Génesis 47
47
1Nitohaneein jetaote, inae Goseen batane que turuuruha Canaan batane caje uhin, inaca aina nejeraauru, satiin rai rucuheleeuru, bacaauru, carenerocuru, naaonjoaihunri uhaainne benaa biha cue jetao Faraaon rai Jose. 2Nitohaneein turuuruhane benaa biha cuhane jaun jetaote, saoquiin nii rai nejeraauru amaain jetao, Faraaon que acaauru coitucueratiha cue.
3Nii jana jetaote, nii Jose nejeraauru coaraain jetao:
“Chatoanai amihanenaa que amihaneeiche inarata”, naain acaauru caje bajaa Faraaonne jana jetaote:
“Itolere curuaanaacuru curuaanaaneeine cacha nichaanunena, aihuruhalu canacaanu foerateracurune rijijieein, itolere carenerocuru irilana que amihanihacaanura. 4Nii jaunne Canaan batane que niha jataain mijitenane jaun, caa atane que ichaohacaanune coina uhacaanura; niheichu canacaanu irihuru lenonenu que nihanatiin neniha omanene jaunra. Atiin itolere curuaanaacuru curuaanaaneein neeine jereeune caa Goseen batane que neein ecu ichaohacaanura”, naaure jetao Faraaon rai.
5Niritocuruhane jaun jetaote:
“Ii nejeraauru aina ii inacate, cau ii aina ichaoha uure. 6Aihana jaun, caa Egiptoo batane quete nainecure acaauruacha jerei ichacuruhane”, naain jetao, “Chajaain caa leeochaauru atanecuru amuritoheriin jataain atane caohachaneein nenaa Goseen batane teeu acaauru raite, ecu neein ichaoorumiin. Chaaen acaauru jana neeuruha itolere irihuru berainaa inaeraneein cachaaurune, canu fasotooru jana tenajaaute canu irihuru beraichaneein ecu neeuruhinera”, nae jetao nii Jose rai Faraaon.
7Nitohaneein jetaote, rai inaca Jacobone maajeein amaain jetao, coitucueratiha cuha Josene jana jetao, jataain que suujua acatihane coaarateein jetao, Faraaon que nocoitucueratiha Jacobone jana coaraain jetao:
8“Inaaonjoan jaanaca neeita”, naain caje bajaa Faraaonne jana jetaote:
9“Cajihaneein amuhemujueein, inae lefasha nichatachoonca jaanaca neeunra. Chaennechu nii ajaanaacuru naineein baasoneeichuru ichaoonra. Nete jaiti carai carajaene nii ichaohanune, jaiti ichaooruhalu canu foerateracurune carajaneein ichoaenihaunne jaunra”, nae jetao Jacobo.
10Niritohane baiha Faraaon rai necoeein jelai caje amuha Jacobone jana jetaote, ecu neeuruhane coina nii aitoha Faraaone rijijieein 11Egipto batane jataain atane caohachaneein nenaa que jetao tenajae Jose.
Nitohaneein jetaote, acaauru que banijiaain atane siriin Goseen batane nenaa Ramases batane neeurelu rai inaca aina Jose nejeraauru. 12Nii ichoae tacaain jetaote, satiin naraaichuru rai lenonecuru te latecuruha nii naraaichuru jeeonijianaain Jose.
Inae saa cachaauru coriquine jaun, lenonecuru que carenerocuru coriha Josene
13Nitohanihane jaun jetaote, satiin nii atane sacuritaain neniha tiricone jaun jetao, jataain jelai amuritoheriin nauruta naurutaain cuujue mijitena. Nii jaun jetaote, Egiptoo batane, Canaan batane naaonjoaihun mijitena caaun ohajeeure cachaauru. 14Nitohaneein jetaote, tirico coretecuruha satiin Egiptoo cocoaichacuru aina Canaan cocoaichacurune jaa coriqui jitariin rucujue Faraaon loreri asae Jose.
15Nii jaun jetaote, inae neniha Canaan cocoaichacuru aina Egiptoo cocoaichacuru coriquine jaun jetao:
“Atiin canacaanu lenonenu teeine raite nera. Coatiha caohacharihei, inae neniha canacaanu coriquine jaun mijitena que canacaanu ateinarateeinene coaalanaalata”, naauruha Jose rene turuhinne jana jeteaote:
16“Inae neniha inara coriquine caaun aitocoichene, inara irihuru uhaain uuchene que inara rai tirico corera”, nae jetao acaauru rai Jose.
17Nii jaun jetaote, cabario, carenero, baca, cabario rijijieein nenaa asno, naaonjoaihunri amaain cuuruha Jose rene Egiptoo cocoaichacurune jaun jetao, nii acaauru irihuru coreniha acaauru rai tirico te jetao Jose, nii ajaanaa satono que turuhane reentihaain.
18Inae saa nii ajaanaane jaun jetaote, leeocha ajaanaa cuhane jetao, Jose coaraa cuure.
