Afocarifisi 4
4
Dedeeu Cana Coaunera coroaecuruhane
1Niritoha caraine baiha dede coaracaaun jabatoroaainne janate, joaracaeratihaneein ne cana dede bacuujua. Nii janane, jauriaanejeein leinjiin jaiha rijijieein nenaa toroonfeta rijitiin tonihane jana aonacaaunne janate:
“Chajaau cajiha iniha uune, caa baiha nitohaneein airichaainne coaarate ii quete coaraaicha”, naain carai toni eheeona.
2Nii rijieeoritiin, caniha neeoritoha Cana Coaunera Suujuane janane, dedeeu jataain caohatiin nelauriananaja rori trono coaracaaunne janate, ecu nii nelauriananaja rori trono ichoae laujuae leinjiin. 3Nii nelauriananaja rori ichoae nenaate, ajeri jataain caohati colohin nenaa jaspe tocohanenihane cornalino tocohaneein jataain caohatiin colohe rai jaberoco. Nii nelauriananaja rori tinonoritiinte, tinohanre leinjiin iino, jataain conotiin beraurosihojoaain colonaa esmeralda tocohaneein. 4Chaaen nechu nii nelauriananaja rori trono tinonoritiin niha jataain caohatiin coroata choonca jenaain rori caohachaaurune jana coaracaaune janate, ecu nichoae neeure coroata choonca jenaain ichauhenaauru, somajaain cajione que cajionecohin, oro caje ichanohin comai siriin. 5Nii rori trono cajete, jataain mijiaaineein mitue jiacane, erenaa, arara, naaonjoainuri. Nii janate, nii rori acatiha lanalanaque caainsineein siricho. Nii caainsine lanalanaqui sirichote, nii caainsine Cana Coaunera suujueneein ai. 6Chaaen techu, nii rori trono acatiha cucuana baca tocohaneein, jataain ajiarojoeritiin asaaun tiaain jiquihaquiin inanacae. Nii nelauriananaja rorihuru cataaun nenaa rori tinonoritiinte ne, jenaain cacha tocorijianeein, janori, nacatichei, naaonjoain jeloon notaacoaain. 7Nii leinjiinte aain tabai leeon tocohane. Leeochate jana, baca curuaanaa toro tocohane. Jana nii acaauru nichatajate leinjiin cacha tocohane. Jana acaauru nejenate, uujuirii tabai aaquila tocohane. 8Nii jenai jelai rai nichao que ichaohi nenacaaurute, nenainetiin saotaneein itarohin, jianacoon, asaaun, naaonjoaain acaauru jaberoco nainecojoain nota sirichure. Janotiin, jiichoo, naaonjoaainte:
“Cana Curuaanaa Cana Coaunera esine,
itolere que laraajiin
itolere ichana naineraneein nenaa,
iite ineein neeilu,
enanetojoeein acaneein neei-
ineein turuha uriquiin”,
naaure jiichoo, janotiin, naaonjoaain jianelanaala.
9-10Nii cacha tocohaneein nenacaaurute, acaneein necaohachaain niha nii rori caohacha ichoae nii chariji bana ohelanaala nenaane coroaecure. Nii nainihate coroata choonca jenai ichauhenaauru, nii ecu nenacaauru nacatiha neseeonriaain coroajeein, nii rori acatiha acaauru rai comai siheitiin:
11“Iite esinae rauhijiriin,
canacaanu Curuaanaaneein canacaanu Coauneraneein
ii necaohacha que ineein neei, laraajiin.
Iite itolere coaaunaain neeilune jaaun,
ii jereeine rijijieein necoaaunaain nihacoaelu”,
naaure coroaecuruhane naineein.
Currently Selected:
Afocarifisi 4: URA
Highlight
Copy
Compare
Share
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
