Génesis 49
49
Nere satononiji que, calaohichuru rai iriha Jacobone
1Niritiin jetaote: “Cajiha carohan nichuuntaauchena, ‘Naaonjoaainte, caa caje cuaain ichaoriquicheeincha’, naain inara rai ichaoriquicheeinne bete coitucuhichera cacalabihuru”, naain calaohichuru cotijiaain jetaote:
2“Chajaauchete, canu calaohiniquichene, canu inara inaca Isaraelineein Cana Coauneraacha curuaatei Jacobo nichaaunne ere aonaquichera”, naain jetao:
3“Robeen, iite jauriaanejeein canu calaohichuru ajichaneein quiicha siriineein neei. Iite itolere que laraajiin 4inae inejeraauru amurijiriin acaauru curuaanaaneein nenaa naineei niqui. Nete inae ainereeini, caohachaain ii suujua coaraain ichoaeneeine jaun, enaacha joaereein cha chaain neeine jaun. Nitohaneeine jaunte, canu comasai rijijieein nenaa canu coseenra aina siniin iicha jerei ichaailu”, naain jetao:
5“Jana inara Simeeon, Lebi, naaonjoaineeichenete ita nejeraneein inara biji achune siriquiche enaacha sonajaain jaohichene jaanu que. 6Nii jaunte, obajeein cachaauru sohin jaohichelu. Nitohaneeichene jaunne, netaojiaain neeichene chariji bana inara aina nenaa jereneeun, nechu joaaereein coreniha bacaauru tijiaaurune maajeein bateeiquichelune jaun.
7Nitohaneeichene jaunte, obajeein neeichene, nechu jataain taebinaeneein neeiche. Canune, cajihaneein inara nejeraauru laurichuru naineein itolereneein riaaneein neeuruha inara foeratenojoineein nenacaaurune coina ichareeunni”, naain jetaote:
8“Jana ii Jodaa, ii coroaecate cuurureein inejeraauru. Iite, ii que nejeratenacaauru amuritoriquiin itolere bana. Nii jaunte, ii que suujua acatecuruhane coaarateeurureein inejeraauru.
9Jataainte leeon narejeen rijiiquicha, canu calaohi Jodaa. Charijieein chaainti, ichauhenanihane que airijiin, leeon ichauhena rijijieein nesariin, nainaain quiin, neloraain tocoeeque leeon narejeen, nii rijiiquicha. Nii jaun nerihaain ichei nejerateein, ii rerohecaeraanuuruta.
10Niheichu nerihaain nii Jodaa caje laraajiin nihane jaa biji achune otiha ruluera, inae turuha uha nii otiha erora, rai nefoerateneein nenaane que tiaain. Acate laen inae turuhane bana, satiin nere tonoraa cuurureein cachaaurura.
11Acate oba nujua que rai boro narejeen cositeein, oba caje nenaa bino que rai cajionecuru bichoroerane.
12Rai notate bino amurijiriin jichojoae. Jana rai catute somajae, baca itaari amurijiriincha”, naain jetao:
13“Jana Saboloonte, cucuana auhaniha niha najauriaauruha bote tabaihurune jaa cofauhanau ichaoha cureeincha. Nii jana rai natane lucute Sidoon que uujoareeincha.
14Jana Isacarate, itolere bana joaenreein chuni letononeein ne. 15Leeocha atanene que turuhin coaraane jana caohatoha jelai batanene coaraainte, raajenihane nelararajiaain rainu que amihanelanaala ecu nenacaauru cachaauru letononeein nelu.
16Jana Daante, naraaichuru Isaraelitacuru curuaanaaneein neeuruha rai nejeraaurune rijijieein, rai laurichuru curuaanaaneein nereein.
17Chaentechu jataain nechu aansainiha cureein nii Daan. Charijieein chaainti bero cuhane cabario cojoaain, rai tijia calaain, nii nichoae cunaa cacha naluhite acano; nii rijiichate cureeincha”, naain jetaote:
18“Nitohaneeuruha canu calaohichurune jaunne, leinjiin iicha canu ichoteratera neeine queechane coacuhin neeunra, Cana Coaunera”, naain jetao:
19“Jana Gadate coinetiha uurureein que nejeratenacaauru. Nete acaauru amuritiin sonajaain racatihanaareeincha.
20Jana Asere raite, coroatajaje lanaala niha lenonene jaun, reeychuru que banijiaain nenaa lenone terateraneein niha cureeincha.
21Jana Neftalite, aiha leinjiin ocoaene rijijieein, jataain raotojoeein rai calaohichuru caohatonanai aina amuhemujue”, naain jetaote:
22“Josete laen atane caohacha que arajiin inacaain niha leinjiin enuhane rijijieein, arajiin cachaauru rai lenone tiha cureeincha.
23Chaentechu que nejerateein itolere bana que sonaaquiin nenaa jerecurureein cachaaurura.
24Nete, coroatajaniha satiin Isaraelitacuru beraichaneein nenaa Cana Coaunera, Jacobo nichaaunne Coaunerane aina laraajiin rai biji achune que acaauru acateein acaauru amuritonajaque.
25Canu ii inaca nichaaunne Coaunera Cana Coaunerate, ii coroatajanereein, dedeeu nenacaauru, cucuana cuhane nenacaauru, naaonjoaihunri teein. Chaentechu, ii comasai coroatajanereein ii aina arajiin canaanai sirihane coina. Jataain nariha Cana Coaunera, nitohaneein ii coroatajanihane coreniha.
26Canu ii inaca nichaaunnena, raotojoeein caohachaain nihanune coina canu cojiotaauruhalu canu foerateracurune amurijiriin ii cojiotaaun. Caa ii cojiotaanunete, chariji bana satonoelanaala nereein. Chaentechu ii nejeraauru amuritoheriin janiinojoineein neeine jaun, caa ii cojiotaanune jaa ii raineein niha cureeincha.
27Jana Bejamiinte, nesari sohin nainaain que lenonihane baiha, rai naraai taebinae rai caute tiha taebinaene rijijieein ne”, naain jetao calaohichuru cojiotae Jacobo.
28Niritiinte, nii lechoonca coroata laurii Isaraele foerateeureraanu, le cacha cachaauru, rai calaohichuru cojiotae Jacobo.
Oha Jacobone
29-30Niritohane baiha jetaote: “Inae nenacaeneein ichaorihaaunnita. Inae orichaaunicha. Nii jaun inae ohanune, canu foerateracuru aina jiniiquiin acaauru rohan nihanune coina Canaan batane que, Ititia cocoaicha Eforoon rai atane que nenaa ajeri jioararo cuhane, canu rai atane rucuhecuchera; nii naraaichuru aina acaauru natane bananeein nihane coina Eforoon rai atane aina curuaecaain Mamere jeraniha nenaa Macpela ajeri jioararo cana foeratera Abaraauncha coreteilu cuhanera. 31Ecute, Abaraaun, rai comasai Sara, chaaen canu inaca Isaca, canu neba Rebeca, naaonjoaihunri conautecurelu. Ecunechu ohalu Learane jana conauteeunlura. 32Nii ecu nenaa atanete, nii ajeri jioararo aina curuaecaain Ititiacuru caje, Abaraauncha coreteilunera”, nae jetao calaohichuru rai Jacobo.
33Niritiin calaohichuru suujuatihane baiha jetaote, inae neloraain jetao ohe Jacobo.
Currently Selected:
Génesis 49: URA
Highlight
Share
Compare
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