“Inae neniha canacaanu rai coriqui jaunne suujuena nainihaacaanu ii queta. Chaentechu satiin canacaanu irihuru inae Faraaon raineein neeurera. Nii jaun, inae nihei nenacaaen canacaanu lenone coreniha canacaanuhacha teenita. Acaihaniji canacaanu jaberoco aina canacaanu ataneechate nera. 19Aihana jaun, canacaanu coretecuche canacaanu atane aina curuaecaainne que amihanihacaanu Faraaon cachaneein, coreniha canacaanu rai tirico teeichene coinara. Aihane que lenoneein ichaohin amihanihacaanu, nabana ohacaanune canacaanu atane aina jiniiquiin nitajihacaanune coataara. Nii chaque inara rai nelatejeerihei, ohin canacaanu atane aina jiniiquiin nitajihacaanuneta”, naauruha turuhinne jaun jetaote, 20satiin nii Egiptoo batane que nenacaauru acaauru atanecuru corete jetao Faraaon rai Jose.
Nitohaneein jetaote, mijitena caaun jerecurenihane sainejeein rai natanecuru que necoreteeuruha Egiptoo cocoaichacurune jaun jetao, satiin Faraaon que banijiaain ne nii atanecuru. 21Nitohaneein jetaote, satiin Faraaon cachaneein neeure nii Egiptoo batane sacuritaain nenacaauru Egiptoo cocoaichacuru.
22Acaihaniji, saserodotecuru caje jetaote laen, acaauru atane coretene Jose, core colane acaauru rai tirico tihajiha Faraaonne jaun que lenoneein neeuruhane jaun.
23Nitohaneein cachaauru caje atane coretihane baiha jetaote:
“Inae inara atane ainate Faraaon cachaneein neeiche, rai cachanu que inara coretichaaunne jaunra. Nocoa tirico ucuhe, nii inara caje canacaanuhacha coretei atane que temuhichene coinara. 24Nete laen, inae tainaca que tihane bana, saoqui turiin inaraacha taojiai caje, nii nesaoqui turi teeuche Faraaon raine caohachaera. Jana nii jena turii cautena cajete nainequiche, satiin inara aina inara loreri asae nenacaauru, inara bereecuru, naaonjoaihunri aina jiniiquiin que lenoneein ichaohin temunaa nainequiche nii atane quera”, naa acaauru rai Josene jana jetaote:
25“Jataain caohacha cachaneeine jaunte, jataain canacaanu beelaine jaun, onaa caje canacaanu ichoterateeicha. Nii jaunne, inae Faraaon cachaneein nihacaanura”, naaure jetao rai.
26Nii jaun jetaote, nii saoqui turiin niicha taojiaauri nesaoqui turi tirico teeuruha Faraaon raine coina, leinjiin rauhi teein satiin Egiptoo batane sacuritaain nii rauhi benaa be Jose. Nii jaun jetaote, nitohaneein ichacuruhane coina enenetojoeein ne nii rauhi.
Ne jetaote laen, chariji bana tirico teeurene saseredotecuru, Faraaon raineein neniha nii acaauru atanena jaun.
Satononejeein jerihane rijijieein iriha Jacobone
27Nitohaneein jetaote, Egiptoo neein ichaohin, acaauru que banijiaain nenaa Goseen batane que neein jetao, ecu coroatajajelanaala nefaain neeurelu isaraelitaauru.
28Lechoonca caainsi jaanacaneein Egiptoo ichaohane que jojohin jetaote, lefasha jena choonca caainsi jaanacaneein jetao ichoaelu Jacobo.
29Nii jaun jetaote, inae nenacaaen ichaohene netojoeein naonaenihane jaun jetao, rai calaohi Jose cotiharateein jetao inae rene turu jana jetao:
“Caa ichei aitorichaaunnine ichariquiin esinae rauhijiriinne, chajaain aihane, canu anae asae ii biji teein, Cana Coaunera notaracae ichariquiine que aitoone aonaera.
30Inae ohin canu foerateracuru aina jiniiquiin niha cuhanune, jiaonriha atiin caa Egiptoo canu conauteeinera. Atiin caa Egipto caje canu amaain canu foerateracuru aina canu rai atane rucuhecura”, naa Isaraelineein Cana Coauneraacha curuaatei Jacobone jana jetaote:
“Saa ai. Nii aitohine rijijineeinna chujia ucuae ii amaain ii rucuhereeunnicha”, naa Josene jana jetaote:
31“Chajaain aihane esinae rauhijiriin ichariquine coina, Cana Coaunera notaracae aitoote aonacaara”, naa rai inaca Jacobone jaun jetaote:
“Esinaene rauhijiriin, Cana Coaunera notaracae nii jereeine rijijieein ichareeunnicha”, naa Josene jaun jetaote, rai sininaja ichoae nenoracae jetao nii Isaraelineein Cana Coauneraacha curuaatei Jacobo.
Currently Selected:
Génesis 47: URA
Highlight
Share
Compare
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.