Génesis 50

1Nitohaneein oha inaca Jacobone jana jetaote, rai jaberoco que nebalurucaain nomeri lioracaain jetao chanae Jose. 2Nii baiha jetaote, rai letononeein cacha coichaeraneein nenacaauru letoae jetao, setuha rai jaberocone coataa, inaca Isaraele jaberoco rujuaauruha jujuaain nenaa balsamo quene coina. Nii jana jetaote, nii aitoha Josene rijijieein ichaain 3jena choonca janoneein carajaain, nii Isaraele jaberoco rujuaaure, jaberoconeein nedaane coina, nii carajarihain nitohanai ichacuruhane jaun.

Nitohaneein jetaote, Egipto cocoaichacuru netonai caainsi choonca janoneein nii Isaraele amure coinaderaaure. 4Nitohaneein inae coinaderaauruhane jaa cojoanonaa nainaauruhane jaun jetaote:

“Inara rai caohacha ichanajaaocaaunne coitucuhin coaauquichene, atiin carai, 5inae ohoene lalajihanerai, Canaan batane que niicha rucujuei ajeri jioararo cuhane rucuhecaaunne jerihalu canu inacane jana, Cana Coaunera notaracaae jerichaaunlune benichuche Faraaon raicha. Atiin jeremiinne, canu inaca conautenicha. Inae conautichaaunnena jelaiha cauha ureeunnicha”, naeratiha Faraaon letonocuru curuanaacuru que Josene jaun jetaote, cuhin Faraaon rai aitocuruhane jana, Jose rai:

6“Chajaain nii ichei aitocoalu ii inacane rijijieein conautenihura”, naerate Faraaon. 7Niritoroatiha Faraaonne jaun jetaote, rai inaca conautiha cuha Josene jana jetao, corihaniha cuure satiin nii Faraaon loreri Palacio asaae letonocuru curuaanaacuru, Egiptoo nenacaauru cocoainanacaihuri, naaonjoaihunri. 8Chaaen nii Jose aina rai loreri asae nenacaauru, rai nejeraauru, satiin nii Jacobo amure foeratenojoineein nenacaauru, naaonjoaihunri. Acaihaniji acaauru irihuru, canaanaihuru, naaonjoaihunruhacha jetaote, nii Goseen batane que ratiriin jetao cuure. 9Nitohaneein cabario que tararaeraain nenaa carretacuru cuhaneeuru, cabario ichoaecuru, naaonjoaain Jose corihaniha cuuruha cachaaurune jaun jetaote, jataain arajiin cuure cachaauru. 10Inae enoto mitu nichajai que Jorodaaun auhaniha cuujueein jetaote, Goren-ha-atad turuhin jetao, ecu jataain coisiin jetao cosinacaain coinaderaauruhane jaun jetao, ecu caainsi janoneein nii rai inaca coinaderae Jose.

11Nitohaneein cosinacaain inaderaauruhane coaracuruha nii jelai batane que ichaonacaauru Cananeeocurune jaun jetaote: “Jataainte ita coisiin cosinacaain ita coinaderaain ita conautecure Egiptoo cocoaichacuru”, naauruhane jaun jetao, nii Jorodaaun jera turuurunaja jelai curuaateeure, Abeli-Mizrain neein, Cananeeo cocoaichacuru.

12Nitohaneein jetaote, acaauru rai aitohalu nii acaauru inacane rijijieein, 13nii Jorodaaun jera jaohin cuhin Canaan amaain jetao, nii naraaichuru aina natane bananu que, Ititia cocoaicha Eforoon caje Abaraauncha coretei Macpela nenaa ajeri jioararo cuhane jetao nii inaca Jacobo conautecure rai calaohichuru.

Nii atane aina ajeri jioararo jetaote, Mamereu neein enoto mitu nichajai jeloon ne.

14Inae nii inaca conautihane baiha jetaote, rai nejeraauru, satiin nii corihaniha cunacaauru cachaauru, naaonjoaihunri aina jiniiquiin jetao Egiptoo jelaiha cauha cue Jose.

