Afocarifisi 6

Caainsine fuera

1Jauriaanejeein, leinjiin fuera joracaa nii Carenero Narejeenne jana coarajihanune janate, nii jenaain ichaohin nenacaauru caje leinjiin ere arara rijitojoaaintiin tonijiaain toniin: “Chajaau cajiha”, naane jana, 2coaracaaunne janate ecu leinjiin cabario somajaain choae laujuae leinjiin cacha tenuna sijiaain. Nitohaneein comai teeuruha nii cacha raine baihate, amue nii que nejeratenacaauru amuritiin, itolere bana acaauru amuritoeraneein nihane coina.

3Nii janate, nii fuera que jaurii joracaa nii Carenero Narejeenne jana, nii ichaohin nenacaauru coroataja: “Chajaau”, naane jana aonaain coaracaaunne jana, 4ecu mitue leeocha cabario lanajaain. Nii janate nii cabario choae nelauriaanaa rai nelateein teeure, ita sohin ita jaaoruha caa chauratane sacutaain nenacaauru ne coina. Nitohaneeinte leinjiin Sabere seeonjoa teeure nii cabario choae nelauriaanaa cacha rai.

5Nii baiha, nii fuera nichataja joracaa Carenero Narejeenne jana coarajihanune janate, nii ichaohin nenacaauru caje acaauru nichataja:

“Chajaau”, naane jana coaracaaunne janate, ecu mitue cabario jichojoaain. Nii janate, nii cabario jichojoai choae lauheconaa leinjiin balaansa siichae. 6Nii janate, nii jenai ichaohin nenacaauru caje ecu toniin:

“Le quilojoei aroso rijijieein nenaa tiricote corereein le janohin amihanenaa neein. Nii jana, nichata quiloi aroso rijijieein nenaa sebadate corereein le janohin amihanenaa neein. Coa laen erene, bino, naaonjoaain aasaeca”, naain toni erenaa nii jenaain ichaohin nenacaauru cataaun toniin.

7Nii fuera nejena joracaa nii Carenero Narejeenne janate: “Chajaau”, nae nii jenai ichaohin nenacaauru caje leinjiin. Nii jana coaracaaunne janate, 8ecu ne cabario somaajiojoaain. Nii cabario choae nelauriaain cunaa curuaate Onaane. Nii ichoachaniha unaa caaijie unaate onaa curuaanaa moconajaerane. Nii Onaa curuaanaa moconajaaera raite, chauratane neleru nejena que niicha ichana nainei ichaane jaanu teeure, ita sohin ita jaaoruha arajiin cachaaurune coina, tabai mijitena caaun ooruha cachaaurune coina, cunai caaun ooruha cachaaurune coina, cachaauru sooruha atane que nenacaauru aain tocohaneein nenacaauru coitucuchuhicurune coina.

9Inae nii fuera nesaoqui joracaa Carenero Narejeenne jana coaracaaunne janate, Cana Coaunera belaihuruhane jaan rori altar asaae neeure Cana Coaunera beratenojoi beeuruhane coreniha atinanohichuru. 10Nitohaneein ecu neeinte jataain tonijiaain: “Itolere curuaanaacuru amuritoheriin Curuaanaa osa colane nenaa saanto- cha ichaaine coina aitohine icharaneein nenaa, chatoanai bana caa chauratane que nenacaauru ichao colurujueein, canacaanu atinaeraauru cairichareei”, naaure nii ecu nenacaauru onacaauru.

11Niritocuruhane janate, acaauru rai cajione somajaain teein: “Jauriaa nebetacaaorihuche coa carajaaeriin. Jaiti lanajeeca, inara sohin jaaoruha ne rijijieein, leeochaauru inara nejeraauru Jesocurisito beratenojoi beeurera sohin jaooruhane nainaauruhane reeintiaain cohacorihuche”, nae acaauru rai.

12Nii fuera nesaotane joracaa Carenero Narejeenne jana coaracaaunne janate, uhe jataain mijiaaineein carora tabai. Nii janate, jataain jicholeneein conoene enoto. Nii janate, atene netonai conoelanaala ichana tocohaneein ne. 13Nii janate, jataain mijiaainetiin uhin liaaca cujuanane jana naluha iquera inaa nujuarine amuneein nalue dede caje chauratane choae arasijie. 14Nii janate, retutunohiniha faferone tocohaneein nereetuhitiin nitajiheite dede. Nii janate, nerurujuaacoaain nelonae satiin situha cataaun nenacaauru obenecuru aina ichatane ecuunooru. 15Nii jaunte, chauratane que satiin curuaanaa neein nenacaauru atane jachuuru cuhane, ichatane cataaun nenacaauru ajeri cuhaneeuru nasichure, tabaaihuri aina jiniiquiin, chaaen soondarooru curuaanaacuru, coriquihonacaauru, jataain itolere que laraajiin nenacaauru. Cairichanojoineein nenacaauru, chaaen cha ujuaihonelanaala nenacaauru, naaonjoainuri nasichure atane jachu, ajeri jachu, naaonjoainuri cuhane. 16Nitohaneeinte: “Canacaanu choae nefaruhin canacaanu asihu, canacaanu coaraa taa rori caohacha trono choae laujuaine coataa, jataain necairichanaa cuhane canacaanu casetecaa Carenero Narejeenne coataa. 17Inae catohaneein caseteco coaraain necairichanaa cojoanonaa que turuhane jaun, nerinaain chunei abaatana nainera”, naaure.

Currently Selected:

Afocarifisi 6: URA

Highlight

Copy

Compare