Éxodo 1
1
Egiptoo necairichaauruha isaraele cocoaichacurune
1Caaurute Egiptoo Jacobo aina turunacaauru isaraele cocoaichacuru laurichuru curuaacuru ne, 2Robeen, Simeeon, Lebi, Joda, 3Isacar, Saboloon, Bejamiin, 4Daan, Neftali, Gada, Asere naaojoainuri. 5Acaauru jetaote nenainetiin comasai, bereecuru, naaonjoainuri aina, Egiptoo acaauru nejera Jose, Jacobo calaohi rene turunacaauru ne.
Nii bana jetaote caainsi choonca neeurelu nii Jacobo nefoerateeuru. Nitohaneein Egiptoo turuuruhane jana jetaote inae Egiptoo nesilu Jose.
6Nii baiha neein jetaote oorelu satiin Jose aina rai nejeraauru, chaaen acaauru foerateeurera naaonjoainuri. 7Nejetaote arajiin calaohichuruha nii Isaraelitaaurune jaun jetao arajiin nefaain itolere que laraajiin neeurelu. Nitohaneein nefaain jetaote itolere Egipto batane sacutaain neeurelu.
8Nii jana jetaote inae jataain carajaa oha Josene baiha jetao Egipto curuaanaa neein enoelu leinjiin Egipto cocoaicha, Jose coitucuelanaala nenaa. Aca jetaote nii Egipto cocoaichacuru rai jetao: 9“Isaraele cocoaichacuru coaracuche. Inae cana amurijiriin arajiin laraajiin nefaauruha. 10Aihana jaun nainihei nenacaaen nefaauruhane coarajihacacheneta. Ainihacachenete cana que nejeratenacaauru coroatajanecuruha cana sonaa quene. Cana amuritooruhane caalai caje amuurureein”, nae jetao Egipto curuaanaa.
11Nii jaun jetaote amihanenaa tabai que isaraelitaauru cairichaain, amihanenaa beraicha que beraichatenajae Egipto curuaanaa. Nitohaneein jetaote isaraele cocoaichacuru cairichae Egipto curuaanaa amihanenaa caaintati que amiharatenajaain. Acaauru que coroata neseein nese Pitoon, Ramasesi, naaonjoainuri icharateein ecu ichaonaanaja, acaauru biji achune, naaojoaihunri rucuhecuruhana jaanu coloheri icharate latecuruhane naineein jelai caje raauruhane coina Egipto curuaanaa Faraaon. 12Nejetaote nitohaneein cairichanajaauruhane saijieein jetao nenacaaen nefajeein sacuure isaraelitaauru. Nii jaun jetaote, inae isaraele cocoaichacuru coasichure Egipto cocoaichacuru, acaauru amurijiriin nefaauruhane jaun. 13-14Nitohanein jetaote, amihanenaa tabai que mainajeein cairichanajaauruhane choae tacaain, omane que itanicha jasiiteein ladiricho jaerateein ocoana coamijianeeone maajeein icharatecure. Nitohaneein jetaote, itolere amihanenaa que isaraele cocoaichacuru cairichaaure Egipto cocoaichacuru. 15-16Niichoae tacaain jetaotechu, acaauru bereecuru nejanoha coaaranu que amihanenacaauru enecuru Sifra, Fua, naaonjoain rai jetao: “Caohachaain acaauru bereecuru nejanoha coaracuche. Ene cojoaajinihane ichaolaauche. Jana quicha cojoaajinihane sohin jaaochera”, nae jetao Egipto curuaanaa, nii isaraele cocoaichacuru bereecuru nejanoha coaaraauru rai.
17Nejetaote, acaauru casetecaa Cana Coaunerane coasichuruhane jaun, Egipto curuaanaa ere tonorae lanaala, quicha cojoaajiurune maajeein ichaolaaure nii isaraele cocoaichacuru bereecuru michuurera. 18Nii jaun jetaote, nii canaanai michuureraneein amihanenacaauru cotiharateein acaauru rai:
“Chanuna caa isaraele cocoaicha, quicha cojoaajihuru ichaolaaiche”, naain acaauru caje bajaa Egipto curuaanaane jana jetaote:
19“Aiha Egipto benene rijijieein caaintaain beree janoaaureniha isaraele benecurune jaunte, acaauru rene turuhacaanune ajiniha, inae beree janoaaurera”, naaure jetao nii canaanai michuureraneein amihanenacaauru enecuru.
20-21Nitohaneein jetaote, nenacaaen arajiin nefajeein sacuhin itolere que naurutaain nelararajiaain neeure isaraele cocoaichacuru. Nitohaneein Cana Coaunera coasiha Egipto curuaanaa ere tonoraaureniha nii canaanai michuureraneein amihanenacaauru enecurune jaun jetaote, acaauru coroatajaniha Cana Coaunerane jaun jetao, arajiin nefaaure nii coroatajai enecuru inamacooru. 22Nii jana Egipto curuaanaa Faraaon jetaote, satiin cachauru rai jetao: “Satiin quicha cojoaajineein nejanoanacaauru sohin jaaoche acauhanaura. Ene cojoaajihuru ichaolaauche laaenra”, nae jetao Egipto. Curuaanaa Faraaon.
Currently Selected:
Éxodo 1: URA
Highlight
Share
Compare
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