Inae ohane catainaa Josene

15Nitohaneein inae oha nii acaauru inaca Jacobone jana jetaote: “Jerihanete itolereecha que cairicharejetocoaachene jaun, cana que nererojoecaain necocaeratereein taa cana nejera Josera”, naain coaaucuruhane jaun jetao nere letoaaure Jose rene. Nii jaun jetaote cuhin: 16-17“Jaiti ohenihane ajinihate: ‘Atiin baasoneein ii cairichaaeriin ichoharaain, osa que jataain nesarucaanulu ii nejeraneeine que, ishuujua acateeura’, naeratelu cana inaca, ii rai aitocoaanune coina. Nii jaunne ichei aitoroatichaanu, jataain baasoneein cheterejetocoaanune que canacaanu que ishuujua acateeine coina, jerichanejeein cana inaca Coaunera Cana Coaunera cachaneein nihacaanune jaunra”, naerateeuruhane jaun jetao, Jose rai be nii nejeraauru letoanojoi.

Niritiin rene turuhin nejeraauru ere biha nii acaauru letonone aonajeein jetaote chanae Jose.

18Nii jana jetaote, raajeniha turuhin que suujua acatecuruhane coaaratiha nacatiha atane que nauri turuanacanejeein jetao, nenoracaaure nii rai nejeraauru. Nitohaneein jetaote:

“Nocoa inae uhacaanu ii letononeein nihacaanune coinara”, naauruha nejeraaurune jana jetaote:

19“Aihachuhisi niquicha, nete naineneeiche casiichenera. Cana Coaunerate nii coitucureeincha. 20Inarate niqui, jataain canu cairichanaa coacuhin canu que necoreteeichelu. Nete Cana Coaunera, caa ena inaraacha coaraineein, onaa caje arajiin cachaauru ichoteratichaaunne coina, nii cacairichaaichene jaa corelu caohacha quera. 21Aihana jaun jiaonriha casiichenera. Canune, itolere bana tenajaaoncaaunne rijijieein, inara bereecuru aina jiniiquiin lenone quichene jaanu tereeunnicha”, nae jetao nejeraauru rai Jose.

Niritiin, jataain acaauru belaain, acaauru rai iriha Josene jaun jetaote, chaque tonajelanaala raotojoeein neeure nii rai nejeraauru.

Oha Josene

22Nitohaneein jetaote, nii inaca araaichuru aina Egipto batane ichaohin jetao, lefasha lechoonca jaanaca nihane reentihaain ichoaelu Jose.

23Nitohaneein ichaohin jetaote, nii rai calaohi Efaraain ichoalacuru calaohichuru coaraelu jetao Jose. Jerichanejeein jetaote, rai calaohi Manasee calaohi, rai nichoala Maquiiri calaohichuru raain jetao loreri asae sirinaarejete.

24Nii baiha neeoriin jetaote: “Inae orichaaunnicha. Nete cana foeratenojoihuru coroatajaneein, caa Egipto batane caje acaauru rocoreein Cana Coaunera, cana fojiara Jacobo foerateeurera Abaraaun, Isaca, naaonjoaihunri rai niicha benateilu atane que ichaooruhane coinara”, naain jetao: 25“Esinae rauhijiriite acaauru coroatajaneein caalai caje acaauru rocoreein Cana Coaunera. Aihane jaun acaauru rai beeuchete, inae nitohaneein caalai caje acaauru rocoha Cana Coaunerane bana, atiin acaauru jiniichaain caalai caje canu bucuuru amaauruhinera”, nae jetao, nii nejeraauru Isaraele calaohichuru rai Jose, Cana Coaunera notaracae ichacururichaainne que aitocuruhane coina.

26Nitohaneein lefasha lechoonca jaanacaneein ichaohin Egiptoo neein oha Josene jana jetaote, setuha cacha jaberocone coataa rujuaauruhane jaa jujuaain nenaa balsamo que rai jaberoco rujuaain jetao, curu cuhane teeure.

Currently Selected:

Génesis 50: URA

Highlight

Compare

Copy