane nenacaauru, naaonjoainuri Cana Coauneraacha coaaunai ere aonaaun.
“Nii rori choae lauheconaa,
chaaen nii Carenero Narejeen, naaonjoaihunrite,
coroaenojoineein aca neein
necaohacha que necaohachaain nelate que
nelateein neeuruhane jaanu teeure”,
naain ereerecure.
14Nii janate, “Nitohaneein neeine”, naaure nii jenai ichaohin nenacaauru.
Nii jana, nii coroata choonca jenai ichauhenaaurute, nii Carenero Narejeen acatiha neseeonriaain coroaecure.
Currently Selected:
Afocarifisi 5: URA
Highlight
Copy
Compare
Share
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
